ໃນວັນທີ 26 ເມສາ ຂອງທຸກໆປີ ບັນດາປະເທດສະມາຊິກຂອງ ອົງການຊັບສິນທາງປັນຍາໂລກ ລວມທັງ ສປປ ລາວ ມີຈໍານວນ 193 ປະເທດ ກໍໄດ້ມີການຈັດພິທີໂຮມຊຸມນຸມກັນ ເພື່ອສະເຫຼີມສະຫຼອງວັນຊັບສິນທາງປັນຍາ ໃນແຕ່ລະປີ, ຊຶ່ງປີນີ້ພາຍໃຕ້ຄໍາຂັວນ “ບົດບາດແມ່ຍິງ ແລະ ຊັບສິນທາງປັນຍາ: ຊຸກຍູ້ສົ່ງເສີມ ນະວັດຕະກຳ ແລະ ຄວາມຄິດສ້າງສັນໃໝ່ (Women and IP: Accelerating innovation and creativity)” ໂດຍການໃຫ້ກຽດເປັນປະທານເປີດພິທີ ຂອງ ທ່ານ ນ ຈັນສຸກ ແສງພະຈັນ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ທ່ານ ນ ທຳມາ ເພັດວິໄຊ, ຮອງປະທານສູນກາງສະຫະພັນແມ່ຍິງລາວ. ງານດັ່ງກ່າວຈັດຂຶ້ນທີ່ ສວນປະຕູໄຊ ນະຄອນຫຼວງວຽງຈັນ; ມີທ່ານ ສັນຕິສຸກ ພູນສະຫວັດ, ຫົວໜ້າກົມຊັບສິນທາງປັນຍາ ອຄ, ມີບັນດາຫົວໜ້າຫ້ອງການ, ກົມ, ສະຖາບັນ, ພະນັກງານຂອງ ກະຊວງ ອຄ, ມີຜູ້ຕາງໜ້າສູນກາງສະຫະພັນແມ່ຍິງລາວ, ຕາງໜ້າຈາກກະຊວງອ້ອມຂ້າງ ແລະ ມີຄູອາຈານ-ນັກສຶກສາຈາກມະຫາວິທະຍາໄລແຫ່ງຊາດ, ສະມາຄົມນັກທຸລະກິດຍິງ ແລະ ຜູ້ປະກອບການ ເຂົ້າຮ່ວມ 200 ກວ່າທ່ານ;

ໃນໂອກາດນີ້ ທ່ານ ຮອງລັດຖະມົນຕີ ກະຊວງ ອຄ ໄດ້ກ່າວເປີດພິທີໃນຄັ້ງນີ້ວ່າ: ຈຸດປະສົງຂອງການສະເຫຼີມສະຫຼອງວັນຊັບສິນທາງປັນຍາໂລກ ເພື່ອເຜີຍແຜ່ວຽກງານຊັບສິນທາງປັນຍາ ໂດຍສະເພາະຍົກສູງບົດບາດຄວາມສຳຄັນຂອງການປົກປ້ອງສິດຊັບສິນທາງປັນຍາ ໃຫ້ແກ່ສາທາລະນະຊົນໄດ້ຮັບຮູ້ ແລະ ເຫັນໄດ້ເຖິງຄວາມສຳຄັນຂອງວຽກງານດັ່ງກ່າວ ເປັນຕົ້ນ ແມ່ນການຊຸກຍູ້ສົ່ງເສີມ ການສ້າງນະວັດຕະກຳ ແລະ ຄວາມຄິດສ້າງສັນໃໝ່ໆ ທີ່ອອກສູ່ສາຍຕາມວນຊົນ ກໍຄື ສັງຄົມ, ແມ່ຍິງລາວໃນຍຸກໃໝ່ ຍັງມີຜົນງານທີ່ເກີດຈາກຄວາມຄິດສ້າງສັນໃນຫຼາຍດ້ານ ບໍ່ວ່າຈະຢູ່ຂົງເຂດເສດຖະກິດ, ວັດທະນະທຳສັງຄົມ, ຜົນງານການຄົ້ນຄວ້າ ແລະ ການປະດິດຄິດແຕ່ງ ເປັນຕົ້ນບົດຟ້ອນ, ບົດລໍາ ແລະ ການສະແດງສິນລະປະຕ່າງໆ ທີ່ຊີ້ໃຫ້ເຫັນເຖິງພູມປັນຍາທີ່ເປັນເອກກະລັກແມ່ນມີຄວາມພົ້ນເດັ່ນ; ແມ່ຍິງລາວມີບົດບາດໃນການສ້າງສັນງານຫັດຖະກໍາທີ່ມີຄວາມປານີດ ແລະ ງົດງາມ ເຊັ່ນ: ລາຍຜ້າໄໝມ້ອນ, ເຄື່ອງປະດັບທີ່ເຮັດຈາກໄໝ ແລະ ອຶ່ນໆອີກ ຊຶ່ງສິ່ງຕ່າງໆເຫຼົົ່ານີ້ລ້ວນແຕ່ແມ່ນຊັບສິນທາງປັນຍາທີ່ເກີດມາຈາກແນວຄິດສ້າງສັນ ທີ່ກາຍເປັນເອກກະລັກອັນພົ້ນເດັ່ນ ແລະ ເປັນທີ່ຮັບຮູ້ຢ່າງກວ້າງຂວາງໃນລະດັບໂລກ. ຄຽງຄູ່ກັນນັ້ນ ແມ່ຍິງໃນ ສປປ ລາວແມ່ນນັບມື້ນັບມີທ່າຂະຫຍາຍຕົວ ແລະ ມີບົດບາດສຳຄັນໃນລະດັບພາກພື້ນ ແລະ ສາກົນ;

ພ້ອມດຽວກັນນັ້ນ ທ່ານຮອງປະທານສູນກາງສະຫະພັນແມ່ຍິງລາວ, ໄດ້ມີຄໍາເຫັນຕໍ່ພິທີດັ່ງກ່າວວ່າ: ສູນກາງສະຫະພັນແມ່ຍິງ ແມ່ນໄດ້ຈັດຕັ້ງປະຕິບັດແຜນວິໄສທັດ, ຍຸດທະສາດ ແລະ ແຜນພັດທະນາແມ່ຍິງ ແຫ່ງຊາດ (2021-2025) ຝຶກອົບຮົມສ້າງວິຊາອາຊີບ, ວຽກເຮັດງານທໍາໃຫ້ແມ່ຍິງດ້ອຍໂອກາດ, ສົ່ງເສີມການເຂົ້າເຖິງແຫຼ່ງທຶນ ແລະ ສະໜອງການບໍລິການດ້ານການເງິນໃຫ້ແກ່ແມ່ຍິງ ແລະ ຄອບຄົວ; ຍົກລະດັບຄວາມຮູ້ຄວາມສາມາດໃນການສ້າງທຸລະກິດຂະໜາດນ້ອຍ ແລະ ກາງ ໃຫ້ທ້ອງຖິ່ນ ເພື່ອໃຫ້ສະພາບເສດຖະກິດ ແລະ ສະພາບຊີວິດການເປັນຢູ່ຂອງເຂົາເຈົ້ານັບມື້ນັບດີຂຶ້ນ, ແລະ ໃນປີ 2019 ທີ່ຜ່ານມາ ແມ່ຍິງລາວຈຳນວນ 10 ທ່ານ ແມ່ນໄດ້ຮັບລາງວັນຜູ້ປະກອບການແມ່ຍິງອາຊຽນດີເດັ່ນອີກດ້ວຍ. ອີກດ້ານໜຶ່ງ, ໃນສາກົນ ກໍມີຫລາຍທ່ານທີ່ເປັນຜູ້ມີຊື່ສຽງ ແລະ ມີຜົນງານທີ່ເປັນແມ່ຍິງ ເປັນຕົ້ນ, ນັກເຄມີສາດທີ່ໄດ້ເພີ່ມສູດຄິດໄລ່ລົງໃສ່ດິນໜຽວ ເມໂຊໂປເຕມຽນ ຫຼາຍກວ່າ 3.000 ປີກ່ອນ ກໍໍແມ່ນແມ່ຍິງ. ທ່ານອຳນວຍການໃຫຍ່ຂອງອົງການຊັບສິນທາງປັນຍາໂລກຍັງໃຫ້ຮູ້ຕື່ມວ່າ: ‘ວິໄສທັດຂອງພວກເຮົາ ແມ່ນເພື່ອສ້າງສະພາບແວດລ້ອມດ້ານຊັບສິນທາງປັນຍາໂລກໃຫ້ມີສ່ວນຮ່ວມຢ່າງກວ້າງຂວາງ-ໜຶ່ງໃນວິໄສທັດແມ່ນ ບັນດາແມ່ຍິງ, ໄວໜຸ່ມ ແລະ ວິສາຫະກິດຂະໜາດນ້ອຍ ແລະ ກາງ ເປັນຈຸດສູນກາງ’. ໃນປີນີ້, ວັນຊັບສິນທາງປັນຍາໂລກ, ການສະເຫຼີມສະຫຼອງຜົນສຳເລັດຂອງຜູ້ປະດິດສ້າງ, ຜູ້ສ້າງສັນ ແລະ ຜູ້ປະກອບການແມ່ຍິງ ໄປພ້ອມກັນກັບການເຊີນຊວນ ແມ່ຍິງ ແລະ ໄວໜຸ່ມຍິງ ຈາກທົ່ວທຸກມຸມໂລກ ໃຫ້ນໍາໃຊ້ຊັບສິນທາງປັນຍາຫຼາຍຂຶ້ນ ເພື່ອນໍາເອົາຄວາມຄິດສ້າງສັນຂອງພວກເຂົາໃຫ້ມີຊີວິດຊີວາຍິ່ງຂຶ້ນ;

ພາຍຫຼັງທ່ານ ຮອງລັດຖະມົນຕີ ກະຊວງ ອຄ ແລະ ທ່ານຮອງປະທານສູນກາງສະຫະພັນແມ່ຍິງລາວ ໄດ້ມີຄໍາເຫັນແລ້ວ ກໍຂຶ້ນຕັດແຖບຜ້າເພື່ອເປີດງານສະເຫຼີມສະຫຼອງວັນຊັບສິນທາງປັນຍາໂລກ ຄົບຮອບ 23 ປີ (ວັນທີ 26 ເມສາ 2023) ນອກຈາກງານສະເຫຼີມສະຫຼອງວັນຊັບສິນທາງປັນຍາໂລກ ແມ່ນມິຫຼາຍກິດຈະກໍາປິ່ນອ້ອມ ໂດຍສະເພາະຈັດສຳມະນາວຽກງານຊັບສິນທາງປັນຍາ ໃນພາກເຊົ້າ ຢູ່ກະຊວງອຸດສາຫະກຳ ແລະ ການຄ້າ ແລະ ໃນພາກຄໍ່າ ກໍມີກິດຈະກຳ ສາທິດຫຸ່ນຍົນ, ການສະແດງສິນລະປະວັນນະຄະດີ ແລະ ເປີດໄຟແສງສີສຽງ ທີ່ສວນປະຕູໄຊອີກດ້ວຍ.

ຂ່າວ-ພາບ:  ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ ອຄ