ນະຄອນຫຼວງວຽງຈັນ, ວັນທີ 08 ກຸມພາ 2023 ເວລາ 15:30ມ; ທ່ານ Mario Jose Pallars, ຫົວໜ້າໜ່ວຍງານພາກພື້ນ ອາຊີໃຕ້ ແລະ ອາຊີຕາເວັນອອກສ່ຽງໃຕ້ ແຫ່ງສະຫະພາບເອີຣົບ ພ້ອມດ້ວຍຄະນະ ເຂົ້າຢ້ຽມຂໍ່ານັບ ທ່ານ ປອ ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ທີ່ ຫ້ອງຮັບແຂກຊັ້ນ 4 ກະຊວງອຸດສາຫະກໍາ ແລະ ການຄ້າ ເນື່ອງໃນໂອກາດ ເຂົ້າຮ່ວມກອງປະຊຸມໂຕະມົນ ຄັ້ງທີ 11 ຂອງອົງການການຄ້າໂລກ ຢູ່ ສປປ ລາວ.
ທ່ານ Mario Jose Pallars ໄດ້ສະແດງຄວາມຂອບໃຈມາຍັງລັດຖະບານແຫ່ງ ສປປ ລາວ ແລະ ກະຊວງອຸດສາຫະກໍາ ແລະ ການຄ້າ ສໍາລັບສາຍພົວພັນອັນດີງານໃນການສະໜັບສະໜູນການພັດທະນາເສດຖະກິດໃນ ສປປ ລາວ ຢ່າງຍືນຍົງ ແລະ ມີສ່ວນຮ່ວມ ໃນໄລຍະທີ່ຜ່ານມາ, ໂດຍສະເພາະແມ່ນບົດບາດສໍາຄັນຂອງ ກະຊວງ ອຸດສາຫະກໍາ ແລະ ການຄ້າ ໃນການສົ່ງເສີມການເຊື່ອມສານ ແລະ ຄວາມສາມາດໃນການແຂ່ງຂັນທາງເສດຖະກິດໃນຂະແໜງການທີ່ບໍ່ແມ່ນຊັບພະຍາກອນທໍາມະຊາດ ໃນ ສປປ ລາວ ພ້ອມທັງ ທົບທວນຄືນເປົ້າໝາຍທີ່ເປັນບູລິມະສິດສູງສຸດ ຂອງ EU ເພື່ອເພີ່ມທະວີການຄ້າ ແລະ ການລົງທຶນຂອງ ສປປ ລາວ ຊຶ່ງເປັນພາກໜຶ່ງຂອງແຜນຍຸດທະສາດການຮ່ວມມືໃໝ່ ຂອງ EU ກັບ ສປປ ລາວ; ການແລກປ່ຽນ ກ່ຽວກັບບັນດາໂຄງການທີ່ຍັງກຳລັງຈັດຕັ້ງປະຕິບັດ ພາຍໃຕ້ການຊ່ວຍເຫຼືອຂອງ EU ແລະ ໂຄງການອື່ນໃນຕໍ່ໜ້າທີ່ສະໜັບສະໜູນເຂົ້າໃນການພັດທະນາຂະແໜງການຄ້າ ແລະ ພາກເອກະຊົນ; ປຶກສາຫາລື ກົນໄກການປະສານງານ, ບັນຫາອຸປະສັກ ແລະ ສິ່ງທ້າທາຍ ຕໍ່ການພັດທະນາພາກເອກະຊົນ ຂອງ ສປປ ລາວ; ແລະ ທົບທວນຄືນກ່ຽວກັບການໃຫ້ສັດຕະຍາບັນທາງດ້ານແຮງງານ ເພື່ອໃຫ້ ສປປ ລາວ ສາມາດໄດ້ຮັບສິດທິພິເສດທາງການຄ້າຈາກ EU (GSP+) ພາຍຫລັງຫຼຸດພົ້ນອອກຈາກປະເທດດ້ອຍພັດທະນາ.
ທ່ານ ປອ ມະໂນທອງ ວົງໄຊ, ຮອງລັດຖະມົນຕີ ກະຊວງ ອຸດສາຫະກໍາ ແລະ ການຄ້າ, ຍ້ອງຍໍ ທ່ານ Mario Jose Pallars ກ່ຽວກັບການເຄື່ອນໄຫວວຽກງານຂອງ EU ແລະ ໄດ້ສະແດງຄວາມຂອບໃຈ ໃນການປະກອບສ່ວນສໍາຄັນເຂົ້າໃນການພັດທະນາ ແລະ ຮັກສາສາຍສໍາພັນອັນເຂັ້ມແຂງລະຫວ່າງ ສະຫະພາບເອີຣົບ ແລະ ກະຊວງອຸດສາຫະກໍາ ແລະ ການຄ້າ ທີ່ຜ່ານມາ, ໂດຍສະເພາະ ແມ່ນການປະກອບສ່ວນຢ່າງຕັ້ງໜ້າໃນການສະໜອງທຶນກູ້ຢືມ ແລະ ການລະດົມທຶນຊ່ວຍເຫຼືອລ້າຈາກບັນດາອົງການຊ່ວຍເຫຼືອສາກົນ ເພື່ອສະໜັບສະໜູນລັດຖະບານລາວ ໂດຍຜ່ານ ໂຄງການຊ່ວຍເຫຼືອວຽກງານການຄ້າຂອງສະຫະພາບເອີຣົບ ແກ່ ສປປ ລາວ ພາຍໃຕ້ແຜນງານເຊື່ອມໂຍງ ເສດຖະກິດພາກພື້ນອາຊຽນ (ARISE Plus Laos) ພ້ອມທັງການສ້າງເວັບໄຊ໌ທີ່ດີ ເພື່ອແລກປ່ຽນຂໍ້ມູນຂ່າວສານສໍາລັບພາກທຸລະກິດ ທີ່ສົນໃຈຈະສົ່ງສິນຄ້າອອກໄປຕະຫລາດ EU.
ທ່ານ ຮອງລັດຖະມົນຕີ ຍັງໝັ້ນໃຈວ່າ ກະຊວງອຸດສາຫະກໍາ ແລະ ການຄ້າ ມີຄວາມຍິນດີເປັນຢ່າງຍິ່ງທີ່ຈະສືບຕໍ່ຮ່ວມເຮັດວຽກກັບສະຫະພາບເອີຣົບ ເພື່ອສືບຕໍ່ຈັດຕັ້ງປະຕິບັດໂຄງການຕ່າງໆໃຫ້ສໍາເລັດຕາມເປົ້າໝາຍທີ່ໄດ້ວາງໄວ້, ຊຶ່ງສຸມໃສ່ສ້າງຄວາມຫຼາກຫຼາຍທາງດ້ານເສດຖະກິດ, ຄວາມສາມາດໃນການແຂ່ງຂັນຂອງຂະແໜງການທີ່ບໍ່ແມ່ນຊັບພະຍາກອນທຳມະຊາດ ແລະ ການກຽມຄວາມພ້ອມຂອງ ສປປ ລາວ ທີ່ຈະຫຼຸດພົ້ນອອກຈາກປະເທດດ້ອຍພັດທະນາ.
ພາບ-ຂ່າວໂດຍ: ນ ຖື ແຫວນວົງສົດ
