ໃນຕອນບ່າຍ ເວລາ 13 : 30 ໂມງຂອງວັນທີ 01 ທັນວາ 2023 ທີ່ ຫ້ອງຮັບແຂກໃຫຍ່ຊັ້ນ 4 ກະຊວງອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າພົບປະຢ້ຽມຢາມຂອງ ທ່ານ ນ. ອິນາ ມາຈູລໍນິແຕ (Ms. Ina Marčiulionytė), ເອກອັກຄະລັດຖະທູດ ສະຫາພາບເອີຣົບ ປະຈໍາ ສປປ ລາວ ພ້ອມດ້ວຍຄະນະ ແລະ ມີຜູ້ຕາງໜ້າຈາກສອງຝ່າຍເຂົ້າຮ່ວມ ຈໍານວນປະມານ 18 ທ່ານ.
ໃນໂອກາດພົບປະຄັ້ງນີ້ ທ່ານລັດຖະມົນຕີ ກະຊວງ ອຄ ໄດ້ສະແດງຄວາມຍິນດີຕ້ອນຮັບ ນ. ອິນາ ມາຈູລໍນິແຕ (Ms. Ina Marčiulionytė), ເອກອັກຄະລັດຖະທູດ ສະຫາພາບເອີຣົບ ປະຈໍາ ສປປ ລາວ ພ້ອມດ້ວຍຄະນະ ທີ່ໄດ້ມາເຄື່ອນໄຫວວຽກງານຂອງຕົນ ຢູ່ ສປປ ລາວ ຊຶ່ງການພົບປະຄັ້ງນີ້ ທ່ານໄດ້ສະເໜີ ບາງບັນຫາໃນການປຶກສາຫາລື ກັບເອກອັກຄະລັດຖະທູດ ສະຫາພາບເອີຣົບ ປະຈໍາ ສປປ ລາວ ຄື:
ກ່ຽວກັບການກະກຽມເປັນປະທານອາຊຽນ ຂອງ ສປປ ລາວ ປີ 2024
- ສໍາລັບແຜນບູລິມະສິດດ້ານເສດຖະກິດອາຊຽນ (Priority Economic Deliverables – PEDs) ຂອງ ສປປ ລາວ ໃນປີ 2024 ມີ 3 ກຸ່ມຍຸດທະສາດ (Strategic Thrusts) ແລະ 14 PEDs ດັ່ງນີ້:
- ກຸ່ມຍຸດທະສາດ 1: ການເຊື່ອມໂຍງ ແລະ ເຊື່ອມຈອດດ້ານເສດຖະກິດ (Integrating and Connecting Economies)
- ກຸ່ມຍຸດທະສາດ 2: ການສ້າງອະນາຄົດແບບຢືນຍົງ ແລະ ທຸກພາກສ່ວນມີສ່ວນຮ່ວມ (Forging an Inclusive and Sustainable Future)
- ກຸ່ມຍຸດທະສາດ 3: ການຫັນປ່ຽນເພື່ອກ້າວໄປສູ່ດິຈິຕອນໃນອານະຄົດ (Transforming for Digital Future)
ໂດຍສະເພາະກອງປະຊຸມຂັ້ນ ລັດຖະມົນຕີ ປະກອບມີ:
- ກອງປະຊຸມ ASEAN Economic Ministers’ Meeting (AEM) Retreat ຄັ້ງທີ 24, ວັນທີ 07-08 ມີນາ 2024, ທີ່ ຫຼວງພະບາງ
- ກອງປະຊຸມ AEM ຄັ້ງທີ 56, ວັນທີ 15-22 ກັນຍາ 2024 ທີ່ ນະຄອນຫຼວງວຽງຈັນ
- ກອງປະຊຸມ ASEAN Economic Community Council ຄັ້ງທີ 24, ວັນທີ 06-07 ຕຸລາ 2024 ທີ່ ນະຄອນຫຼວງວຽງຈັນ
ກ່ຽວກັບການປັບປຸງສະພາບແວດລ້ອມດໍາເນີນທຸລະກິດ ແລະ ການລົງທຶນ
ເພື່ອປັບປຸງບັນຍາກາດໃນການດໍາເນີນທຸລະກິດໃຫ້ດີຂຶ້ນແນໃສ່ຍາດແຍ່ງ ແລະ ດຶງດູດເອົາການລົງທຶນທີ່ມີຄຸນນະພາບ, ຊຸກຍູ້ສົ່ງເສີມ ແລະ ສ້າງຂີດຄວາມອາດສາມາດໃນການແຂ່ງຂັນຂອງທຸລະກິດ ໂດຍການຫຼຸດຜ່ອນຂັ້ນຕອນ ແລະ ເວລາໃນການອອກອະນຸຍາດຕ່າງໆຂອງ ຂະແໜງການທີ່ກ່ຽວຂ້ອງໃຫ້ມີຄວາມວ່ອງໄວ, ໂປ່ງໃສ, ມີຜົນສັກ ສິດ, ຫຼຸດຜ່ອນຕົ້ນທຶນໃນການດຳເນີນທຸລະກິດ. ກະຊວງ ອຄ ໄດ້ເປັນເຈົ້າການປະສານກັບຂະແໜງການ ເພື່ອເລັ່ງປັບປຸງແກ້ໄຂຄວາມຫຍຸ້ງຍາກທີ່ຕິດພັນກັບການເລີ່ມຕົ້ນທຸລະກິດ, ຊຶ່ງປະຈຸບັນ ສາມາດຫຼຸດຂັ້ນຕອນການເລີ່ມຕົ້ນທຸລະກິດຈາກ 10 ຂັ້ນຕອນ ເຫຼືອພຽງ 3 ຂັ້ນຕອນຄື: (1) ຂຶ້ນທະບຽນວິສາຫະກິດ, (2) ຄວັດຕາປະທັບ ແລະ (3) ຈົດທະບຽນປະກັນສັງຄົມ. ສະນັ້ນ, ຈຶ່ງເຮັດໃຫ້ເວລາການເລີ່ມຕົ້ນທຸລະກິດຈາກສູງສຸດ ສະເລ່ຍ 174 ວັນ ຫຼຸດລົງເຫຼືອປະມານ 17 ວັນ. ນອກຈາກນັ້ນ, ຍັງສາມາດຫຼຸດຜ່ອນເວລາການແຈ້ງຂຶ້ນທະບຽນວິສາຫະກິດຈາກເມື່ອກ່ອນ 50-80 ວັນ ເຫຼືອພຽງ 10 ວັນລັດຖະການ ແລະ ໄດ້ສ້າງເວັບໄຊຖານຂໍ້ມູນວິສາຫະກິດແຫ່ງຊາດ (www.ned.moic.gov.la) ຊຶ່ງໄດ້ເປີດນຳໃຊ້ໃນກາງປີ 2019 ເປັນຕົ້ນມາ. ປະຈຸບັນກໍາລັງສ້າງແພລດຟອມ ຂຶ້ນທະບຽນວິສາຫະກິດຜ່ານທາງອອນລາຍ.
ກ່ຽວກັບການສະເໜີກະກຽມຈັດກອງປະຊຸມທຸລະກິດ ລາວ-ອີຢູ ຄັ້ງທໍາອິດ:
ຈຸດປະສົ່ງຫຼັກຂອງການຈັດກອງປະຊຸມ LEBF ແມ່ນເພື່ອສົ່ງເສີມການຮ່ວມມືສອງຝ່າຍ ດ້ານເສດຖະກິດ, ທຸລະກິດ, ການເງິນ ແລະ ການລົງທຶນທີ່ມີຄຸນນະພາບຂອງ ຂອງພາກທຸລະກິດ ອີຢູ ໃນ ສປປ ລາວ ແນໃສ່ສະໜັບສະໜູນການບັນລຸບັນດານະໂຍບາຍ ແລະ ເປົ້າໝາຍຕາມແຜນພັດທະນາເສດຖະກິດສັງຄົມ ຄັ້ງທີ່ 9 ຂອງ ສປປ ລາວ, ນະໂຍບາຍການພັດທະນາເສດຖະກິດແບບຍືນຍົງ ແລະ ສີຂຽວ, ນະໂຍບາຍການຫັນປ່ຽນເປັນປະເທດເຊື່ອມຈອດທາງດ້ານເສດຖະກິດ ແລະ ການລົງທຶນ. ປະຈຸບັນແມ່ນ ກະຊວງ ແຜນການ ແລະ ການລົງທຶນ ເປັນເຈົ້າການ
ທ້າຍນີ້, ທ່ານ ລັດຖະມົນຕີກະຊວງ ອຄ ໄດ້ສະແດງຄວາມຂອບໃຈ ຕໍ່ທ່ານ ນ. ອິນາ ມາຈູລໍນິແຕ (Ms. Ina Marčiulionytė), ເອກອັກຄະລັດຖະທູດ ສະຫາພາບເອີຣົບ ປະຈໍາ ສປປ ລາວ ພ້ອມດ້ວຍຄະນະ ຕ່ໍການສືບຕໍ່ການສະໜັບສະໜູນໃຫ້ຄວາມຮ່ວມມື, ການພົບປະແລກປ່ຽນຄວາມຄິດເຫັນຫຼາຍອັນທີ່ເປັນປະໂຫຍດ ພ້ອມທັງອວຍພອນໄຊ ໃຫ້ທ່ານພ້ອມຄະນະ ຈົ່ງມີຄວາມສຸກ, ສຸຂະພາບແຂງແຮງ ແລະ ປະສົບຜົນສໍາເລັດໃນການເຄື່ອນໄຫວວຽກງານ ຢູ່ ສປປ ລາວ.
ພາບ: ໄພວັນ ໂຄດວັນທາ
ຂ່າວ: ເພັດປະກາຍ ສີສົມບູນ
