ຕອນບ່າຍ ເວລາ 04 : 30 ໂມງ ຂອງວັນທີ 28 ມີນາ 2023 ທີ່ຫ້ອງຮັບແຂກໃຫຍ່ຊັ້ນ 4 ກະຊວງ ອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າພົບປະ ຂອງ ທ່ານ Arai Masayoshi ຫົວໜ້າຫ້ອງການ ກະຊວງເສດຖະກິດ, ການຄ້າ ແລະ ອຸດສາຫະກໍາ ແຫ່ງປະເທດ ຍີ່ປຸ່ນ (METI) ພ້ອມຄະນະ, ມີຜູ້ຕາງໜ້າຈາກສອງຝ່າຍເຂົ້າຮ່ວມ ຈໍານວນ 09 ທ່ານ.
ໃນໂອກາດພົບປະຄັ້ງນີ້ ທ່ານລັດຖະມົນຕີ ກະຊວງ ອຄ ໄດ້ສະແດງຄວາມຍິນດີຕ້ອນຮັບ ແລະ ຂອບໃຈ,ໂດຍສະເພາະລັດຖະບານປະເທດຍີ່ປຸ່ນ ກໍ່ຄືປະຊາຊົນຍີ່ປຸ່ນ ທີ່ໄດ້ໃຫ້ການສະໜັບສະໜູນ ແລະ ຮ່ວມມືກັບ ສປປ ລາວ; ທັງສອງຝ່າຍໄດ້ປຶກສາຫາລື ກ່ຽວກັບການເພີ່ມທະວີການຮ່ວມມືດ້ານການຄ້າ, ອຸດສາຫະກຳປຸງແຕ່ງ, ການລົງທຶນຂອງປະເທດລາວ; ຊຶ່ງປະເທດຍີ່ປຸ່ນໄດ້ເປັນຄູ່ຄ້າອັນດັບທີ 7 ໃນປີ 2022 ແລະ ຜູ້ລົງທຶນໃນອັນດັບທີ 15 ຂອງ ສປປ ລາວ. ພ້ອມນີ້, ທ່ານ Arai Masayoshi ໄດ້ປືກສາຫາລືວຽກງານ ກ່ຽວກັບການຮ່ວມມືດ້ານເສດຖະກິດ, ການຄ້າ ແລະ ອຸດສາຫະກຳ; ແຜນການສະເຫລີມສະຫລອງການຮ່ວມມື ອາຊຽນ-ຍີ່ປຸ່ນ ຄົບຮອບ 50 ປີ ແລະ ບັນຫາອື່ນໆທີ່ກ່ຽວຂ້ອງ ເພື່ອໃຫ້ເກີດຜົນປະໂຫຍດທີ່ດີ ໃຫ້ແກ່ສອງປະເທດ. ນອກຈາກນີ້, ທ່ານຫົວໜ້າຫ້ອງການກໍ່ສະແດງຄວາມຂອບໃຈຕໍ່ທ່ານ ລັດຖະມົນຕີ ກະຊວງ ອຄ ທີ່ໄດ້ເສຍສະຫລະເວລາ ໃນການພົບປະຄັ້ງນີ້ ແລະ ໃຫ້ການຕ້ອນຮັບຢ່າງອົບອຸ່ນດ້ວຍໄມຕີຈິດມິດຕະພາບ.
ຕອນທ້າຍ ທ່ານລັດຖະມົນຕີ ໄດ້ສະແດງຄວາມຂອບໃຈ ຕໍ່ທ່ານຫົວໜ້າຫ້ອງການ ພ້ອມທັງອວຍພອນໄຊໃຫ້ທ່ານພ້ອມຄະນະ ເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ປະສົບຜົນສໍາເລັດໃນໜ້າທີ່ການງານ; ສອງປະເທດຈະສືບຕໍ່ການສະໜັບສະໜູນ, ແລກປ່ຽນຂໍ້ມູນຂ່າວສານຊຶ່ງກັນ ແລະ ກັນ ແລະ ການຮ່ວມມືເພື່ອເສີມຂະຫຍາຍການຄ້າ ແລະ ການລົງທຶນໃຫ້ນັບມື້ນັບດີຂຶ້ນ. ນອກຈາກນີ້, ທ່ານລັດຖະມົນຕີຍັງໄດ້ມອບຂອງຂວັນຜະລິດຕະພັນຊາຂອງລາວ ໃຫ້ແກ່ທ່ານຫົວໜ້າຫ້ອງການ ເພື່ອເປັນການໂຄສະນາສິນຄ້າຜະລິດຈາກປະເທດລາວໃຫ້ບັນດາປະເທດໄດ້ຮັບຮູ້ ຢ່າງກວ້າງຂວາງ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ, ກຊ ອຄ
