ໃນວັນທີ 09 ມີນາ 2023 ຜ່ານມາ, ທີ່ຫ້ອງຮັບແຂກ ຊັ້ນ 4, ກະຊວງອຸດສາຫະກຳ ແລະ ການຄ້າ, ທ່ານ ນ. ຈັນສຸກ ແສງພະຈັນ ຮອງລັດຖະມົນຕີ ​ກະຊວງ​ອຸດສາຫະກຳ ​ແລະ ການ​ຄ້າ ຜູ້ຊີ້ນໍາວຽກງານຊັບສິນທາງປັນຍາ ໄດ້ຕ້ອນຮັບການເຂົ້າຢ້ຽມຂໍ່ານັບ ແລະ ພົບປະຂອງ ທ່ານ ນ. ເຣນາ ລີ, ຫົວໜ້າສຳນັກງານຊັບສິນທາງປັນຍາ ແຫ່ງ ສິງກະໂປ (IPOS) ພ້ອມດ້ວຍຄະນະ, ເຂົ້າຮ່ວມມີ ທ່ານ ສັນຕິສຸກ ພູນສະຫວັດ, ຫົວໜ້າກົມຊັບສິນທາງປັນຍາ, ທ່ານ ໄຊບັນດິດ ໄຊຍະວົງຄໍາດີ, ຮອງຫົວໜ້າກົມຊັບສິນທາງປັນຍາ ພ້ອມດ້ວຍພະນັກງານທີ່ກ່ຽວຂ້ອງ.

ທ່ານ ນ. ເຣນາ ລີ, ໄດ້ລາຍງານຕໍ່ ທ່ານ ຮອງລັດຖະມົນຕີ ກະຊວງ ອຄ ຊາບ ກ່ຽວກັບຈຸດປະສົງຂອງການເຂົ້າຢ້ຽມຂໍ່ານັບ ແລະ ພົບປະ ໃນຄັ້ງນີ້, ເພື່ອປຶກສາຫາລື ກ່ຽວກັບນະໂຍບາຍຂອງ ສປປ ລາວ ທີ່ຕິດພັນກັບວຽກງານຊັບສິນທາງປັນຍາ ແລະ ລາຍງານກ່ຽວກັບການຮ່ວມມືສອງຝ່າຍ ໃນໄລຍະຜ່ານມາ. ພ້ອມທັງໄດ້ສະເໜີ ໃຫ້ມີການສືບຕໍ່ຮ່ວມມືໃນຕໍ່ໜ້າ ໂດຍສະເພາະ ສະເໜີໃຫ້ມີການປັບປຸງບົດບັນທຶກຄວາມໃຈ ວ່າດ້ວຍການຮ່ວມມືໃນຂົງເຂດຊັບສິນທາງປັນຍາ ແລະ ບົດບັນທຶກການຮ່ວມມື ວ່າດ້ວຍການອອກສິດທິບັດ ລະຫວ່າງ ກົມຊັບສິນທາງປັນຍາ ສປປ ລາວ ແລະ ສຳນັກງານຊັບສິນທາງປັນຍາແຫ່ງ ສິງກະໂປ ທີ່ໄດ້ລົງນາມໃນໄລຍະຜ່ານມາ, ພ້ອມນັ້ນ ທ່ານ ນ. ເຣນາ ລີ, ກໍໄດ້ເຊື້ອເຊີນ ທ່ານ ຮອງລັດຖະມົນຕີ ກະຊວງ ອຄ ແລະ ຄະນະ ເຂົ້າຮ່ວມກອງປະຊຸມປະຈໍາປີ 2023 ຂອງສະມາຄົມເຄື່ອງໝາຍການຄ້າສາກົນ (INTA) ແລະ ຢ້ຽມຢາມສໍານັກງານຊັບສິນທາງປັນຍາ ແຫ່ງ ສິງກະໂປ ໃນເດືອນ ພຶດສະພາ 2023.

ໃນໄລຍະຜ່ານມາ ສປປ ລາວ ແລະ ສິງກະໂປ ກໍໄດ້ມີການຮ່ວມມືສອງຝ່າຍ ໃນຂົງເຂດຊັບສິນທາງປັນຍາ ນັບແຕ່ປີ 2015 ເປັນຕົ້ນມາ ແລະ ໄດ້ລົງນາມບົດບັນທຶກຄວາມເຂົ້າໃຈ ວ່າດ້ວຍການຮ່ວມມືໃນຂົງເຂດຊັບສິນທາງປັນຍາ ລະຫວ່າງ ກົມຊັບສິນທາງປັນຍາ ສປປ ລາວ ແລະ ສຳນັກງານຊັບສິນທາງປັນຍາ ແຫ່ງ ສິງກະໂປ ໃນວັນທີ 26 ສິງຫາ 2015 ແລະ ໄດ້ລົງນາມບົດບັນທຶກການຮ່ວມມື ວ່າດ້ວຍການອອກສິດທິບັດ ລະຫວ່າງ ກົມຊັບສິນທາງປັນຍາ ສປປ ລາວ ແລະ ສຳນັກງານຊັບສິນທາງປັນຍາ ແຫ່ງ ສິງກະໂປ ໃນວັນທີ 27 ພະຈິກ 2019, ນອກຈາກນັ້ນ ສປປ ລາວ ກໍໄດ້ເຂົ້າຮ່ວມງານສັບປະດາຊັບສິນທາງປັນຍາ ທີ່ສິງກະໂປ ໃນທຸກໆປີ ແລະ ໄດ້ຮັບການຊ່ວຍເຫຼືອໃນດ້ານວິຊາການ ໃນການຝຶກອົບຮົມໃຫ້ພະນັກງານ ກົມຊັບສິນທາງປັນຍາ ຂອງ ສປປ ລາວ ກ່ຽວກັບການຈົດທະບຽນເຄື່ອງໝາຍການຄ້າ ຜ່ານລະບົບມາດຣິດ ແລະ ເຂົ້າຮ່ວມຝຶກອົບຮົມສຳມະນາທາງໄກຕ່າງໆ ທີ່ຈັດໂດຍສຳນັກງານຊັບສິນທາງປັນຍາ ແຫ່ງ ສິງກະໂປ ແລະ ວຽກງານສິດທິບັດ, ພ້ອມນັ້ນ ກໍໄດ້ຈັດກອງປະຊຸມພົບປະສອງຝ່າຍເປັນແຕ່ລະໄລຍະ ເພື່ອທົບທວນການຈັດຕັ້ງປະຕິບັດວຽກງານການຮ່ວມມືໃນຂົງເຂດຊັບສິນທາງປັນຍາ.

ທ່ານ ນ. ຈັນສຸກ ແສງພະຈັນ ຮອງລັດຖະມົນຕີ ກະຊວງ ອຄ ກໍໄດ້ກ່າວຕ້ອນຮັບ ທ່ານ ນ. ເຣນາ ລີ  ແລະ ຄະນະ ທີ່ໄດ້ເດີນທາງມາຢ້ຽມຢາມ ແລະ ເຮັດວຽກ ຢູ່ ສປປ ລາວ ໃນຄັ້ງນີ້, ພ້ອມທັງກ່າວ ສະແດງຄວາມຂອບໃຈມາຍັງ ລັດຖະບານ ສິງກະໂປ ທີ່ໄດ້ໃຫ້ຮ່ວມມື ແລະ ໃຫ້ການຊ່ວຍເຫຼືອ ສປປ ລາວ ຕະຫຼອດມາ ໂດຍສະເພາະ ການຊ່ວຍເຫຼືອທາງດ້ານວິຊາການ ໃນການພັດທະນາບຸກຄະລາກອນ ຂອງ ສປປ ລາວ, ຜ່ານສູນການຮ່ວມມື ລາວ-ສິງກະໂປ, ໃນຫົວຂໍ້ຕ່າງໆທີ່ຕິດພັນກັບວຽກງານຊັບສິນທາງປັນຍາ. ພ້ອມນັ້ນ, ຍັງໄດ້ມີການພົວພັນຮ່ວມມືສອງຝ່າຍ ໃນຂົງເຂດຊັບສິນທາງປັນຍາ ທີ່ເປັນອັນລວມ ແລະ ໃນຂົງເຂດສິດທິບັດ ທີ່ເປັນອັນສະເພາະ.

ໃນປັດຈຸບັນ ນະໂຍບາຍລວມ ຂອງວຽກງານຊັບສິນທາງປັນຍາ ໃນ ສປປ ລາວ ມີແຜນງານກ່ຽວກັບການເຜີຍແຜ່ຄວາມຮູ້ດ້ານຊັບສິນທາງປັນຍາ ແລະ ສົ່ງເສີມການນໍາໃຊ້ຊັບສິນທາງປັນຍາ ເຂົ້າໃນຂົງເຂດສະຖາບັນການສຶກສາ ແລະ ພາກທຸລະກິດ, ໂດຍສະເພາະ ກຸ່ມຜູ້ຜະລິດ ໜຶ່ງເມືອງ-ໜຶ່ງຜະລິດຕະພັນ ODOP ທີ່ຜັນຂະຫຍາຍມາເປັນແຜນວຽກຕໍ່ເນື່ອງ ພາຍໃຕ້ຫົວຂໍ້ “ໜຶ່ງຜະລິດຕະພັນ ໜຶ່ງຊັບສິນທາງປັນຍາ”. ໂດຍລວມແລ້ວ, ​ສປປ ລາວ ຍັງມີຄວາມຕ້ອງການໃນການພັດທະນາທາງດ້ານບຸກຄະລາກອນ ແລະ ສົ່ງເສີມ ເຕັກໂນໂລຊີ ນະວັດຕະກຳ ຜ່ານການນໍາໃຊ້ຊັບສິນທາງປັນຍາ ເພື່ອປົກປ້ອງຜົນງານຂອງນັກປະດິດສ້າງ.

ຕອນທ້າຍ ທ່ານ ຮອງ ລມຕ ກະຊວງ ອຄ ເຫັນດີໃຫ້ການສະໜັບສະໜູນ ຕໍ່ການສະເໜີຂອງຝ່າຍສິງກະໂປ ໃນການປັບປຸງບົດບັນທຶກຄວາມໃຈ ວ່າດ້ວຍການຮ່ວມມືໃນຂົງເຂດຊັບສິນທາງປັນຍາ ແລະ ບົດບັນທຶກການຮ່ວມມື ວ່າດ້ວຍການອອກສິດທິບັດ ລະຫວ່າງ ກົມຊັບສິນທາງປັນຍາ ສປປ ລາວ ແລະ ສຳນັກງານຊັບສິນທາງປັນຍາ ແຫ່ງ ສິງກະໂປ ເພື່ອເຮັດໃຫ້ການຮ່ວມມືສອງຝ່າຍ ມີການສືບຕໍ່ໃນອະນາຄົດ.

ພ້ອມນັ້ນ, ທ່ານ ຮອງ ລມຕ ກະຊວງ ກໍໄດ້ສະເໜີໃຫ້ ທ່ານ ຫົວໜ້າສຳນັກງານຊັບສິນທາງປັນຍາ ແຫ່ງ ສິງກະໂປ ສິງກະໂປ ຊ່ວຍໃຫ້ການສະໜັບສະໜູນ, ຊຸກຍູ້ ການຈັດຕັ້ງປະຕິບັດແຜນປະຕິບັດງານດ້ານຊັບສິນທາງປັນຍາອາຊຽນ 2016- 2025 ໃຫ້ສຳເລັດ ແລະ ຮ່າງແຜນວຽກ ຮອດປີ 2030.

 ຮູບພາບ: ຄອນເພັງ ພິມມະສານ, ບົດຂ່າວ: ບາລະຄອນ ສຸວັນນະພາສີ

ຂໍ້ມູນຈາກ: ພະແນກນະໂຍບາຍ ແລະ ພົວພັນຕ່າງປະເທດ

ຮຽບຮຽງ: ທ ໄພວັນ ໂຄດວັນທາ ຂ່າວສານ ອຄ