ຕອນບ່າຍ ເວລາ 2 : 30 ໂມງ ຂອງວັນທີ 3 ກຸມພາ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ ອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Joaquim AMARAL, ລັດຖະມົນຕີຜູ້ຮັບຜິດຊອບວຽກງານເສດຖະກິດ ຂອງສາທາລະນະລັດ ປະຊາທິປະໄຕ ຕີມໍເລສສະເຕ ເນື່ອງໃນໂອກາດການເຂົ້າຢ້ຽມຂໍ່ານັບຄັ້ງນີ້ ເພື່ອປຶກສາຫາລື ກ່ຽວກັບການເຄື່ອນໄຫວວຽກງານການຮ່ວມມື ລະຫວ່າງ ສປປ ລາວ ແລະ ຕີມໍເລສສະເຕ ໃນຕໍ່ໜ້າ, ມີຜູ້ຕາງໜ້າຈາກທັງສອງຝ່າຍເຂົ້າຮ່ວມ ຈໍານວນ 16 ທ່ານ.
ໃນໂອກາດພົບປະຄັ້ງນີ້ ທັງສອງຝ່າຍໄດ້ພົບປະ ແລະ ປຶກສາຫາລື ກ່ຽວກັບການສະໜັບສະໜູນ ປະເທດຕີມໍເລສສະເຕ ເຂົ້າເປັນສະມາຊິກອົງການການຄ້າໂລກ ແລະ ສະມາຊິກ ອາຊຽນ; ແລະ ປຶກສາຫາລືເພື່ອເພີ່ມທະວີການຮ່ວມມືດ້ານເສດຖະກິດ, ການຄ້າ, ອຸດສາຫະກຳ ແລະ ການລົງທຶນ ລະຫວ່າງ ສປປ ລາວ ແລະ ສາທາລະນະລັດ ປະຊາທິປະໄຕ ຕີມໍເລສສະເຕ ຊຶ່ງປະເທດຕີມໍເລສສະເຕໄດ້ຖືກຮັບເຂົ້າເປັນສະມາຊິກ ຂອງອົງການສະຫະປະຊາຊາດ (UN) ໃນວັນທີ 27/9/2002, ເປັນສະມາຊິກ ຂອງທະນາຄານພັດທະນາອາຊີ (ADB) ໃນປີ 2002 ແລະ ເປັນຜູ້ສັງເກດການຂອງ ASEAN ອີກດ້ວຍ. ນອກນັ້ນ, ປະເທດຕີມໍເລສສະເຕ ຍັງມີສະຖານທູດຢູ່ຕ່າງປະເທດ ຈຳນວນ 25 ປະເທດ ແລະ ມີກົງສຸນໃຫຍ່ ຢູ່ 19 ແຫ່ງ ລວມທັງສະຖານທູດຢູ່ ສປປ ລາວ (ສ່ວນ ສປປ ລາວແມ່ນຍັງບໍ່ທັນມີສະຖານທູດຕັ້ງຢູ່ ປະເທດຕີມໍເລສສະເຕ ເທື່ອ) ທີ່ເຮັດໜ້າທີ່ທາງການທູດ ແລະ ການເມືອງ ຂອງຕົນເອງ. ປະເທດຕີມໍເລສສະເຕ ຍັງເປັນສະມາຊິກຂອງກຸ່ມປະເທດທີ່ໃຊ້ພາສາປອກຕຸຍການ ແລະ ເປັນພາຄີໃນການຮ່ວມມືດ້ານເສດຖະກິດ ແລະ ການຄ້າ ກັບບັນດາປະເທດຄູ່ຮ່ວມພັດທະນາ ເຊັ່ນ: ອິນໂດເນເຊຍ, ອົສຕາລີ ແລະ ອື່ນໆ. ການປຶກສາຫາລື ກ່ຽວກັບການສະໜັບສະໜູນ ຕີມໍເລສສະເຕ ເຂົ້າເປັນສະມາຊິກອົງການການຄ້າໂລກ ແລະ ສະມາຊິກ ອາຊຽນນີ້ ແມ່ນເປັນການຊອກຫາໂອກາດເພື່ອສົ່ງເສີມ ແລະ ຂະຫຍາຍການຮ່ວມມືທາງດ້ານ ອຸດສາຫະກຳ ແລະ ການຄ້າ ໃນຕໍ່ໜ້າຂອງສອງປະເທດ.
ທ່ານ Joaquim AMARAL, ລັດຖະມົນຕີຜູ້ຮັບຜິດຊອບວຽກງານເສດຖະກິດ ຂອງສາທາລະນະລັດປະຊາທິປະໄຕ ປະເທດຕີມໍເລສສະເຕ ໄດ້ສະແດງຄວາມຂອບໃຈຕໍ່ທ່ານລັດຖະມົນຕີ ກຊ ອຄ ທີ່ໃຫ້ການຕ້ອນຮັບຢ່າງອົບອຸ່ນ ແລະ ໃຫ້ຄໍາໝັ້ນວ່າໃນຕໍ່ໜ້າຈະໃຫ້ການຮ່ວມມື ລະຫວ່າງ ສປປ ລາວ – ຕີມໍເລສສະເຕ ໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດທີ່ດີ ໃຫ້ແກ່ສອງປະເທດ.
ພາບ-ຂ່າວໂດຍ: ໄພຄໍາອີ ວິໄລຄໍາ ສູນສະຖິຕິ ແລະ ຂໍ້ມູນຂ່າວສານ ກະຊວງ ອຄ.
