ໃນລະຫວ່າງວັນທີ 6-7 ພຶດສະພາ 2023 ຜ່ານມາ, ທ່ານ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ນໍາພາຄະນະຜູ້ແທນ ສປປ ລາວ ເຂົ້າຮ່ວມກອງປະຊຸມສະພາປະຊາຄົມເສດ ຖະກິດອາຊຽນ ຄັ້ງທີ 22 (AEC Council Meeting) ທີ່ຈາກາຕ້າ, ປະເທດ ອິນໂດເນເຊຍ ພາຍໃຕ້ການເປັນປະທານຂອງ ທ່ານ Airlangga Hartarto, ລັດຖະມົນຕີກະຊວງປະສານງານດ້ານການພົວພັນເສດຖະກິດ ອິນໂດເນເຊຍ ໃນຖານະປະທານອາຊຽນ ໃນປີ 2023 ໂດຍມີລັດຖະມົນຕີ ສະພາປະຊາຄົມເສດຖະກິດອາເຊຽນ, ລັດຖະມົນຕີ ກະຊວງປະສານງານດ້ານການພົວພັນເສດຖະກິດ ຕີມໍເລສເຕ (ໃນນາມຜູ້ສັງເກດການ) ແລະ ທ່ານເລຂາທິການໃຫຍ່ອາຊຽນ ເຂົ້າຮ່ວມ

ຈຸດປະສົງ ຂອງກອງປະຊຸມຄັ້ງນີ້ ແມ່ນເພື່ອປຶກສາຫະລື ແລະ ແລກປ່ຽນຄໍາຄິດເຫັນກ່ຽວກັບການ ຈັດຕັ້ງປະຕິບັດບັນດາໜ້າວຽກພາຍໃຕ້ເສົາຄໍ້າປະຊາຄົມເສດຖະກິດອາຊຽນ ເພື່ອກະກຽມໃຫ້ແກ່ກອງປະຊຸມສຸດຍອກອາຊຽນ ຄັ້ງທີ 42 ແລະ ກອງປະຊຸມສຸດຍອດທີ່ກ່ຽວຂ້ອງ ທີ່ຈະຈັດຂື້ນໃນລະຫວ່າງວັນທີ 9-11 ພຶດສະພາ 2023 ທີ່ ລາບວນບາໂຈ, ອິນໂດເນເຊຍ

ຜ່ານການເຂົ້າຮ່ວມກອງປະຊຸມ ສະພາປະຊາຄົມເສດຖະກິດອາເຊຽນ ຄັ້ງທີ 22 ໃນຄັ້ງນີ້, ບັນດາລັດຖະມົນຕີເສດຖະກິດອາຊຽນ ລວມທັງ ສປປ ລາວ ໄດ້ຮັບຊາບຄວາມຄືບໜ້າກ່ຽວກັບການຈັດຕັ້ງບັດບັນດາແຜນວຽກບູລິມະສິດພາຍໃຕ້ເສົາຄໍ້າປະຊາຄົມເສດຖະກິດອາຊຽນ ທີ່ສະເໜີໃຫ້ອິນໂດເນເຊຍ ໃນນາມປະທານອາຊຽນ ປີ 2023, ຄວາມຄືບໜ້າຂອງການຈັດຕັ້ງປະຕິບັດແຜນແມ່ບົດປະຊາຄົມເສດຖະກິດອາຊຽນ 2025 ແລະ ການກໍານົດວິໄສທັດ ປະຊາຄົມເສດຖະກິດອາຊຽນ ພາຍຫັຼງປີ 2025 ຫາ ປີ 2035. ນອກນັ້ນຍັງໄດ້ປຶກສາຫາລືກ່ຽວກັບວາລະຄວາມຢືນຍົງໃນອາຊຽນ ໂດຍສະເພາະການພັດທະນາລະບົບນິເວດຂອງການນໍາໃຊ້ລົດໄຟຟ້າໃນພາກພື້ນ, ການຫັນເປັນດີຈີຕອນອາຊຽນ, ການສ້າງຍຸດທະສາດການຫຼຸດຜ່ອນອາຍກາກໂບນິກອາຊຽນ ແລະ ແຜນງານສໍາລັບການເຂົ້າເປັນສະມາຊິກຂອງປະເທດ ຕີມໍເລສເຕ ແລະ ອຶ່ນໆ

ໃນໂອກາດເຂົ້າຮ່ວມກອງປະຊຸມຄັ້ງນີ້ ທ່ານ ມະໂນທອງ ວົງໄຊ ຮອງລັດຖະມົນຕີ ອຄ, ສປປ ລາວຍັງໄດ້ພົບປະສອງຝ່າຍ (ແບບບໍ່ເປັນທາງການ) ກັບທ່ານ Kao Kim Hourn  ເລຂາທິການໃຫຍ່ອາຊຽນ ເພື່ອປຶກສາຫາລືກ່ຽວກບການກະກຽມໃນການເປັນປະທານອາຊຽນຂອງ ສປປ ລາວ ໃນປີ 2024 ໂດຍສະເພາະການກໍານົດແຜນວຽກບູລິມະສິດພາຍໃຕ້ເສົາຄໍ້າເສດຖະກິດອາຊຽນສໍາລັດປີ 2024 ແລະ ການປະກອບພັນທະດ້ານງົບປະ ມານເຄື່ອນໄຫວໃຫ້ແກ່ ກອງເລຂາຊ່ວຍວຽກສໍາລັດການຈັດຕັ້ງປະຕິບັດສັນຍາຄູ່ຮ່ວມມືເສດຖະກິດແບບຮອບດ້ານພາກພື້ນ (RCEP)

ຂໍ້ມູນຂ່າວ ແລະ ພາບ: ຈາກກົມນະໂຍບາຍການຄ້າຕ່າງປະເທດ

ກວດແກ້: ໄພວັນ ໂຄດວັນທາ ສຸນສະຖິຕິ ແລະ ຂໍ້ມູນຂ່າວສານ, ອຄ