ກະຊວງອຸດສາຫະກໍາ ແລະ ການຄ້າ (ອຄ) ເປີດນໍາໃຊ້ເວບໄຊ https://laotradestat.moic.gov.la ຢ່າງເປັນທາງການໃນວັນທີ 15 ມີນາ 2024 ທີ່ໂຮງແຮມເມືອງແທ່ງ ນະຄອນຫຼວງວຽງຈັນ ໂດຍການເຂົ້າຮ່ວມເປັນປະທານ ຂອງ ທ່ານ ປອ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ, ບັນດາທ່ານຫົວໜ້າກົມ, ຮອງຫົວໜ້າກົມ, ຄະນະພະແນກ ແລະ ວິຊາການ ກະຊວງທີ່ກ່ຽວຂ້ອງ, ບັນດາທ່ານ ຜູ້ຕາງໜ້າສະຖານທູດ ປະຈໍາ ສປປ ລາວ, ອົງການຈັດຕັ້ງສາກົນ ແລະ ສະພາການຄ້າ ແລະ ອຸດສາຫະກຳ ແຫ່ງຊາດ, ຕາງໜ້າພາກທຸລະກິດ ກ່ຽວຂ້ອງ ເຂົ້າຮ່ວມ.
ທ່ານ ນາງ ມະນີວອນ ວົງໄຊ ຫົວໜ້າກົມການຄ້າຕ່າງປະເທດ, ກະຊວງ ອຄ ໄດ້ກ່າວວ່າ: ກົມການຄ້າຕ່າງ ປະເທດ ໄດ້ເລີ່ມມີການພັດທະນາລະບົບເກັບກຳ ແລະ ລາຍງານສະຖະຕິການນຳເຂົ້າ ແລະ ສົ່ງອອກ ແຕ່ປີ 2009 ໂດຍໄດ້ເລີ່ມສ້າງຈາກໂປຣແກມ Acess ທີ່ສາມາດນຳໃຊ້ໄດ້ສະເພາະຄອມທີ່ໄດ້ຕິດຕັ້ງລະບົບດັ່ງກ່າວ, ຈາກນັ້ນ ໃນປີ 2015 ກົມການຄ້າຕ່າງປະເທດ ກໍ່ໄດ້ຮັບໂຄງການຄົ້ນຄວ້າວິທະຍາສາດ ຈາກສະພາວິທະຍາສາດແຫ່ງຊາດ, ເຊິ່ງໄດ້ພັດທະນາ ເປັນລະບົບ Intranet ທີ່ສາມາດນຳໃຊ້ໄດ້ສະເພາະຢູ່ກະຊວງ ອຄ ເທົ່ານັ້ນ, ໂດຍເຂົ້າລະບົບຜ່ານ Internet ຂອງກະຊວງ ອຄ ເທົ່ານັ້ນ.
ທ່ານຫົວໜ້າກົມການຄ້າຕ່າງປະເທດ ໃຫ້ຮູ້ຕື່ມວ່າ: ເຫັນໄດ້ເຖິງຄວາມຈຳເປັນໃນການຊົມໃຊ້ຂໍ້ມູນສະຖິຕິການຄ້າຕ່າງປະເທດ ຢ່າງກວ້າງຂວາງໃນປະຈຸບັນ ທັງເປັນການຫຼຸດຜ່ອນການອອກໃບອະນຸຍາດການນຳເຂົ້າ ແລະ ສົ່ງອອກສິນຄ້າ ທີ່ໃຫ້ເຫດຜົນໃນການເກັບກຳສະຖິຕິ, ໃນທ້າຍປີ 2019 ກົມການຄ້າຕ່າງປະເທດ ຈຶ່ງໄດ້ສະເໜີ ແລະ ໄດ້ຮັບອະນຸມັດໂຄງການພັດທະນາລະບົບສະຖິຕິການຄ້າຕ່າງປະເທດ ແບບອອນລາຍ ແລະ ໄດ້ເຊັນ MOU ກັບກົມພາສີ ເພື່ອເຊື່ອມຕໍ່ລະບົບ Asycuda ໃນການດຶງຂໍ້ມູນແບບອັດຕະໂນມັດ.
ໂອກາດນີ້ ທ່ານ ປອ ມະໂນທອງ ວົງໄຊ, ຮອງລັດຖະມົນຕີກະຊວງອຸດສາຫະກໍາ ແລະ ການຄ້າ ໄດ້ມີຄໍາເຫັນໂອ້ລົມມີເນື້ອໃນວ່າ: ສະຖິຕິການຄ້າຕ່າງປະເທດ ຫຼື ສະຖິຕິການຂໍາເຂົ້າ-ສົ່ງອອກ ແມ່ນມີຄວາມສໍາຄັນຫຼາຍແມ່ນມີຄວາມສໍາຄັນຫຼາຍໃນການຕີາຄາ, ປະເມີນຜົນການຈັດຕັ້ງປະຕິບັດແຜນການນໍາເຂົ້າ ແລະ ສົ່ງອອກ ທີ່ສະພາແຫ່ງຊາດ ຮັບຮອງເອົາແຕ່ລະໄລຍະ, ເປັນຂໍ້ມູນພື້ນຖານສໍາຄັນໃນການສ້າງແຜນຍຸດທະສາດ, ນະໂຍບາຍການນໍາເຂົ້າ-ສົ່ງອອກ, ດຸ່ນດ່ຽງເສດຖະກິດມະຫາພາກ ແລະ ການເຈລະຈາການຄ້າກັບບັນດາປະເທດຄູ່ຄ້າ. ຂໍເຊີນຊວນບັນດາທ່ານຈາກພາກລັດ, ອົງການຈັດຕັ້ງສາກົນ, ບັນດາສະມາຄົນທຸລະກິດ ແລະ ບໍລິສັດຕ່າງໆ ຈົ່ງໝູນໃຊ້ລະບົບສະຖິຕິການຄ້າຕ່າງປະເທດດັ່ງກ່າວ ເຂົ້າໃນການສຶກສາຄົ້ນຄວ້າ ເພື່ອນໍາຜົນປະໂຫຍດສູງສຸດມາສູ່ອົງກອນຂອງຕົນກໍຄືປະເທດຊາດ.
ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ
