ໃນຕອນບ່າຍເວລາ 4:00 ໂມງ ຂອງວັນທີ 27 ເມສາ 2023, ທີ່ຫ້ອງຮັບແຂກໃຫຍ່ ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ປອ. ມະໂນທອງ ວົງໄຊ ຮອງລັດຖະມົນຕີ ກະຊວງອຸດາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ LEE Hyuk ແລະ ທ່ານ KIM Hong Koo, ທູດພິເສດ ຂອງລັດຖະມົນຕີ ກະຊວງການຕ່າງປະເທດ ສາທາລະນະລັດ ເກົາຫລີ ພ້ອມຄະນະ; ໃນໂອກາດເຂົ້າພົບປະ ທ່ານຮອງ ລັດຖະມົນຕີ ເພື່ອປຶກສາຫາລືທົບທວນຄືນດ້ານການຄ້າ-ການລົງທຶນພື້ນຖານໂຄງລ່າງ; ເປັນກຽດເຂົ້າຮ່ວມມີບັນດາ ທ່ານຫົວໜ້າ-ຮອງຫົວໜ້າກົມ ກ່ຽວຂ້ອງອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 14 ທ່ານ.
ໂອກາດນີ້ ທ່ານ ປອ. ມະໂນທອງ ວົງໄຊ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍຊົມເຊີຍຕໍ່ ທ່ານ LEE Hyuk ແລະ ທ່ານ KIM Hong Koo, ຕາງໜ້າສະຖານເອກອັກຄະລັດຖະທູດ ແຫ່ງສາທາລະນະລັດ ເກົາຫລີ ປະຈໍາ ສປປ ລາວ ໃນໂອກາດເຂົ້າຢ້ຽມຂໍ່ານັບຄັ້ງນີ້ ທ່ານທູດພິເສດ ຂອງ ສະຖານທູດ ສ. ເກົາຫລີ ໄດ້ສົນທະນາກ່ຽວກັບວຽກງານການຮ່ວມມື ລະຫວ່າງ ສປປ ລາວ- ສ. ເກົາຫລີ ທີ່ມີການພົວພັນເສີມສ້າງມິດຕະພາບທີ່ດີໃນໄລຍະຜ່ານມາ ເປັນຕົ້ນດ້ານການຄ້າ, ການລົງທຶນ ແລະ ດ້ານເສດຖະກິດ ລະຫວ່າງ ສອງປະເທດ ໃນນີ້: ມູນຄ່າການຄ້າສອງຝ່າຍນັບແຕ່ປີ 2020-2022 ສາມາດປະຕິບັດໄດ້ໃນມູນຄ່າ 84,4 ລ້ານໂດລາສະຫະລັດ, ໃນນັ້ນ ມູນຄ່າການນໍາເຂົ້າ ປະຕິບັດໄດ້ 63,2 ລ້ານໂດລາສະຫະລັດ, ມູນຄ່າການສົ່ງອອກປະຕິບັດໄດ້ 21,1 ລ້ານໂດລາສະຫະລັດ. ສິນຄ້າຫຼັກທີ່ ສປປ ລາວ ນໍາເຂົ້າປະກອບມີ: ພະຫະນະທາງບົກ ແລະ ສິ້ນສ່ວນອາໄຫຼ່, ລົດຈັກ ລວມທັງຢາງ, ແວ່ນ, ໂສ້ລົດ, ເຄື່ອງນຸ່ງຫົ່ມ, ອຸປະກອນກົນຈັກ, ສິ່ງເສດເຫຼືອຈາກອຸດສາຫະກໍາຜະລິດອາຫານເສີມ, ອາຫານສັດ, ເຄື່ອງໄຟຟ້າ ແລະ ສິນຄ້າ ອື່ນໆ. ສິນຄ້າຫຼັກທີ່ ສປປ ລາວ ສົ່ງອອກ ປະກອບມີ: ເຄື່ອງມື, ເຄື່ອງນຸ່ງຫົ່ມ, ກາເຟເມັດ, ນໍ້າຕານ, ເກືອກາລີ, ຖ່ານດໍາ, ຖ່ານຂາວ, ເກີບ, ເຄື່ອງກິລາ, ຜະລິດຕະພັນທາງເຄມີ ແລະ ສິນຄ້າອື່ນໆ. ນອກຈາກນີ້ທັງສອງຝ່າຍຍັງແລກປ່ຽນຄໍາຄິດຄໍາເຫັນຢ່າງກົງໄປກົງມາໃນຫຼາຍດ້ານ ເພື່ອຊອກຫາທາງອອກໃນອະນາຄົດ ໃຫ້ໄດ້ປັບປຸງວຽກງານການຮ່ວມມືຂອງສອງຝ່າຍໃນຕໍ່ໜ້າ ເພື່ອເຮັດໃຫ້ສິນຄ້ານໍາເຂົ້າ ແລະ ສົ່ງອອກ ເພີ່ມໃຫ້ຫຼາຍຂຶ້ນກວ່າເກົ່າ.
ພ້ອມດຽວກັນນີ້, ທ່ານ LEE Hyuk ແລະ ທ່ານ KIM Hong Koo, ຕາງໜ້າສະຖານທູດ ສ. ເກົາຫລີ ປະຈໍາ ສປປ ລາວ ໄດ້ສະແດງຄວາມຂອບໃຈຕໍ່ທ່ານຮອງລັດຖະມົນຕີ ທີ່ໄດ້ໃຫ້ການຕ້ອນຮັບ ແລະ ໃຫ້ການຮ່ວມມື ລະຫວ່າງ ສປປ ລາວ – ສະຖານທູດ ສ. ເກົາຫລີ ແລະ ອຳນວຍຄວາມສະດວກໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດສູງສຸດໃຫ້ແກ່ສອງປະເທດໃນຕໍ່ໜ້າ; ແລະ ທ່ານຮອງລັດຖະມົນຕີ ໄດ້ມອບກະຕ່າຜະລິດຕະພັນສິນຄ້າຂອງລາວ ໃຫ້ແກ່ທ່ານທູດພິເສດ ເພື່ອເປັນການໂຄສະນາສິນຄ້າທີ່ຜະລິດໃນລາວ ໃຫ້ຕ່າງປະເທດໄດ້ຮັບຮູ້ຢ່າງກ້ວາງຂວາງ.
ຂ່າວໂດຍ: ທ ໄພຄໍາອີ ວິໄລຄໍາ ສູນສະຖິຕິ ແລະ ຂໍ້ມູນຂ່າວສານ ກຜຮ
ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
