ໃນລະຫວ່າງວັນທີ 20-21 ກຸມພາ 2023, ນະຄອນຫລວງວຽງຈັນ, ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມສຳມະນາລະດົມຄວາມຄິດເຫັນ ກ່ຽວກັບການກຳນົດຫົວຂໍ້ແຜນວຽກບູລິມະສິດພາຍໃຕ້ເສົາຄໍ້າເສດຖະກິດອາຊຽນ ໃນໄລຍະການເປັນປະທານອາຊຽນຂອງ ສປປ ລາວ ປີ 2024. ກອງປະຊຸມດັ່ງກ່າວໄດ້ໄຂຂຶ້ນ ໃນຕອນເຊົ້າຂອງວັນທີ 20 ກຸມພາ 2023 ທີ່ໂຮງແຮມດອນຈັນ ພາເລດສ, ໂດຍການໃຫ້ກຽດເຂົ້າຮ່ວມເປັນປະທານຮ່ວມຂອງ ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກຳ ແລະ ການຄ້າ ທັງເປັນ ລັດຖະມົນຕີສະພາປະຊາຄົມເສດຖະກິດອາຊຽນ ຂອງ ສປປ ລາວ ແລະ ທ່ານ Paul Kelly, ເອກອັກຄະລັດຖະທູດອົດສະຕາລີ ປະຈໍາ ສປປ ລາວ. ໃນກອງປະຊຸມຄັ້ງນີ້ມີຜູ້ເຂົ້າຮ່ວມ ຈາກພາກລັດ, ພາກທຸລະກິດ ແລະ ອົງການຈັດຕັ້້ງສາກົນ ລວມທັງໝົດ 70 ທ່ານ. ກອງປະຊຸມໄດ້ຮັບການສະໜັບສະໜູນດ້ານວິຊາການ ແລະ ງົບປະມານ ຈາກລັດຖະບານອົດສະຕາລີ.
ເພື່ອປະຕິບັດຕາມຮອບວຽນ ຂອງການເປັນເຈົົ້າພາບ ແລະ ເປັນປະທານອາຊຽນ ໃນປີ 2024 ທີ່ຈະມາເຖິງນີ້, ສປປ ລາວ ຈະໄດ້ຮັບກຽດເປັນເຈົົ້າພາບ ແລະ ເປັນປະທານອາຊຽນ, ຊຶ່ງໃນນີ້ ສປປ ລາວ ຈະຕ້ອງໄດ້ກະກຽມຫຼາຍໜ້າວຽກທີ່ສໍາຄັນ ທີ່ຕິດພັນກັບພັນທະ ແລະ ຄວາມຮັບຜິດຊອບໃນຖານະເປັນປະທານອາຊຽນ ເປັນຕົົ້ນ ການກໍານົດແຜນວຽກບູລິມະສິດດ້ານເສດຖະກິດອາຊຽນ ໃນໄລຍະທີ່ ສປປ ລາວ ເປັນປະທານອາຊຽນ ປີ 2024. ຈຸດປະສົງຂອງກອງປະຊຸມສໍາມະນາຄັ້ງນີ້ ແມ່ນເພື່ອພ້ອມກັນຄົ້ນຄວ້າ ແລະ ປຶກສາຫາລື ກ່ຽວກັບການກຳນົດແຜນວຽກບູລິມະສິດເສດຖະກິດອາຊຽນ ຂອງ ສປປ ລາວ ໃນປີ 2024 ລະຫວ່າງບັນດາກະຊວງຂະແໜງການທັງພາກລັດ ແລະ ທຸລະກິດ. ກອງປະຊຸມຄັ້ງນີ້ ມີຄວາມໝາຍຄວາມສຳຄັນໃນການຍາດແຍ່ງເອົາຜົນປະໂຫຍດຈາກແຜນວຽກບູລິມະສິດດັ່ງກ່າວ ເພື່ອຊຸກຍູ້ ແລະ ສົ່ງເສີມການພັດທະນາເສດຖະກິດ-ສັງຄົມ ຂອງ ສປປ ລາວ ກໍ່ຄືຂອງອາຊຽນໃຫ້ນັບມື້ມີການຂະຫຍາຍຕົວເທື່ອລະກ້າວ.
ພ້ອມນີ້ທ່ານ ປອ. ມະໂນທອງ ວົງໄຊ ຮອງລັດຖະມົນຕີ, ກະຊວງອຸດສາຫະກໍາ ແລະ ການຄ້າ ໄດ້ລາຍງານພາບລວມ ກ່ຽວກັບການກະກຽມການເປັນເຈົ້າພາບ ແລະ ເປັນປະທານອາຊຽນປີ 2024 ຂອງ ສປປ ລາວ, ຊຶ່ງເປັນພັນທະຄວາມຮັບຜິດຊອບຂອງ ສປປ ລາວ ໃນໄລຍະການເປັນປະທານອາຊຽນ ປີ 2024; ສຳລັບເສົາຄໍ້າປະຊາຄົມເສດຖະກິດອາຊຽນ ປະກອບມີ 1) ພັນທະຄວາມຮັບຜິດຊອບຂອງ ສປປ ລາວ ໃນໄລຍະການເປັນປະທານອາຊຽນ ປີ 2024 ສຳລັບເສົາຄໍ້າປະຊາຄົມເສດຖະກິດອາຊຽນ, ຊຶ່ງ ສປປ ລາວ ໄດ້ຮັບກຽດເປັນເຈົ້າພາບຫລາຍຄັ້ງຜ່ານມາ ຄັ້ງທີ 1: ໃນປີ 2004 ໃນເວລານັ້ນຍັງບໍ່ໄດ້ມີການກໍານົດແຜນວຽກບູລິມະສິດເປັນອັນສະເພາະ ຂອງເສົາຄໍ້າເສດຖະກິດເທື່ອ, ຄັ້ງທີ 2: ໃນປີ 2016 PEDs ຂອງ ສປປ ລາວ ມີທັງໝົດ 8 ຫົວຂໍ້ ຊຶ່ງໃນນັ້ນໄດ້ເນັ້ນໃສ່: ການສົ່ງເສີມ MSMEs, ການສົ່ງເສີມການຫຼຸດຜ່ອນຊ່ອງຫວ່າງຄວາມແຕກໂຕນການພັດທະນາ ລະຫວ່າງປະເທດສະມາຊິກອາຊຽນ ແລະ ການສົ່ງເສີມ ASEAN Connectivity ແລະ ຄັ້ງທີ 3: ສໍາລັບ PEDs ໃນປີ 2024 ແມ່ນຂຶ້ນກັບຜົນການປຶກສາຫາລືໃນກອງປະຊຸມໃນຄັ້ງນີ້, 2) ກະກຽມແຜນດໍາເນີນງານການເປັນປະທານອາຊຽນຂອງ ສປປ ລາວ ສະເພາະເສົາຄໍ້າເສດຖະກິດສຳລັບປີ 2022-2023 ແລະ 2023-2024 ມີທັງໝົດ 21 ແຜນວຽກ ນັບແຕ່ທ້າຍປີ 2022-2023 ສຳເລັດໄປແລ້ວ 8 ແຜນວຽກ (ກວມເອົາ 38%) ແລະ ຍັງບໍ່ທັນຈັດຕັ້ງປະຕິບັດ 13 ແຜນວຽກ (ກວມເອົາ 62%), 3) ກະກຽມຄວາມຄືບໜ້າບັນດາໜ້າວຽກ ເພື່ອກະກຽມ ແລະ ດໍາເນີນການເປັນປະທານອາຊຽນຂອງ ສປປ ລາວ ຊຶ່ງໄດ້ສໍາເລັດການອອກຂໍ້ຕົກລົງ ວ່າດ້ວຍການແຕ່ງຕັ້ງຄະນະຊີ້ນໍາລວມ ແລະ ບັນດາອະນຸກຳມະການຮັບຜິດຊອບ ໃນການກະກຽມ ແລະ ດຳເນີນການເປັນເຈົ້າພາບຈັດກອງປະຊຸມ ທີ່ຕິດພັນກັບເສົາຄໍ້າປະຊາຄົມເສດຖະກິດອາຊຽນ ໃນໄລຍະການເປັນປະທານອາຊຽນຂອງ ສປປ ລາວ ປີ 2024 ສະບັບເລກທີ 0137/ອຄ, ລົງວັນທີ 31 ມັງກອນ 2023, ແລະ 4) ກຽມແຜນວຽກແຕ່ນີ້ເຖິງທ້າຍເດືອນ ທັນວາ 2023 ຊຶ່ງຈະໄດ້ຈັດກອງປະຊຸມລະດົມຄວາມຄິດກັບພາກສ່ວນທີ່ກ່ຽວຂ້ອງກ່ຽວກັບການກໍານົດຫົວຂໍ້ PED ຂອງ ສປປ ລາວ ຈໍານວນ 3 ຄັ້ງ: ພາກເໜືອ, ພາກກາງ, ພາກໃຕ້ ແລະ ໃນນະຄອນຫຼວງວຽງຈັນ ແລະ ຈະໄດ້ໄປຖອດຖອນບົດຮຽນກ່ຽວກັບການເປັນປະທານອາຊຽນກັບກອງເລຂາອາຊຽນ ແລະ ບາງປະເທດສະມາຊິກອາຊຽນ ໂດຍສະເພາະດ້ານເນື້ອໃນ, ພິທີການ ແລະ ສະເໜີຜ່ານແຜນງົບປະມານເພື່ອຮັບໃຊ້ເຂົ້າໃນການເປັນເຈົ້າພາບ ແລະ ປະທານອາຊຽນຂອງ ສປປ ລາວ ປີ 2024 ຕໍ່ກະຊວງການຕ່າງປະເທດ ແລະ ກະຊວງການເງິນ ເພື່ອພິຈາລະນາ (ຄາດຄະເນ ເດືອນ ມີນາ 2023).
ນອກຈາກນີ້ ກອງປະຊຸມສຳມະນາຍັງໄດ້ໃຊ້ສະຕິປັນຍາພ້ອມກັນຄົ້ນຄວ້າ, ປຶກສາຫາລືລົງເລິກໃນ 4 ກຸ່ມຫົວຂໍ້ຍຸດທະສາດບູລິມະສິດ: 1) ການເຊື່ອມໂຍງ ແລະ ເຊື່ອມຈອດດ້ານເສດຖະກິດ (Integrating and Connecting Economy); 2) ການກ້າວໄປຂ້າງໜ້າແບບຍືນຍົງ (Forging Sustainable Future); 3) ການສົົ່ງເສີມການມີສ່ວນຮ່ວມ ແລະ ແນວຄິດສ້າງສັນ (Fostering Inclusion and Creativity); ແລະ 4) ການຫັນປ່ຽນເພື່ອກ້າວໄປສູ່ດິຈິຕອນໃນອະນາຄົດ (Transforming for the Digital Future).
ຂ່າວ-ພາບ: ໄພວັນ ໂຄດວັນທາ
