ຕອນບ່າຍ ເວລາ 02 : 30 ໂມງ ຂອງວັນທີ 09 ກຸມພາ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ  ອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ  ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ JUNG Yung Soo (ຈອງ ຢອງ ຊູ), ເອກອັກຄະລັດຖະທູດ ​ແຫ່ງ ສ ​ເກົາຫລີ ປະຈໍາ ສປປ ລາວ ພ້ອມດ້ວຍຄະນະ ເນື່ອງໃນໂອກາດການເຂົ້າຢ້ຽມຂໍ່ານັບຄັ້ງນີ້ ເພື່ອປຶກສາຫາລື ກ່ຽວກັບການເຄື່ອນໄຫວວຽກງານການຮ່ວມມື ລະຫວ່າງ ສປປ ລາວ ແລະ ສ ເກົາຫລີ ໃນຕໍ່ໜ້າ, ມີຜູ້ຕາງໜ້າ​ຈາກທັງສອງຝ່າຍເຂົ້າຮ່ວມ ຈໍານວນ 13 ​ທ່ານ.

     ໃນ​ໂອ​ກາດ​ພົບ​ປະ​ຄັ້ງ​ນີ້ ແມ່ນເປັນການເສີມຂະຫຍາຍການພົວພັນທີ່ຮັດແໜ້ນຂຶ້ນກວ່າເກົ່າ ຂອງສອງປະເທດ; ທັງສອງ​ຝ່າຍ​ໄດ້ປຶກສາຫາລື ​ກ່ຽວ​ກັບການສະໜັບສະໜູນ ປະເທດ ສ ​ເກົາຫລີ ຈະເປັນເຈົ້າພາບຈັດງານວາງສະແດງ EXPO ປີ 2030 ​ແລະ ​ການເພີ່ມທະວີການຮ່ວມມືດ້ານເສດຖະກິດ, ການຄ້າ, ອຸດສາຫະກຳ,  ການລົງທຶນ ແລະ ການພັດທະນາອຸດສາຫະກໍາດິຈີຕອນ ລະຫວ່າງ ສປປ ລາວ ແລະ ສ ເກົາຫລີ ຊຶ່ງປະເທດ ສ ເກົາຫລີ ຖືເປັນຄູ່ຮ່ວມພັດທະນາທີ່ສໍາຄັນຕໍ່ລາວ ແລະ ຜ່ານມາກໍໄດ້ການຊ່ວຍເຫລືອໃນຫລາຍດ້ານເປັນຕົ້ນ  ອົງການ KOICA ໄດ້ຮ່ວມເຮັດວຽກກັບ ກະຊວງ ອຄ ໃນວຽການສົ່ງເສີມການຄ້າ ແລະ ການລົງທຶນ; ການພັດທະນາຊັບພະຍາກອນມະນຸດ ດ້ານນະວັດຕະກໍາ ທຸລະກິດດີຈິຕອນໃຫ້ແກ່ SMEs ຂອງລາວ ທີ່ໄດ້ເຊັນສັນຍາຮັບ ໂຄງການຊ່ວຍເຫຼືອ ລະຫວ່າງ ກະຊວງ ອຄ ກັບ ອົງການ KOICA ພາຍໃຕ້ໂຄງການ “Project for Developing the Digital Innovative MSME in Lao PDR” ເນັ້ນໃສ່ ສ້າງຫຼັກສູດໃຫ້ວິທະຍາໄລການຄ້າ ສອງຫຼັກສູດຄື: E-Business ແລະ Digital MSME ເພື່ອໃຫ້ໄດ້ໃນລະດັບປະລິນຍາຕີ, ສ້າງໃຫ້ມີສູນ MSME Digital Innovation Center ພາຍໃຕ້ ກສວ ແລະ ສ້າງໃຫ້ມີບຸກຄະລາກອນໃນລະດັບປະລິນຍາໂທ ແລະ ຊ່ຽວຊານດ້ານ MSME ລວມກັນໃຫ້ໄດ້ຢ່າງໜ້ອຍ 20 ຄົນ ໃນເດືອນ ທັນວາ ປີ 2022; ການຊ່ວຍເຫລືອດ້ານຊັບພະຍາກອນນໍ້າ; ຂະແໜງການກະສິກໍາ; ການສຶກສາຄວາມເປັນໄປໄດ້ ໃນການຂະຫຍາຍສະໜາມບິນ ຢູ່ ແຂວງຫຼວງພະບາງ; ແຜນການສ້າງເຂື່ອນໄຟຟ້າ ຢູ່ແຂວງອັດຕະປື ແລະ ອື່ນໆ. ພ້ອມນີ້ຍັງມີການປຶກສາຫາລື​ ກ່ຽວ​ກັບການສະໜັບສະໜູນ ສປປ ລາວ ຈະເປັນເຈົ້າພາບຈັດກອງປະຊຸມ ອາຊຽນ ປີ 2024 ແມ່ນເປັນການ​ຊອກ​ຫາ​ໂອກາດເພື່ອ​ສົ່ງ​ເສີມ ​ແລະ ຂະຫຍາຍ​ການ​ຮ່ວມ​ມືຮອບດ້ານ ​ທາງ​ດ້ານການຕ່າງປະເທດ,ເສດຖະກິດ, ອຸດສາຫະກຳ ​ແລະ ການ​ຄ້າ, ການລົງທຶນ, ວັດທະນາທໍາ-ສັງຄົມ ​ໃນ​ຕໍ່ໜ້າຂອງສອງປະເທດ.

      ທ່ານ  JUNG Yung Soo (ຈອງ ຢອງ ຊູ) ໄດ້ສະແດງຄວາມຮູ້ສຶກເປັນກຽດ ແລະ ດີໃຈເປັນຢ່າງຍິ່ງ ທີ່ທ່ານລັດຖະມົນຕີ ກຊ ອຄ ໄດ້ໃຫ້ການໂອ້ລົມທີ່ເລິກເຊິ່ງດ້ານວິຊາການ ແລະ ໃຫ້ຄໍາໝັ້ນວ່າໃນຕໍ່ໜ້າຈະໃຫ້ການຮ່ວມມື ແລະ ສະໜັບສະໜູນ ​ໃນວຽກງານຫຼາຍດ້ານ ລະຫວ່າງ ສປປ ລາວ – ສ ເກົາຫລີ ເພື່ອໃຫ້ເກີດຜົນປະໂຫຍດທີ່ດີ ໃຫ້ແກ່ສອງປະເທດ.

     ຕອນທ້າຍ ທ່ານລັດຖະມົນຕີ ໄດ້ສະແດງຄວາມຂອບໃຈ ແລະ ອວຍພອນໄຊ ຕໍ່ທ່ານ ເອກອັກຄະລັດຖະທູດ ພ້ອມດ້ວຍຄະນະ ຈົ່ງມີສຸຂະພາບເຂັ້ມແຂງ ແລະ ມີຄວາມສຸກຄວາມຈະເລີນໃນການມາປະຈໍາການຢູ່ລາວ ພ້ອມທັງມີຜົນສໍາເລັດອັນໃຫຍ່ຫຼວງ ໃນການປະກອບສ່ວນເສີມສ້າງຄວາມຈະເລີນງອກງາມ ຂອງສອງລັດຖະບານ ແລະ ປະຊາຊົນສອງປະເທດ.

ພາບ-ຂ່າວໂດຍ: ນ ຖື ແຫວນວົງສົດ