ໃນລະຫວ່າງວັນທີ 20-22 ມີນາ 2023 ຜ່ານມາ, ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ນຳພາຄະນະຜູ້ແທນຈາກ ສປປ ລາວ ເຂົ້າຮ່ວມກອງປະຊຸມລັດຖະມົນຕີເສດຖະກິດອາຊຽນແບບວົງແຄບ ຄັ້ງທີ 29 (AEM Retreat), ທີ່ເມືອງມາເກີລັງ, ຢອກຈາກາຕາ, ປະເທດ ອິນໂດເນເຊຍ. ໂດຍມີບັນດາທ່ານ ລັດຖະມົນຕີເສດຖະກິດອາຊຽນ, ລັດຖະມົນຕີ ກະຊວງທ່ອງທ່ຽວ, ການຄ້າ ແລະ ອຸດສາຫະກຳ ປະເທດ ຕິມໍເລສເຕ້, ເລຂາທິການໃຫຍ່ອາຊຽນ ແລະ ບັນດາຄະນະຜູ້ແທນຈາກປະເທດສະມາຊິກອາຊຽນ ເຂົ້າຮ່ວມກອງປະຊຸມ
ຈຸດປະສົງຂອງກອງປະຊຸມຄັ້ງນີ້ ແມ່ນເພື່ອປຶກສາຫາລື ແລະ ແລກປ່ຽນຄໍາຄິດເຫັນຮ່ວມກັນຫຼາຍບັນຫາ ເຊັ່ນ: ແຜນວຽກບູລິມະສິດ (PEDs) ພາຍໃຕ້ການເປັນປະທານອາຊຽນຂອງ ອິນໂດເນເຊຍ, ການເຈລະຈາເພື່ອຍົກລະດັບສັນຍາການຄ້າດ້ານສິນຄ້າອາຊຽນ, ການຫຼຸດຜ່ອນການປ່ອຍອາຍກາກໂບນິກໃນອາຊຽນ, ບັນຫາທີ່ຕິດພັນກັບການຮ່ວມມືພາຍນອກ, ການຈັດຕັ້ງປະຕິບັດສັນຍາ RCEP ແລະ ອື່ນໆ. ກອງປະຊຸມຄັ້ງນີ້, ໄດ້ຮັບຊາບຄວາມຄືບໜ້າການຈັດຕັ້ງປະຕິບັດ ບັນດາວຽກງານພາຍໃຕ້ເສົາຄໍ້າເສດຖະກິດອາຊຽນ, ໂດຍສະເພາະແມ່ນໄດ້ຮັບ ຮອງເອົາເອກະສານຕ່າງໆ ເປັນຕົ້ນ: 1. ໄດ້ຮັບຮອງເອົາ 7 ເອກະສານແນວຄວາມຄິດ (Concept note) ຂອງແຜນວຽກບູລິມະສິດ (PEDs) ພາຍໃຕ້ເສົາຄໍ້າເສດຖະກິດອາຊຽນ, 2. ໄດ້ຮັບຮອງເອົາແຜນວຽກບູລິມະສິດປະຈໍາປີ 2023 ຂອງອາຊຽນ, ແລະ 3. ຮັບຮອງເອົາຂໍ້ສະເໜີແນະຂອງກອງປະຊຸມເຈົ້າໜ້າທີ່ສະເພາະກິດລະດັບສູງ ເພື່ອການເຊື່ອມໂຍງເສດຖະກິດອາຊຽນ (HLTF-EI) ຄັ້ງທີ 43
ກອງປະຊຸມແບບວົງແຄບຄັ້ງທີ 29 (AEM Retreat) ຄັ້ງນີ້, ທ່ານ ມະໄລທອງ ກົມມະສິດ ລັດຖະມົນຕີ ກະຊວງ ອຄ ໄດ້ມີການພົບປະສອງຝ່າຍກັບ ທ່ານ Gan Kim Yong, ລັດຖະມົນຕີ ກະຊວງການຄ້າ ແລະ ອຸດສາຫະກໍາ ປະເທດສິງກະໂປ ເພື່ອປຶກສາຫາລືກ່ຽວກັບຄວາມຄືບໜ້າໃນການກະກຽມເປັນເຈົ້າພາບ ແລະ ປະທານອາຊຽນຂອງ ສປປ ລາວ, ການປະກອບສ່ວນພັນທະທາງດ້ານງົບປະມານເຂົ້າໃນກອງເລຂາ RCEP
ນອກນັ້ນ, ກໍ່ໄດ້ພົບປະສອງຝ່າຍກັບ ທ່ານ Dr. Kao Kim Hourn, ເລຂາທິການໃຫຍ່ຂອງອາຊຽນ ກ່ຽວກັບຂໍ້ສະເໜີໃນການກຳນົດແຜນວຽກບູລິມະສິດທາງດ້ານເສດຖະກິດອາຊຽນ 2024, ການສະໜັບສະໜູນກ່ຽວກັບການສ້າງຂອບວຽກເສດຖະກິດດິຈິຕັອນ (DEFA), ແລະ ການສ້າງຍຸດທະສາດອາຊຽນວ່າດ້ວຍການຫຼຸດ ຜ່ອນອາຍກາກໂບນິກ
ພ້ອມກັນນັ້ນ, ທ່ານລັດຖະມົນຕີ ຍັງໄດ້ເຂົ້າຮ່ວມກອງປະຊຸມປຶກສາຫາລືກັບສະພາ ທີ່ປຶກສາທຸລະກິດອາ ຊຽນ (ASEAN-BAC) ເພື່ອປຶກສາຫາລືກ່ຽວກັບແຜນວຽກບູລິມະສິດຂອງພາກທຸລະກິດ ສໍາລັບປີ 2023 ເຊິງປະກອບມີ: 1. ASEAN QR Code; 2. ສິນເຊືອຜ່ານທາງດິຈິຕອນ (Digital Lending Platform / P2P); 3. ແຫຼ່ງຂໍ້ມູນສຳລັບຜູ້ປະກອບ (Wiki Entrepreneur); 4. Net Zero Hub; 5. ສູນກາງອາຍກາກໂບນິກທີ່ສະອາດ (Carbon Center of Excellence); 6. ແຄມເປນການສັກຢາວັກຊີນອາຊຽນ (ASEAN One Shot Campaign); 7. ຮູບແບບການລວບລວມສິນຄ້າກະສິກຳ (Inclusive Loop Model for Agriculture Products); ແລະ 8) ອາຊຽນທຸລະກິດທີ່ເປັນນິຕິບຸກຄົນ (ASEAN Business Entity)
ຂ່າວ-ພາບ: ກົມນະໂຍບາຍການຄ້າຕ່າງປະເທດ
ຮຽບຮຽງ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ ອຄ
