ກົມເຈລະຈາການຄ້າ ແລະ ຮ່ວມມືເສດຖະກິດສາກົນ, ກະຊວງອຸດສາຫະກໍາ ແລະ ການຄ້າ ໃນນາມເປັນຈຸດປະສານງານວຽກງານການເຊື່ອມໂຍງເສດຖະກິດພາກພື້ນ ແລະ ສາກົນຂອງ ສປປ ລາວ ໄດ້ເປັນເຈົ້າພາບຈັດກອງປະຊຸມເຈົ້າໜ້າທີ່ອາວຸໂສເສດຖະກິດ ກໍາປູເຈຍ-ສປປ ລາວ-ມຽນມາ-ຫວຽດນາມ (Cambodia – Lao PDR – Myanmar – Viet Nam Senior Economic Officials’ Meeting: CLMV SEOM) ຄັ້ງທີ 26, ໃນຕອນບ່າຍຂອງວັນທີ 17 ມັງກອນ 2024, ທີ່ ນະຄອນຫຼວງວຽງຈັນ.
ພາຍໃຕ້ການເປັນປະທານຂອງ ທ່ານ ໄຊຊະນະ ໄຊຍະກອນ, ຫົວໜ້າກົມເຈລະຈາການຄ້າ ແລະ ຮ່ວມມືເສດຖະກິດສາກົນ, ກະຊວງອຸດສາຫະກໍາ ແລະ ການຄ້າ ໂດຍມີຄະນະຜູ້ແທນຈາກ ປະເທດກໍາປູເຈຍ, ມຽນມາ, ຫວຽດນາມ ແລະ ກອງເລຂາອາຊຽນ, ພ້ອມທັງຕາງໜ້າຈາກບັນດາຂະແໜງປິ່ນອ້ອມຂອງ ສປປ ລາວ ເຂົ້າຮ່ວມ.
ກອງປະຊຸມຄັ້ງນີ້ ໄດ້ປຶກສາຫາລື ເພື່ອຜັນຂະຫຍາຍຜົນຂອງກອງປະຊຸມລັດຖະມົນຕີເສດຖະກິດ ກໍາປູເຈຍ-ສປປ ລາວ-ມຽນມາ-ຫວຽດນາມ ຄັ້ງທີ 15 ໂດຍສະເພາະ ແມ່ນໄດ້ປຶກສາຫາລືກ່ຽວກັບເອກະສານໜ້າທີ່ ແລະ ພາລະບົດບາດ ຂອງເຈົ້າໜ້າທີ່ອາວຸໂສເສດຖະກິດ ກໍາປູເຈຍ-ສປປ ລາວ-ມຽນມາ-ຫວຽດນາມ. ກອງປະຊຸມ ໄດ້ຮັບຊາບ ແລະ ປຶກສາຫາລືກ່ຽວກັບການຈັດຕັ້ງປະຕິບັດແຜນປະຕິບັດງານ CLMV ສົກປີ 2023-2024 ເພື່ອສົ່ງເສີມການຮ່ວມມື ແລະ ສ້າງຂີດຄວາມອາດສາມາດໃຫ້ແກ່ບັນດາປະເທດ CLMV, ປຶກສາຫາລືກ່ຽວກັບການກະກຽມເລີ່ມຈັດຕັ້ງປະຕິບັດແຜນຈັດຕັ້ງປະຕິບັດຂອບວຽກວ່າດ້ວຍການພັດທະນາ CLMV ໄດ້ເຫັນດີໃຫ້ມີການຈັດກອງປະຊຸມສໍາມະນາລະຫວ່າງສີ່ປະເທດ ເພື່ອແລກປ່ຽນກ່ຽວກັບການຈັດຕັ້ງປະຕິບັດແຜນດັ່ງກ່າວ.
ພ້ອມດຽວກັນນີ້, ກອງປະຊຸມຍັງໄດ້ຮັບຊາບຄວາມຄືບໜ້າການຈັດຕັ້ງປະຕິບັດແຜນວຽກຂໍ້ລິເລີ່ມການເຊື່ອມໂຍງອາຊຽນ ສະບັບທີ IV 2021-2025 ຊຶ່ງບັນດາກິດຈະກໍາພາຍໃຕ້ແຜນດັ່ງກ່າວ ເປັນການສົ່ງເສີມ ແລະ ສ້າງຄວາມເຂັ້ມແຂງໃຫ້ແກ່ປະເທດ CLMV ໃນການຈັດຕັ້ງປະຕິບັດບັນດາພັນທະໃນຂອບອາຊຽນ ແລະ ພາຍໃຕ້ການຮ່ວມມືລະຫວ່າງອາຊຽນ ແລະ ປະເທດຄູ່ຮ່ວມເຈລະຈາ ພ້ອມທັງປະກອບສ່ວນເຂົ້າໃນການຮັດແຄບຄວາມແຕກໂຕນດ້ານການພັດທະນາລະຫວ່າງປະເທດສະມາຊິກອາຊຽນອີກດ້ວຍ.
ນອກຈາກນັ້ນ, ກອງປະຊຸມຍັງໄດ້ປຶກສາຫາກັນກ່ຽວກັບຮ່າງເອກະສານອ້າງອີງ (TOR) ຂອງເຈົ້າໜ້າທີ່ອາວຸໂສ CLMV ເຊິ່ງເປັນການສືບຕໍ່ປຶກສາຫາລືຕໍ່ຈາກກອງປະຊຸມເຈົ້າໜ້າທີ່ອາວຸໂສຄັ້ງທີ 3/4 ທີ່ໄດ້ຈັດຂືຶ້ນລະຫວ່າງວັນທີ 11-13 ທີ່ ສູລາບາຢາ, ປະເທດອິນໂດເນເຊຍ ແລະ ກອງປະຊຸມຄັ້ງທີ 15 ຂອງ CLMV EMM ຊຶ່ງຈັດຂຶ້ນໃນວັນທີ 18 ສິງຫາ 2023 ທີ່ ເຊມາຣັງ, ປະເທດ ອິນໂດເນເຊຍ
ຂ່າວ-ພາບ: ໄພວັນ ໂຄດວັນທາ ສູນສະຖິຕິ ແລະ ຂໍ້ມູນຂ່າວສານ, ອຄ
