ໃນວັນທີ 08 ມິຖຸນາ 2023 ຜ່ານມາ, ຢູ່ທີ່ຫ້ອງປະຊຸມທາງໄກ ຂອງກະຊວງອຸດສາຫະກໍາ ແລະ ການຄ້າ, ກົມກວດກາ ໄດ້ຈັດກອງປະຊຸມທາງໄກ ເພື່ອສະຫູຸບປະຈໍາປີ ແລະ ການແກ້ໄຂຜົນຂອງການກວດກາປົກກະຕິ ປະຈໍາປີ 2022, ໃຫ້ກຽດເປັນທານໂດຍທ່ານ ນ. ຈັນສຸກ ແສງພະຈັນ, ຮອງເລຂາຄະນະພັກກະຊວງ, ຮອງລັດຖະມົນຕີ ກະຊວງ ອຄ, ມີບັນດາສະຫາຍເລຂາ, ຮອງເລຂາຄະນະໝ່ວຍພັກບັນດາກົມກອງອ້ອມຂ້າງກະຊວງ ອຄ ແລະ ບັນດາພະແນກອຸດສາຫະກຳ ແລະ ການຄ້າແຂວງ, ນະຄອນຫຼວງ ພ້ອມດ້ວຍພະນັກງານວິຊາການທີ່ກ່ຽວຂ້ອງເຂົ້າຮ່ວມ

ໄລຍະໜຶ່ງປີທີ່ຜ່ານມາ 2022 ກົມກວດກາ ໄດ້ລົງເຄື່ອນໄຫວຕິດຕາມ, ກວດກາ ແລະ ຊຸກຍູ້ວຽກງານກວດກາຕາມພາລະບົດບາດ, ສິດ ແລະ ໜ້າທີ່ ຢູ່ຂັ້ນສູນກາງ ແລະ ທ້ອງຖິ່ນ ກໍ່ຄືການລົງເຄື່ອນໄຫວກວດກາປົກກະຕິ ປະຈໍາປີ 2022 ຢູ່ທ້ອງຖິ່ນ (ບັນດາພະແນກອຸດສາຫະກໍາ ແລະ ການຄ້າ ແຂວງ ແລະ ນະຄອນຫຼວງວຽງຈັນ) ຜ່ານການລົງຕິດຕາມ, ກວດກາ ແລະ ຊຸກຍູ້ ໄດ້ຮັບຂໍ້ສະເໜີຈາກທ້ອງຖິ່ນ ທີ່ສະເໜີຫາບັນດາກົມກອງອ້ອມຂ້າງ ກະຊວງ ອຄ ທີ່ຍັງບໍ່ທັນມີຄວາມກະຈ່າງແຈ້ງໃນການຈັດຕັ້ງປະຕິບັດວຽກງານວິຊາສະເພາະ ເພື່ອໃຫ້ມີຄວາມເປັນເອກະພາບ ແລະ ເຂົ້າໃຈໃນການຈັດ ຕັ້ງປະຕິບັດວຽກງານຂອງຂະແໜງອຸດສາຫະກໍາ ແລະ ການຄ້າ ລະຫວ່າງສູນກາງ ແລະ ທ້ອງຖິ່ນ

ນອກນັ້ນ, ກອງປະຊຸມຍັງໄດ້ຮັບຟັງການປະກອບຄໍາເຫັນຊີ້ແຈງ ແລະ ໃຫ້ຄວາມກະຈ່າງແຈ້ງຕໍ່ບັນດາຂໍ້ສະເໜີ ຂອງບັນດາພະແນກອຸດສາຫະກໍາ ແລະ ການຄ້າ ແຂວງ, ນະຄອນຫຼວງ ທີ່ໄດ້ຈັດຕັ້ງປະຕິບັດບັນດາກົດໝາຍ, ລະບຽບການ ແລະ ນິຕິກໍາຕ່າງໆຂອງຂັ້ນເທິງກໍ່ຄືກະຊວງ ວາງອອກໃນແຕ່ລະໄລຍະທີ່ຕິດພັນກັບພາລະບົດບາດ ແລະ  ຄວາມຮັບຜິດຊອບຂອງບັນດາກົມ, ຫ້ອງການກະຊວງ ແລະ ບັນດາຂະແໜງການຢູ່ບັນດາພະແນກອຸດສາຫະກໍາ ແລະ ການຄ້າ ແຂວງ, ນະຄອນຫຼວງ ຊຶ່ງກອງປະຊຸມໄດ້ເປັນເອກະພາບຕໍ່ຜົນສໍາເລັດ, ດ້ານດີ, ດ້ານອ່ອນ-ຂໍ້ຄົງຄ້າງ ແລະ ບົດຮຽນໃນການຈັດຕັ້ງປະຕິບັດວຽກງານຜ່ານມາ ພ້ອມທັງມີຄວາມເປັນເອກະພາບຕໍ່ການປະກອບຄໍາເຫັນຊີ້ແຈງ ແລະ ໃຫ້ຄວາມກະຈ່າງແຈ້ງຂອງແຕ່ລະກົມ ເພື່ອເປັນບ່ອນອີງໃຫ້ແກ່ການຈັດຕັ້ງປະຕິບັດໃນຕໍ່ໜ້າໃຫ້ມີຄວາມເປັນເອກະພາບໃນທົ່ວຂະແໜງອຸດສາຫະກໍາ ແລະ ການຄ້າ

ສະນັ້ນ, ການຍົກສູງປະສິດທິພາບຂອງວຽກງານຕິດຕາມ, ກວດກາ ຈຶ່ງຂໍໃຫ້ເປັນຄວາມຮັບຜິດ ຊອບໂດຍກົງຂອງຄະນະພັກທຸກຂັ້ນ ໃນການຍົກສູງຄວາມສາມາດນໍາພາຂອງຕົນ; ບັນຫາສໍາຄັນແມ່ນຕ້ອງເອົາໃຈໃສ່ປັບປຸງກົງຈັກການຈັດຕັ້ງ, ບຸກຄະລາກອນ, ແບບແຜນວິທີເຮັດວຽກຂອງຄະນະກວດ ກາແຕ່ລະຂັ້ນ; ເພີ່ມທະວີວຽກງານການຕິດຕາມ, ກວດກາການຈັດຕັ້ງປະຕິບັດແນວທາງ, ມະຕິ, ຄໍາສັ່ງຂອງພັກ ແລະ ກົດໝາຍຂອງລັດ,​ ແຜນພັດທະນາເສດຖະກິດ-ສັງຄົມ, ​ແຜນງົບປະມານ,​ ໂຄງການລົງທຶນຂອງລັດ ໃນຂະແໜງການຕົນ ຕິດພັນກັບວຽກງານຕ້ານ ແລະ ສະກັດກັ້ນການສໍ້ລາດບັງຫຼວງ, ການຄົ້ນຄວ້າແກ້ໄຂຄໍາຮ້ອງ-ຄໍາສະເໜີ ຢູ່ໃນຖັນແຖວສະມາຊິກພັກ-ພະນັກງານ ແລະ ພົນລະເມືອງ ໃຫ້ວ່ອງໄວທັນກັບສະພາບການ

ຂ່າວ-ພາບ: ທ ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ