ໃນຕອນເຊົ້າ ຂອງວັນທີ 24 ມີນາ 2023 ທີ່ຫ້ອງຮັບແຂກ ຊັ້ນ 4 ກະຊວງ ອຄ. ທ່ານລັດຖະມົນຕີກະຊວງອຸດສາຫະກໍາ ແລະ ການຄ້າ ຕ້ອນຮັບການເຂົ້າຢ້ຽມ ແລະ ພົບປະ ຂອງທ່ານ ຢຽນ ຢົງ ຮອງປະທານບໍລິສັດ ສວນຊາ 36, ຈຸດປະສົງເພື່ອພົບປະ ແລກປ່ຽນຄຳຄິດເຫັນນໍາກັນກ່ຽວກັບສະພາບການເຄື່ອນໄຫວ ຂອງສວນຊາ 36 ໃນປັດຈຸບັນ, ແຜນການຜະລິດ ແລະ ຈໍາໜ່າຍໃນປີ 2023 ແລະ ມອບຮັບ ຜະລິດຕະພັນສວນຊາ 36 ເພື່ອໃຊ້ສະເພາະເປັນຂອງຂວັນໃຫ້ແກ່ ການນຳຂັ້ນສູງ ແລະ ຮັບແຂກຕ່າງປະເທດ ເພື່ອນໍາໃຊ້ເປັນຂອງຝາກ-ຂອງທີ່ລະນຶກ ມີຜູ້ເຂົ້າຮ່ວມທັງ ຈໍານວນ 7 ທ່ານ.
ທ່ານ ຢຽນ ຢົງ ຮອງປະທານບໍລິສັດ ລາວ ທີຊິກ ມາເນີ ການຄ້າ ຂາອອກ- ຂາເຂົ້າ ຈຳກັດຜູ້ດຽວ (ສວນຊາ 36) ໄດ້ລາຍງານສະພາບການດໍາເນີນທຸລະກິດ ແລະ ການເຄື່ອນໄຫວຂອງບໍລິສັດ. ສວນຊາ 36 ຕັ້ງຢູ່ທີ່ບ້ານຫຼັກ 36, ເມືອງປາກຊ່ອງ ແຂວງ ຈໍາປາສັກ, ມີເນືອທີ່ທັງໝົດ 150 ເຮັກຕາ ເປັນບໍລິສັດແຫ່ງດຽວໃນ ສປປ ລາວ ທີ່ດໍາເນີນທຸລະກິດແບບຄົບວົງຈອນ. ນັບຕັ້ງແຕ່ໄດ້ຮັບການສ້າງຕັ້ງຂື້ນໃນປີ 2017 ເປັນຕົ້ນມາ ເປັນເວລາ 6 ປີ ທີ່ສວນຊາ 36 ໄດ້ສຸມທຸກເຮື່ອແຮງ ແລະ ຄວາມພະຍາຍາມ ເພື່ອສ້າງໃຫ້ຕົ້ນຊາບູຮານ ຂອງ ລາວເຮົາກາຍເປັນອີກສັນຍາລັກໜຶ່ງຂອງປະເທດລາວ, ຢຶດຖືເອົາລະບົບທໍາມະຊາດເປັນສິ່ງສໍາຄັນ, ເບິ່ງແຍງດູແລ ແລະ ອະນຸລັກຮັກສາລະບົບນິເວດຂອງຕົ້ນຊາບູຮານ ທີ່ຫາຍາກຂອງປະເທດລາວ. ຕົ້ນຊາບູຮານທໍາມະຊາດ ທີ່ມາຈາກລະບົບນິເວດທີ່ປອດສານພິດຂອງ ລາວ ໃຫ້ເປັນທີ່ຮູ້ຈັກໃນທົ່ວໂລກ, ສົ່ງເສີມການສົ່ງອອກຜະລິດຕະພັນໃບຊາ ເພື່ອຊຸກຍູ້ສົ່ງເສີມການພັດທະນາເສດຖະກິດທ້ອງຖິ່ນພາຍໃນປະເທດລາວ
ໃນປັດຈຸບັນ, ຜະລິດຕະພັນຂອງພວກເຮົາ ທີ່ໄດ້ອອກວາງຈໍາໜ່າຍຢູ່ທ້ອງຕະຫຼາດ ປະກອບມີ ຄື: ຊາແດງ, ຊາຂຽວ, ຊາຂາວ ແລະ ຊາດິບ, ໂດຍມີ 17 ຜະລິດຕະພັນ ແລະ ຍັງມີອີກ 2 ຜະລິດຕະພັນໃໝ່, ຜະລິດພັນທັງ ໝົດລ້ວນແລ້ວແຕ່ໄດ້ຜ່ານການກວດສອບ ແລະ ຮັບຮອງດ້ວຍມາດຕະຖານລະດັບສາກົນ EU ຊຶ່ງເປັນມາດຕະຖານທີ່ເຂັ້ມງວດທີ່ສຸດຂອງໂລກ ແລະ ໄດ້ຮັບໃບຢັ້ງຢືນຜະລິດຕະພັນປອດສານພິດ, ໃບຢັ້ງຢືນ GI, ໃບຢັ້ງຢືນແຫຼ່ງກໍາເນີນສິນຄ້າ, ໃບຮັບຮອງຊາຈາກປາກຊ່ອງ, ໃບຢັ້ງຢືນຕົ້ນຊາບູຮານ ແລະ ອຶ່ນໆຈາກປະເທດລາວອີກດ້ວຍ
ໃນປີ 2019 ສໍານັກງານນາຍົກລັດຖະມົນຕີ ໄດ້ມອບໃບຢັ້ງຢືນໃຫ້ເປັນຜະລິດຕະພັນຊາ ທີ່ກໍານົດໃຫ້ນໍາໃຊ້ຢ່າງເປັນທາງການ ໃນພິທີການທູດຂອງລັດຖະບານລາວ, ມາຮອດໃນປີ 2021 ໄດ້ຮັບການກໍານົດຈາກກະຊວງການຕ່າງປະເທດ ແຫ່ງ ສປປ ລາວ ໃຫ້ເປັນຊາທີ່ໃຊ້ເປັນຂອງທີ່ລະນຶກຢ່າງເປັນທາງການ ເນຶ່ອງໃນໂອກາດການສະເຫຼີມສະຫຼອງວັນສ້າງຕັ້ງສາຍພົວພັນທາງການທູດ ລາວ-ຈີນ ຄົບຮອບ 60 ປີ. ປັດຈຸບັນການຈໍາໜ່າຍຜະລິດຕະພັນສິນຄ້າຂອງສວນຊາ 36 ມີຢູ່ ສປປ ລາວ, ສປ ຈິນ, ກໍາປູເຈຍ, ສິງກະໂປ ແລະ ກຸ່ມປະເທດຕາເວັນອອກກາງ ເປັນຕົ້ນ ປະເທດ ດູໄບ
ພ້ອມດຽວກັນນັ້ນ ບໍລິສັດສວນຊາ 36 ໄດ້ມອບ-ຮັບ ຢ່າງເປັນທາງການ ສຳລັບຜະລິດຕະພັນສວນຊາ 36 ທີ່ໃຊ້ສະເພາະເປັນຂອງຂວັນໃຫ້ແກ່ ການນຳຂັ້ນສູງ ແລະ ແຂກຕ່າງປະເທດ ເພື່ອນໍາໃຊ້ເປັນຂອງຝາກ-ຂອງທີ່ລະນຶກ ລະຫວ່າງ ກະຊວງອຸດສາຫະກຳ ແລະ ການຄ້າ ແລະ ບໍລິສັດ ລາວ ທີຊິກ ມາເນີ ການຄ້າ ຂາອອກ- ຂາເຂົ້າ ຈຳກັດຜູ້ດຽວ (ສວນຊາ 36) ຈໍານວນຊາທັງໝົດ 100 ກັບ ເຊັ່ນ: 1. ມໍລະກົດປາກຊ່ອງແບບຊາທີ່ດີທີ່ສຸດ 12 ກັບ, 2.ມໍລະກົດປາກຊ່ອງແບບທ່ອງທ່ຽວ 36 ກັບ, 3. ທັບທິມແດງປາກຊ່ອງແບບທ່ອງທ່ຽວ 40 ກັບ ແລະ 4. ທັບທິມຟ້າປາກຊ່ອງ 12 ກັບ ແລະ ໄດ້ມອບໃບຍ້ອງຍໍ ແລະ ຂໍ້ຕົກລົງ ວ່າດ້ວຍ ການອະນຸມັດຮັບເອົາຜະລິດຕະພັນຊາ ໃຫ້ກັບສວນຊາ 36 ທີ່ໄດ້ປະກອບສ່ວນມອບຊາໃຫ້ລັດຖະບານ
ທ່ານລັດຖະມົນຕີກະຊວງອຸດສາຫະກໍາ ແລະ ການຄ້າ ກ່າວວ່າ ສວນຊາ 36 ເປັນສວນຊາທີ່ມີຜະລິດຕະພັນຫຼາກຫຼາຍຊະນິດ ທີ່ໄດ້ຮັບມາດຕະຖານຈາກສາກົນ ເປັນທີ່ຍອມຮັບຈາກນາໆປະເທດ ແລະ ເປັນຜະລິດຕະພັນແບບຢ່າງທີ່ມີຄຸນະພາບດີ ຈຶ່ງໄດ້ຮັບເປັນບູລິມະສິດ ຈາກລັດຖະບານ ເພື່ອນໍາໄປເປັນຂອງຂວັນຕາງໜ້າປະເທດ ເພື່ອມອບໃຫ້ແຂກຄົນສໍາຄັນພາຍໃນ ແລະ ຕ່າງປະເທດ ພ້ອມນັ້ນກໍໄດ້ຂອບໃຈມາຍັງ ບໍລິສັດ ລາວ ທີຊິກ ມາເນີ ການຄ້າ ຂາອອກ- ຂາເຂົ້າ ຈຳກັດຜູ້ດຽວ (ສວນຊາ 36) ທີ່ໄດ້ມອບຜະລິດຕະພັນຊາ ໃຫ້ກະຊວງອຸດສາຫະກໍາ ແລະ ການຄ້າ ເພື່ອເປັນຂອງທີ່ລະນຶກໃນການຕ້ອນຮັບແຂກຈາກພາຍໃນ ແລະ ຕ່າງປະເທດ.
ຂ່າວ-ພາບ: ໄພວັນ ໂຄດວັນທາ ສູນສະຖະຕິ ແລະ ຂໍ້ມູນຂ່າວສານ, ອຄ
