ໃນວັນທີ 22 ມິຖຸນາ 2023, ທີ່ຫ້ອງປະຊຸມຊັ້ນ 03 ຂອງກະຊວງອຸດສາຫະກໍາ ແລະ ການຄ້າ (ອຄ), ໜ່ວຍພັກຮາກຖານຫ້ອງການກະຊວງ, ຈັດກອງປະຊຸມຄົບຄະນະກາງສະໄໝຂອງໜ່ວຍພັກຂື້ນ ໂດຍໃຫ້ກຽດເປັນປະທານກອງປະຊຸມ ຂອງ ສະຫາຍ ນາງ ສີມາລາ ແກ້ວສະກຸນວຽງ ຮັກສາການເລຂາໜ່ວຍພັກຫ້ອງການ, ໂດຍເປັນກຽດເຂົ້າຮ່ວມກອງປະຊຸມໃນຄັ້ງນີ້ ມີ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກກະຊວງ, ມີສະຫາຍ ປອ ບົວວັນ ວິລະວົງ ຄະນະປະຈໍາພັກກະຊວງ, ມີຄະນະໜ່ວຍພັກ ພ້ອມດ້ວຍສະມາຊິກພັກສົມບູນພາຍໃນໜ່ວຍພັກຮາກຖານຫ້ອງການ ເຂົ້າຮ່ວມຢ່າງພ້ອມພຽງ.
ສະຫາຍ ນາງ ສີມາລາ ແກ້ວສະກຸນວຽງ ຮັກສາການເລຂາໜ່ວຍພັກຫ້ອງການ ໄດ້ກ່າວເປີດກອງປະຊຸມຄັ້ງນີ້ວ່າ: ໃນທ່າມກາງບັນຍາກາດທີ່ທົ່ວອົງຄະນະພັກກະຊວງອຸດສາຫະກໍາ ແລະ ການຄ້າ ກໍາລັງແຂ່ງຂັນການຈັດຕັ້ງຜັນຂະຫຍາຍມະຕິກອງປະໃຫຍ່ ຄັ້ງທີ XI ຂອງພັກ ແລະ ມະຕິກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ອຸດສາຫະກໍາ ແລະ ການຄ້ ກໍ່ຄືກອງປະຊຸມໃຫຍ່ຂອງໜ່ວຍພັກຂັ້ນຕົນ ເຂົ້າສູ່ລວງເລິກ.
ໃນກອງປະຊຸມ ບັນດາສະມາຊິກພັກສົມບູນ ແລະ ແຂກທີ່ເຂົ້າຮ່ວມ ໄດ້ຮັບຟັງການເຜີຍເເຜ່ເຊື່ອມຊຶມ 3 ເອກະສານ ຂອງຄະນະເລຂາທິການສູນກາງພັກຄື: ມະຕິຂອງກົມການເມືອງສູນກາງພັກ ວ່າດ້ວຍມາດຕະຖານ ຂອງພະນັກງານນໍາພາ-ຄຸູ້ມຄອງ ແລະ ກົດລະບຽບພັກ ສະໄໝທີ XI ວ່າດ້ວຍຂໍ້ຫ້າມ, ໜ້າທີ່ ແລະ ສິດ ຂອງຄະນະພັກແຕ່ລະຂັ້ນ, ພ້ອມຖອດຖອນບົດຮຽນ, ປະກອບຄໍາເຫັນໃສ່ຮ່າງບົດສະຫຼຸບການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ VI ຂອງໜ່ວຍພັກຮາກຖານຫ້ອງການ (ກາງສະໄໝ) ແລະ ວາງທິດທາງແຜນການທ້າຍສະໄໝ ແລະ ບົດສໍາຫຼວດການນໍາພາລວມ, ບຸກຄົນຂອງຄະນະໜ່ວຍພັກ, ພ້ອມດຽວກັນນັ້ນ ບັນດາສະມາຊິກພັກສົມບູນ ໄດ້ໃຊ້ສິດປະຊາທິປະໄຕຂອງຕົນ ປ່ອນບັດທາບທາມຄວາມເຊື່ອໝັ້ນ-ໄວ້ວາງໃຈ ຂອງການນໍາພາລວມ ແລະ ບຸກຄົນໃນຄະນະໜ່ວຍພັກ ເພື່ອເປັນຂໍ້ມູນພື້ນຖານສໍາຄັນ ໃນການເບິ່ງບັນຫາການຈັດຕັ້ງ ກໍ່ຄື ໃຫ້ແຕ່ລະສະຫາຍຄະນະໜ່ວຍພັກເປັນບ່ອງອີງ ໃນການປັບປຸງກໍ່ສ້າງຕົນເອງ ເພື່ອສືບຕໍ່ຊີ້ນຳ-ນໍາພາ ຂະບວນການໃນການຈັດຕັ້ງປະຕິບັດ ຕາມມະຕິກອງປະຊຸມຄົບຄະນະກາງສະໄໝ ຂອງໜ່ວຍພັກຮາກຖານຫ້ອງການ ໃຫ້ບັນລຸຜົນສໍາເລັດຕາມລະດັບຄາດໝາຍ.
ໃນໂອກາດນີ້ ສະຫາຍ ມະໄລທອງ ກົມມະສິດ ກໍາມະການສໍາຮອງສູນກາງພັກ, ເລຂາຄະນະບໍລິຫານງານພັກກະຊວງ ກໍ່ໄດ້ໃຫ້ກຽດໂອ້ລົມ ຕໍ່ໜ່ວຍພັກຫ້ອງການວ່າ: ສະແດງຄວາມຍ້ອງຍໍຊົມເຊີຍ ຕໍ່ຜົນສຳເລັດຂອງກອງປະຊຸມກາງສະໄໝຂອງໜ່ວຍພັກຫ້ອງການ ທີ່ຍາດມາໄດ້ໃນໄລຍະຜ່ານມາ ແລະ ສະຫາຍໄດ້ເນັ້ນບາງຈຸດ ຄື: 1). ເສີມຂະຫຍາຍປະຊາທິປະໄຕພາຍໃນໜ່ວຍພັກ ເອົາໃຈໃສ່ສຶກສາອົບຮົມການເມືອງ-ແນວຄິດ ການຕໍານິສົ່ງຂ່າວຢ່າງຈິງໃຈ ແລະ ສ້າງສັນ, 2). ຢຶດໝັ້ນປະຕິບັດຫຼັກການລວມສູນປະຊາທິປະໄຕ, ນໍາພາເປັນໝູ່ຄະນະ, ແບ່ງງານແບ່ງຄວາມຮັບຜິດຊອບໃຫ້ບຸກຄົນຢ່າງຈະແຈ້ງ, ມີແບບແຜນ, ມີການຕິດຕາມປະເມີນຜົນ ແລະ ສະຫຼຸບຖອດຖອນບົດຮຽນໃນແຕ່ລະໄລຍະ, 3). ຄະນະນ່ວຍພັກ ຕ້ອງຍົກສູງຄຸນນະພາບຂອງວຽກງານ ເພີ່ມທະວີຄວາມເປັນເອກະພາບພາຍໃນພັກ ຄວາມສາມັກຄີເປັນອັນໜຶ່ງອັນດຽວຂອງສະມາຊິກພັກ-ພະນັກງານ, 4). ຄະນະໜ່ວຍພັກຕ້ອງເຊີດຊູບົດບາດ ແລະ ຄວາມສາມາດໃນການນໍາພາຂອງພັກ ໄປຄຽງຄູ່ກັບການຍົກສູງຄວາມເປັນແບບຢ່າງຂອງຖັນແຖວສະມາຊິກພັກ, ເດັດດ່ຽວແກ້ໄຂປະກົດການຫຍໍ້ທໍ້ທີ່ເກີດຂື້ນ ໃນຖັນແຖວສະມາຊິກພັກ-ພະນັກງານຢ່າງທັນການ, ແລະ 5). ຜັນຂະຫຍາຍແນວທາງນະໂຍບາຍມາເປັນນິຕິກໍາ, ເປັນໂຄງການ ແລະ ແຜນງານ ສິ່ງນີ້ແມ່ນຫລັກການສໍາຄັນທີ່ຈະຮັບປະກັນການປະຕິບັດໄດ້ ໜ້າທີ່ການເມືອງ ແລະ ເສດຖະກິດ ກໍ່ຄືວິຊາສະເພາະທີ່ເປັນບົດບາດຂອງໜ່ວຍພັກຫ້ອງການ ໂດຍສະເພາະແມ່ນວຽກງານຄຸ້ມຄອງຊັບສົມບັດລວມຂອງກະຊວງ, ການບໍລິຫານງົບປະມານ, ການຈັດຊື້-ຈັດຈ້າງ ຊຶ່ງເປັນວຽກທີ່ຕິດພັນກັບການໃຫ້ບໍລິຫານຮັບໃຊ້ ແລະ ອໍານວຍຄວາມສະດວກແກ່ການເຄື່ອນໄຫວວຽກງານວິຊາສະເພາະຂອງຕົນ ຕາມພາລະບົດບາດຂອງກະຊວງອຸດສາຫະກໍາ ແລະ ການຄ້າ.
ຕອນທ້າຍສະຫາຍຍັງມີຄວາມເຊື່ອໝັ້ນຕໍ່ໜ່ວຍພັກຫ້ອງການ ວ່າໃຫ້ຍົກສູງບົດບາດ, ຄວາມສາມາດນໍາພາ ແລະ ການຊີ້ນໍາວຽກງານວິຊາສະເພາະຂອງໜ່ວຍພັກໃຫ້ສູງຂື້ນ ທັງຮັບປະກັນຄຸນນະພາບ ແລະ ປະສິດທິຜົນ ເພື່ອກາຍເປັນຄໍາຂວັນທີວ່າ: ສຸມວຽກເປັນໃຈກາງ ສ້າງລະບົບທັນສະໄໝ ບໍລິການວ່ອງໄວ ໃສໃຈປະສິດທິຜົນ ໃນເງື່ອນໄຂຕາມພາລະລົດບາດໜ້າທີ່ ແລະ ຂອບເຂດສິດທີ່ກໍານົດໄວ້ ແລະ ຈະນໍາເອົາຄໍາເຫັນຊີ້ນໍາທັງໝົດນີ້ ເພື່ອເປັນເຂັມຊີ້ທິດເຢືອງທາງໃຫ້ແກ່ການເຄື່ອນໄຫວຈັດຕັ້ງປະຕິບັດໜ້າທີ່ວຽກງານຂອງຕົນຢ່າງເປັນຮູບປະທໍາ.
ຂໍ້ມູນຂ່າວ-ພາບ: ຫ້ອງການກະຊວງ ອຄ
ຮຽບຮຽງກວດແກ້ໂດຍ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຈໍຂ່າວສານ
