ໃນຕອນ​ເຊົ້າເວລາ 10:30 ໂມງ ຂອງວັນທີ 12 ກໍລະກົດ 2023, ທີ່ຫ້ອງຮັບແຂກໃຫຍ່ ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ມະໂນທອງ  ວົງໄຊ  ຮອງຖະມົນຕີ ກະຊວງອຸດສາຫະກໍາ ແລະ ການຄ້າ ແຫ່ງ ສປປ ລາວ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບ ຂອງ ທ່ານ Nicholas Moore (ນິ​ໂຄ​ລັດ ມົວ) ທູດ​ພິ​ເສດ ຮັບ​ຜິດ​ຊອບ​ອາ​ຊີ​ຕາ​ເວັນ​ອອກ​ສຽງ​ໃຕ້ ແຫ່ງ ອົ​ດສ​ະຕາ​ລີໃນ​ໂອ​ກາດ​ເຂົ້າພົບປະປຶກສາຫາລື ທ່ານ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ສປປ ລາວ ມີຜູ້ຕາງໜ້າເຂົ້າຮ່ວມ ຫົວໜ້າກົມ ຮອງຫົວໜ້າກົມ ຫົວໜ້າພະແນກອ້ອມຂ້າງກະຊວງ ເຂົ້າຮ່ວມທັງສອງຝ່າຍ ປະມານ 20 ທ່ານ.

       ໃນໂອກາດນີ້  ທ່ານ  ມະໂນທອງ ວົງໄຊ  ຮອງລັດຖະມົນຕີ  ກະຊວງອຸດສາຫະກໍາ ແລະ ການຄ້າ ກໍ່ສະແດງຄວາມຍ້ອງຍໍ ຊົມເຊີຍຕໍ່  ທ່ານ Nicholas Moore (ນິ​ໂຄ​ລັດ ມົວ) ທູດ​ພິ​ເສດ ຮັບ​ຜິດ​ຊອບ​ອາ​ຊີ​ຕາ​ເວັນ​ອອກ​ສຽງ​ໃຕ້ ແຫ່ງ ອົດສະຕຣາລີ ໃນໂອກາດເຂົ້າຢ້ຽມຂໍ່ານັບຄັ້ງນີ້ ເຊິ່ງທ່ານ ທູດ ໄດ້ສົນທະນາກ່ຽວກັບວຽກງານການຮ່ວມມື ການພົວພັນດ້ານການຄ້າ ລະຫວ່າງ ສປປ ລາວ- ອົດ​ສະ​ຕາ​ລີ ທີ່ມີສາຍພົວພັນເສີ່ມສ້າງທີ່ດີໃນໄລຍະຜ່ານມາ ດ້ານເສດຖະກິດ, ດ້ານການຄ້າ, ການລົງທຶນ ລະຫວ່າງ ສປປ ລາວ ແລະ ອົດສະຕຣາລີ, ປີ2018-2022 ມູນຄ່າການຄ້າສອງຝ່າຍປະຕິບັດໄດ້ 2.388.253.525 ລ້ານໂດລາສະຫະລັດ.

-     ສິນຄ້າຫຼັກທີ່ນໍາເຂົ້້າຈາກອົດສະຕຣາລີ ປະຕິບັດໄດ້ 2.114.251.163 ລ້ານໂດລາສະຫະລັດ, ສິນຄ້າປະກອບມີ: ອຸປະກອນກົນຈັກ (ນອກຈາກເຄື່ອງກົນຈັກພາຫະນະ), ເຫຼັກ ແລະ ເຄື່ອງທີ່ເຮັດດ້ວຍເຫຼັກ, ເຫຼັກກ້າ, ຜະ​ລິດ​ຕະ​ພັນ​ທາງ​ເຄ​ມີ, ເຄື່ອງໄຟຟ້າ ແລະ ອຸປະກອນໄຟຟ້າ, ຊິ້ນສ່ວນອາໄຫຼ່ລົດ (ລວມທັງຢາງ, ແວ່ນ, ໂສ້…), ຖ່ານ​ຫີນ, ລິກ​ໄນ, ຜະລິດຕະພັນເຄມີປະສົມສໍາເລັດຮູບ, ເຄື່ອງໃຊ້ທີ່ເຮັດດ້ວຍພລາສະຕິກ, ຊີ້ນ ແລະ ສ່ວນ​ອື່ນໆ ຂອງ​ສັດ ແລະ ອື່ນໆ.

- ສິນຄ້າສົ່ງອອກໄປອົດສະຕຣາລີ ປະຕິບັດໄດ້ 274.002.362 ລ້ານໂດລາສະຫະລັດ ສິນຄ້າປະກອບມີ: ​ຄຳ​ປະ​ສົມ-ຄຳ​ແທ່ງ, ເຄື່ອງ​ນຸ່ງ​ຫົ່ມ, ເກີບ, ເຂົ້າ, ໄມ້​ອັດ, ເຄື່ອງ​​ຊຸບ​ຫົວ (ໝວກ, ຜ້າ​ຄຸມ​ຫົວ), ເຄື່ອງ​ມື ແລະ ອຸ​ປະ​ກອນ​ທັດ​ສະ​ນະ​ສາດ, ໄຂ່​ມຸກ, ແກ້ວ​ປະ​ເສີດ, ເຄື່ອງ​ຫລີ້ນ​ກິ​ລາ, ​ແລະ ອື່ນໆ.

         ໃນໂອກາດນີ້ ທ່ານ ຮອງລັດຖະມົນຕີ ສະເໜີໃຫ້ຝ່າຍ ອົດສະຕຣາລີ ສືບຕໍ່ຮ່ວມມື ແລະ ສົ່ງເສີມການຄ້າສອງຝ່າຍໃຫ້ຂະຫຍາຍໂຕສູງຂື້ນເລື່ອຍໆ ພ້ອມທັງຊັກຊວນໃຫ້ນັກທຸລະກິດ ອົດສະຕຣາລີ ມາລົງທຶນ ໃນ ສປປ ລາວ ໃຫ້ຫຼາຍຂື້ນ.

 ທ່ານ Nicholas Moore (ນິ​ໂຄ​ລັດ ມົວ) ເອກອັກຄະລັດຖະທູດ ອົດສະຕຣາລີ ໄດ້ສະແດງຄວາມຍິນດີຕໍ່ ທ່ານ ຮອງລັດຖະມົນຕີ ທີ່ໄດ້ໃຫ້ຄໍາໝັ້ນວ່າໃນຕໍ່ໜ້າຈະໃຫ້ການຮ່ວມມື ລະຫວ່າງ ສປປ ລາວ – ອົດສະຕຣາລີ ​ ແລະ ​ອຳ​ນວຍ​ຄວາມ​ສະ​ດວກໃນວຽກງານຫຼາຍດ້ານ ເພື່ອໃຫ້ເກີດຜົນປະໂຫຍດສູງສຸດໃຫ້ແກ່ສອງປະເທດໃນອະນາຄົດໜ້າ.

 ຂ່າວ-ພາບ: ໄພຄໍາອີ ສູນສະຖິຕິ ແລະ ຂໍ້ມູນຂ່າວ ກະຊວງ ອຄ.