ຕອນເຊົ້າຂອງ ວັນທີ 27 ກຸມພາ 2023 ທ່ານ ມະໄລທອງ ກົມມະສິດ, ລັດຖະມົນຕີ ກະຊວງອຸດສາຫະກຳ ແລະ ການຄ້າ ໄດ້ໃຫ້ກຽດເປັນປະທານກອງປະຊຸມຄັ້ງປະຖົມມະເລີກ ຂອງຄະນະຊີ້ນໍາລວມ ແລະ ບັນດາອະນຸກໍາມະການຮັບຜິດຊອບ ແລະ ກະກຽມດໍາເນີນການເປັນເຈົ້າພາບ ແລະ ເປັນປະທານອາຊຽນຂອງ ສປປ ລາວ ປີ 2024 ສໍາລັບເສົາຄໍ້າເສດຖະກິດ, ເພື່ອເຜີຍແຜ່ເນື້ອໃນຂອງຂໍ້ຕົກລົງ ແລະ ບັນດາໜ້າວຽກຂອງແຕ່ລະອະນຸກໍາມະການ ຊຶ່ງມີຫຼາຍຫົວຂໍ້ວາລະນຳເຂົ້າມາປຶກສາຫາລືໃນກອງປະຊຸມ ເປັນຕົ້ນ: ເຜີຍແຜ່ເນື້ອໃນ ຂໍ້ຕົກລົງວ່າດ້ວຍ ການແຕ່ງຕັ້ງຄະນະຊີ້ນໍາລວມ ແລະ ບັນດາອະນຸກໍາມະການຮັບຜິດຊອບກະກຽມ ແລະ ດໍາເນີນການເປັນເຈົ້າພາບຈັດກອງປະຊຸມ ທີ່ຕິດພັນກັບເສົາຄໍ້າປະຊາຄົມເສດຖະກິດອາຊຽນ ໃນໄລຍະການເປັນປະທານອາຊຽນຂອງ ສປປ ລາວ ປີ 2024, ສະບັບເລກທີ 0137/ອຄ, ລົງວັນທີ 31 ມັງກອນ 2023; ລາຍງານຄວາມຄືບໜ້າ ກ່ຽວກັບການກະກຽມສ້າງແຜນວຽກບູລິມະສິດ (PEDs) ຂອງສປປ ລາວ ໃນໄລຍະເປັນປະທານອາຊຽນ 2024; ແລະ ລາຍງານຄວາມຄືບໜ້າ ກ່ຽວກັບການກະກຽມດ້ານງົບປະມານ ແລະ ແຜນດໍາເນີນງານປະຈໍາປີ 2023-2024.
ກອງປະຊຸມຄັ້ງນີ້ ໄດ້ມີບັນດາທ່ານ ຮອງລັດຖະມົນຕີ, ຮອງເຈົ້າຄອງນະຄອນຫຼວງວຽງຈັນ, ບັນດາທ່ານຮອງປະທານສະພາການຄ້າ ແລະ ອຸດສາຫະກໍາແຫ່ງຊາດ, ຜູ້ຕາງໜ້າຈາກທະນາຄານ ແຫ່ງ ສປປ ລາວ, ຜູ້ຕາງໜ້າຈາກກະຊວງປ້ອງກັນປະເທດ, ຜູ້ຕາງໜ້າຈາກກະຊວງປ້ອງກັນຄວາມສະຫງົບ, ບັນດາທ່ານຫົວໜ້າ-ຮອງຫົວໜ້າກົມ, ຫົວໜ້າ-ຮອງຫົວໜ້າຫ້ອງການ ຂອງກະຊວງ ອຄ ແລະ ຜູ້ຕາງໜ້າຈາກກະຊວງທີ່ນອນຢູ່ໃນເສົາຄໍ້າເສດຖະກິດ ທີ່ກ່ຽວຂ້ອງເຂົ້າຮ່ວມ ຈໍານວນ 60 ກວ່າທ່ານ. ກອງປະຊຸມ ໄດ້ດໍາເນີນຂຶ້ນໂດຍການປຶກສາຫາລື ແລະ ແລກປ່ຽນຄໍາຄິດຄໍາເຫັນໃນປະເດັນຕ່າງໆ ທີ່ຕິດພັນກັບການກະກຽມການເປັນປະທານອາຊຽນ ປີ 2024;
ທ່ານປະທານໄດ້ກ່າວວ່າ: ນອກຈາກຈະເປັນກອງປະຊຸມຄັ້ງທໍາອິດ ຂອງຄະນະຮັບຜິດຊອບກະກຽມການເປັນປະທານອາຊຽນ ສໍາລັບເສົາຄໍ້າເສດຖະກິດ ເພື່ອປຶກສາຫາລືກ່ຽວກັບການແບ່ງຄວາມຮັບຜິດຊອບ ຂອງແຕ່ລະອະນຸກໍາມະການພາຍໃຕ້ຂໍ້ຕົກລົງດັ່ງກ່າວແລ້ວ, ຍັງຈະໄດ້ຮັບຟັງການລາຍງານຄວາມຄືບໜ້າຂອງການກະກຽມໃນດ້ານຕ່າງໆ ເຊັ່ນ: ການກໍານົດແຜນວຽກບູລິມະສິດດ້ານເສດຖະກິດອາຊຽນ, ແຜນດໍາເນີນງານ ແລະ ແຜນງົບປະມານໃນການກະກຽມເປັນເຈົ້າພາບ ອາຊຽນ ໃນປີ 2024 ຂອງ ສປປ ລາວ; ໂດຍອີງຕາມຜົນກອງປະຊຸມຄະນະກໍາມະການຊີ້ນໍາລະດັບຊາດ ເພື່ອກະກຽມ ແລະ ດໍາເນີນການເປັນປະທານອາຊຽນ ຂອງ ສປປ ລາວ ໃນປີ 2024 ຄັ້ງວັນທີ 09 ກຸມພາ 2023 ໂດຍການເປັນປະທານຂອງທ່ານ ນາຍົກລັດຖະມົນຕີ ໄດ້ແຈ້ງໃຫ້ຮູ້ວ່າ ປີນີ້ການມອບໂອນການເປັນປະທານອາຊຽນ ຂອງປະເທດອິນໂດເນເຊຍ ໃຫ້ແກ່ ສປປ ລາວ ຈະໄດ້ຈັດຂຶ້ນໃນເດືອນ ກັນຍາ 2023 ຊຶ່ງໄວກ່ອນກໍານົດການປົກກະຕິ 02 ເດືອນ. ສະນັ້ນ, ພວກເຮົາຍິ່ງຈະມີເວລາຈໍາກັດໃນການກຽມຄວາມພ້ອມໃນດ້ານຕ່າງໆ ສໍາລັບການເປັນປະທານ ປີ 2024 ນີ້. ຍ້ອນແນວນັ້ນ ມັນຮຽກຮ້ອງໃຫ້ທຸກພາກສ່ວນຕ້ອງໄດ້ຮີບຮ້ອນກະກຽມໃຫ້ດີ ເພື່ອຮັບປະກັນທາງດ້ານເນື້ອໃນ, ດ້ານພິທີການ ແລະ ໃນດ້ານຕ່າງໆ. ພ້ອມກັນນັ້ນ, ໃນປີ 2024 ນີ້ ຈະເປັນປີທີ່ອາຊຽນຕ້ອງໄດ້ຂຸ້ນຂ້ຽວກະກຽມສ້າງແຜນຍຸດທະສາດ ພາຍຫຼັງປີ 2025 ຂອງຕົນ ແລະ ເປັນປີທີ່ ສປປ ລາວ ຈະຮັບໜ້າທີ່ເປັນປະທານອາຊຽນ. ສະນັ້ນ, ໃນການດໍາເນີນການເປັນປະທານອາຊຽນ ຂອງພວກເຮົາກໍຈະມີທັງໂອກາດ ແລະ ສິ່ງທ້າທາຍໄປພ້ອມໆກັນ ໂດຍສະເພາະໃນສະພາບເສດຖະກິດພາກພື້ນ ແລະ ສາກົນ ຍັງສືບຕໍ່ປະເຊີນກັບສະພາບຜັນແປ ແລະ ສະຫຼັບຊັບຊ້ອນ ຍ້ອນໄດ້ຮັບຜົນກະທົບຈາກບັນຫາຄວາມຂັດແຍ່ງໃນພາກພື້ນ ແລະ ສາກົນ, ການຖົດຖອຍຂອງເສດຖະກິດໂລກ, ການແຜ່ລະບາດຂອງພະຍາດໂຄວິດ-19 ແລະ ການປະຕິບັດມາດຕະການຂວໍ້າບາດຕ່າງໆຢູ່ບາງພາກພື້ນ ຊຶ່ງໄດ້ສົ່ງຜົນກະທົບຕໍ່ເສດຖະກິດ-ສັງຄົມໃນວົງກວ້າງ ລວມທັງພາກພື້ນອາຊຽນ.
ນອກຈາກນີ້, ທ່ານປະທານຍັງຮຽກຮ້ອງໃຫ້ຜູ້ເຂົ້າຮ່ວມກອງປະຊຸມໃຫ້ເອົາໃຈໃສ່ຢ່າງເປັນເຈົ້າການ ແລະ ການຮ່ວມມືຂອງທຸກພາກສ່ວນ ຈະເຮັດໃຫ້ພວກເຮົາສາມາດບັນລຸຜົນສໍາເລັດໃນການເປັນປະທານອາຊຽນໃນຄັ້ງນີ້ ໂດຍສະເພາະຈະສາມາດຍາດເອົາກາລະໂອກາດໃນຖານະເປັນປະທານອາຊຽນ ເພື່ອປະກອບສ່ວນເຂົ້າໃນການຊຸກຍູ້-ສົ່ງເສີມ ການພັດທະນາເສດຖະກິດ-ສັງຄົມ ຂອງປະເທດເຮົາ.
ພາບ-ຂ່າວ: ນາງ ຖື ແຫວນວົງສົດ
