ໃນລະຫວ່າງວັນທີ 30 ພຶດສະພາ – 2 ມິຖຸນາ 2023, ທ່ານ ມະໄລທອງ ກົມມະສິດ, ລັດຖະມົນຕີກະຊວງອຸດສາຫະກໍາ ແລະ ການຄ້າ (ອຄ) ໄດ້ລົງເຄື່ອນໄຫວວຽກງານຢູ່ແຂວງຄຳມ່ວນ ແລະ ບໍລິຄຳໄຊ. ຈຸດປະສົງຕົ້ນຕໍແມ່ນເພື່ອຕິດຕາມ ແລະ ຊຸກຍູ້ວຽກງານການຜະລິດຢູ່ 2 ແຂວງດັ່ງກ່າວ ເປັນການປະກອບສ່ວນເຂົ້າໃນການປະຕິບັດ ວາລະແຫ່ງຊາດວ່າດ້ວຍການແກ້ໄຂຂໍ້ຫຍູ້ງຍາກທາງດ້ານເສດຖະກິດ-ການເງິນ.
ໃນວັນທີ 31 ພຶດສະພາ 2023 ທ່ານລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດ້ວຍຄະນະ ໄດ້ເຂົ້າຢ້ຽມຂ່ຳນັບທ່ານເຈົ້າແຂວງແຂວງຄຳມ່ວນ ເພື່ອປຶກສາຫາລື ແລະ ແລກປ່ຽນຄວາມຄິດເຫັນກ່ຽວກັບການພັດທະນາວຽກງານພັດທະນາເສດຖະກິດສັງຄົມ ກໍຄື ວຽກອຸດສາຫະກຳ-ການຄ້າຂອງແຂວງ. ພ້ອມກັນນັ້ນ, ຍັງໄດ້ເຂົ້າຮ່ວມພິທີສະເຫລີມສະຫລອງ ການທົດສອບການຜະລິດ ໂບຣມມິນບັນລຸ 10.000 ໂຕນ ຂອງບໍລິສັດ ຊີໂນອາກຣີໂປຕັສ ຈຳກັດ, ເຄື່ອນໄຫວຢ້ຽມຢາມຄວາມຄືບຫນ້າ ແລະ ແຜນການກໍ່ສ້າງໂຮງກັ່ນນ້ຳມັນບໍລິສັດ ພັດທະນາ ພະລັງງານລາວ ຈຳກັດ, ເຄື່ອນໄຫວຊີ້ນຳວຽກງານກວດສອບຄຸນນະພາບນ້ຳມັນຢູ່ຈຸດດ່ານຂົວມິດຕະພາບລາວ-ໄທ 3 ແລະ ລົງຢ້ຽມຢາມຄອບຄົວຜະລິດແຈ່ວປາແດກແຊບ ແມ່ພອນທິບ ທີ່ປະຈຸບັນໄດ້ນຳເອົາຜະລິດຕະພັນປາແດກມາປຸງແຕ່ງເປັນແຈ່ວຫລາຍປະເພດ ເພື່ອສົ່ງຂາຍທັງພາຍໃນ ແລະ ຕ່າງປະເທດ.
ໃນວັນທີ 1-2 ມິຖຸນາ 2023 ທ່ານ ລັດຖະມົນຕີ ພ້ອມຄະນະໄດ້ເຄື່ອນໄຫວເຮັດວຽກຢູ່ ແຂວງບໍລິຄຳໄຊ. ໃນໂອກາດດັ່ງກ່າວ ໄດ້ເຂົ້າຢ້ຽມຂ່ຳນັບປະທ່ານ ເຈົ້າແຂວງແຂວງບໍລິຄຳໄຊ ເພື່ອປຶກສາຫາລື ແລະ ແລກປ່ຽນຄວາມຄິດເຫັນກ່ຽວກັບການພັດທະນາວຽກງານພັດທະນາເສດຖະກິດສັງຄົມ ກໍຄືວຽກອຸດສາຫະກຳ ແລະ ການຄ້າຂອງແຂວງບໍລິຄຳໄຊ. ພ້ອມກັນນ້ັນ, ຄະນະຍັງໄດ້ຢ້ຽມຢາມໂຄງການກໍ່ສ້າງຂົວມິດຕະພາບລາວ-ໄທແຫ່ງທີ 5, ຈຸດກວດສອບນ້ຳມັນເຊື້ອໄຟ, ຟາມຫມູ ບ້ານຫາດຊາຍສູງ ແລະ ສູນບໍລິການ SME ຢູ່ສະພາການຄ້າ ແລະ ອຸດສາຫະກຳແຂວງບໍລິຄຳໄຊ.
ການເຄື່ອນວຽກງານຢູ່ 2 ແຂວງ ຄັ້ງນີ້, ທ່ານລມຕ ພ້ອມດ້ວຍຄະນະ ນອກຈາກຈະໄດ້ແລກປ່ຽນຄວາມຄິດຄຳເຫັນ ແລະ ຖອດຖອນບົດຮຽນກ່ຽວກັບການເສດຖະກິດ-ສັງຄົມ ແລະ ການພັດທະນາວຽກງານອຸດສາຫະກຳ ແລະ ການຄ້າ ຮ່ວມກັບການນຳສູງສຸດຂອງ 2 ແຂວງແລ້ວ, ການປະຕິບັດຫນ້າທີ່ຂອງພະນັກງານຂະແຫນງອຸດສາຫະກຳ ແລະ ການຄ້າ ຍັງໄດ້ລົງຢ້ຽມຢາມສະຖານທີ່ການຜະລິດຕົວຈິງ ຊຶ່ງໄດ້ແລກປ່ຽນສະພາບການດຳເນີນການຜະລິດຂອງຫົວຫນ່ວຍທຸລະກິດ ແລະ ຊີ້ນຳການຈັດຕັ້ງປະຕິບັດວຽກງານຢ່າງກົງໄປກົງມາ ແລະ ເປັນປະໂຫຍດໃຫ້ແກ່ການພັດທະນາວຽກລັດ ແລະ ການດຳເນີນທຸລະກິດຂອງວິສາຫະກິດ. ພິເສດ, ການເຄື່ອນໄຫວຄັ້ງນີ້, ທ່ານ ລມຕ ກະຊວງອຄ ແລະ ທ່ານ ເຈົ້າແຂວງບໍລິຄຳໄຊໄດ້ເຫັນດີເປັນເອກະພາບຮັດແຫນ້ນການພົວພັນຮ່ວມມືດ້ານອຸດສາຫະກຳ ແລະ ການຄ້າໃຫ້ແຫນ້ນແຟ້ນ ແລະ ເປັນຮູບປະທຳຫລາຍກວ່າເກົ່າໂດຍມີແຜນຈະລົງນາມບົດບັນທຶກຮ່ວມມືກັນໃນໄວໄວນີ້.
ແຫລ່ງຂ່າວ ແລະ ພາບໂດຍ: ຫ້ອງການ ກະຊວງ ອຄ
ລົງຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ
