ກະຊວງອຸດສາຫະກຳ ແລະ ການຄ້າ ໄດ້ຈັດງານການສ້າງຄວາມເຂັ້ມແຂງໃຫ້ແມ່ຍິງ ພາຍໃຕ້ຫົວຂໍ້ “ການສະເຫຼີມສະຫຼອງຜົນສຳເລັດ ແລະ ການປະກອບສ່ວນຂອງນັກທຸລະກິດຍິງລາວ ໃນຊ່ວງການລະບາດໂຄວິດ-19” ເພື່ອ ສ້າງຄວາມເຂັ້ມແຂງດ້ານເສດຖະກິດໃຫ້ແກ່ແມ່ຍິງຄັ້ງທຳອິດເປັນເວທີປຶກສາຫາລື ສ້າງແຮງບັນດານໃຈ ແລະ ສ້າງເຄືອຂ່າຍໃຫ້ແມ່ຍິງ ໄດ້ຈັດຂື້ນຄັ້ງວັນທີ 17 ກໍລະກົດ 2023 ທີ່ໂຮງແຮມຄາວພາຊາ ໃຫ້ກຽດເປັນປະທານຮ່ວມຂອງ ທ່ານ ນ. ຈັນສຸກ ແສງພະຈັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ, ທ່ານ ນ. ສິລິຄູນ ພູມລາວັນ, ຮອງປະທານສະມາຄົມ ນັກທຸລະກິດຍິງ , ທ່ານ ນ. ສົມໝາຍ ພົມມຸນິວົງ ປະທານຄະນະບໍລິຫານງານ ສະຫະພັນແມ່ຍິງກະຊວງ ອຄ, ທ່ານ ອາເລັກຊັນເດີ ເຄນເມີ ຜູ້ຕາງໜ້າຈາກທະນາຄານໂລກ ມີພາກລັດທີ່ກ່ຽວຂ້ອງ, ຄູ່ຮ່ວມພັດທະນາ, ສະມາຄົມທຸລະກິດຕ່າງໆ, ອາຈານ ແລະ ນັກຮຽນຈາກມະຫາວິທະຍາໄລແຫ່ງຊາດ ເຂົ້າຮ່ວມ.
ທ່ານ ນ. ຈັນສຸກ ແສງພະຈັນ, ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ກ່າວໃຫ້ເຫັນພາບລວມຂອງສິ່ງກີດຂວາງແມ່ຍິງ ໃນ ສປປ ລາວ ແລະ ໃນພາກພື້ນ ແລະ ສິ່ງທີ່ຄວນເຮັດເພື່ອສົ່ງເສີມການສ້າງຄວາມເຂັ້ມແຂງດ້ານເສດຖະກິດ ໃນ ສປປ ລາວ, ທ່ານຍັງໃຫ້ຮູ້ຕື່ມວ່າ: ໂດຍເນັ້້ນໜັກເຖິງຄວາມສຳຄັນຂອງການປະຕິບັດໃຫ້ໄດ້ແທ້ ເພື່ອແກ້ໄຂຊ່ອງວ່າງ ທີ່ມີຢູ່ລະຫວ່າງ ທຸລະກິດທີ່ດຳເນີນໂດຍຜູ້ຊາຍ ແລະ ທຸລະກິດທີ່ດຳເນີນໂດຍຜູ້ຍິງ ພວກເຮົາຈະສືບຕໍ່ ສ້າງສະພາບແວດລ້ອມທີ່ເອື້ອອຳນວຍໃຫ້ແກ່ການດຳເນີນທຸລະກິດ ເພີ່ມການເຂົ້າເຖິງການບໍລິການດ້ານ ການເງິນ ແລະ ນຳໃຊ້ເຕັກໂນໂລຊີດ້ານດິຈິຕໍ ໃຫ້ແກ່ທຸກຄົນ”.
ໃນຂະນະທີ່ກ່າວເຖິງຄວາມສຳຄັນ ຂອງການນຳໃຊ້ແນວທາງແບບຄົບຊຸດໃນການສົ່ງເສີມການສ້າງຄວາມເຂັ້ມແຂງດ້ານເສດຖະກິດຂອງແມ່ຍິງ, ທ່ານ ນ ສິລິຄູນ ພູມລາວັນ, ຮອງປະທານສະມາຄົມ ນັກທຸລະກິດຍິງ ເນັ້ນໜັກຕື່ມວ່າ: ພວກເຮົາຈຳເປັນຕ້ອງຮັບຮູ້ວ່າ ພວກເຮົາສາມາດເຮັດໄດ້ຫຼາຍສິ່ງ ເພື່ອສົ່ງເສີມຄວາມກ້າວໜ້າຂອງແມ່ຍິງ ໂດຍຜ່ານການປັບປຸງສະພາບແວດລ້ອມດ້ານການດຳເນີນທຸລະກິດ, ການເຂົ້າເຖິງ ການເງິນ, ແຮງງານ, ຂໍ້ມູນຂ່າວສານ ແລະ ຊັບສິນທີ່ມີປະສິດຕິຜົນຕ່າງໆ, ການມີສິດທິທີ່ເທົ່າທຽມກັນຂອງແມ່ຍິງ ແມ່ນພື້ນຖານຂອງຄວາມຈະເລີນກ້າວໜ້າຂອງທຸກໆຄົນ. ນອກນັ້ນຍັງເຊື່ອໝັ້ນວ່າທຸກທ່ານຄົງຈະເຫັນດີເປັນເອກະພາບວ່າ ການມີຄວາມເທົ່າທຽມກັນ ລະຫວ່າງເພດຍິງ ແລະ ເພດຊາຍ ຈະເຮັດໃຫ້ພວກເຮົາມີຄວາມປອດໄພ, ມີຄວາມສຸກ, ມີຄວາມຈະເລີນຮຸ່ງເຮືອງ ແລະ ປະສົບຜົນສໍາເລັດຫຼາຍຂື້ນ.
ສປປ ລາວ ກໍຄ້າຍຄືກັບປະເທດອື່ນໆໃນໂລກ ໄດ້ຮັບຜົນກະທົບຢ່າງໜັກໜ່ວງ ຈາກການແຜ່ລະບາດ ຂອງພະ ຍາດໂຄວິດ-19. ໃນໄລຍະນັ້ນ, ຜູ້ຄົນໄດ້ປະເຊີນກັບການສູນເສຍວຽກເຮັດງານທຳ, ໄພເງິນເຟີ້, ການອ່ອນຄ່າ ຂອງເງິນກີບ ແລະ ໜີ້ສິນພາກລັດ ແລະ ພາກທຸລະກິດທີ່ສູງຂຶ້ນ. ແມ່ຍິງ ແລະ ເດັກຍິງ ແມ່ນໄດ້ຮັບຜົນກະທົບໃນທາງລົບຫຼາຍຂຶ້ນ ໃນທຸກດ້ານຂອງການມີສ່ວນຮ່ວມທາງດ້ານເສດຖະກິດ ແລະ ສັງຄົມ ນັບຕັ້ງແຕ່ ການສຶກສາ, ສາທາ, ອາຊີບ, ຄວາມຮຸນແຮງໃນຄອບຄົວ, ການເປັນຕົວແທນ ແລະ ອື່ນໆ. ເຖິງຢ່າງໃດກໍ່ຕາມ ແມ່ຍິງຈະບໍ່ຍອມຈຳນົນຕໍ່ແຮງກົດດັນເຫຼົ່ານີ້. ໃນຂະນະທີ່ ປະເທດຍັງຄົງສືບຕໍ່ການຟຶ້ນຟູ ຫຼັງຈາກການແຜ່ລະ ບາດຂອງພະຍາດໂຄວິດ-19, ແມ່ຍິງ ກໍ່ໄດ້ປະກອບສ່ວນຢ່າງຕັ້ງໜ້າໃນວຽກງານຕ່າງໆ ເຊິ່ງສະແດງໃຫ້ເຫັນເຖິງສັກກະຍະພາບ, ຄວາມເຂັ້ມແຂງ ແລະ ຄວາມຮູ້ ຄວາມສາມາດ ຂອງພວກເຂົາ.
ນອກນີ້ ໄດ້ສົນທະນາບອກເລົ່າເລື່ອງລາວ ເສັ້ນທາງທີ່ສ້າງແຮງບັນດານໃຈຂອງ 4 ນັກທຸລະກິດຍິງລາວ ທີ່ມາຈາກຂະແໜງການທີ່ແຕກຕ່າງກັນມີ: ການທ່ອງທ່ຽວ, ການຂົນສົ່ງ, ກະສິກຳ ແລະ ການແປຮູບອາຫານ ແລະ ພິເສດ ມີຜູ້ບັນຍາຍຈາກປະເທດໄທ ທີ່ໄດ້ມາແບ່ງປັນຄວາມທ້າທາຍ ການປັບໂຕ ແລະ ພາວະຄວາມເປັນຜູ້ນຳ ໃນໄລຍະການຟື້ນຟູຈາກການແຜ່ລະບາດພະຍາດໂຄວິດ-19. ປະກອບມີ ທ່ານນາງ ຄຳລີ້ ພີລາວົງ ຜູ້ກໍ່ຕັ້ງຜະລິດຕະພັນເຂົ້າລາວ, ທ່ານນາງ ໝິມີ່ ພົມມາລີ ຜູ້ຈັດການສວນຄຳເພັດ, ທ່ານນາງ ພິລາປະຈິດ ປະຈິດທຳ ຜູ້ຈັດການຝ່າຍດຳເນີນທຸລະກິດ ກຸ່ມບໍລີິສັດ ອິນທິຣາ, ແລະ ທ່ານນາງ ສີສົມພອນ ພົມວິໄລ ອຳນວຍການການຕະຫຼາດ ບໍລິສັດຮຸ່ງອາລຸນ ໂລຈິສຕິກ ຈຳກັດ.
ຂ່າວ-ພາບ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ
