ວັນທີ 20 ພຶດສະພາ 2024 ທີ່ກະຊວງອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ໄດ້ຕ້ອນຮັບການເຂົ້າພົບປະຂອງທ່ານ ຫຼີ ປີງຈິນ ເຈົ້າແຂວງກຸ້ຍໂຈວ ສປ ຈີນ ພ້ອມດ້ວຍຄະນະໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ລາວ.

ໂອກາດນີ້ທ່ານ ມະໄລທອງ ກົມມະສິດ ໄດ້ສະແດງຄວາມຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມເຮັດວຽກຢູ່ ລາວ ຂອງຄະນະຜູ້ແທນ ແຂວງກຸ້ຍໂຈວ ຄັ້ງນີ້ຈະເປັນການປະກອບສ່ວນເພີ່ມທະວີການພົວພັນຮ່ວມມືລະຫວ່າງ ລາວ-ຈີນ ໂດຍສະເພາະລະຫວ່າງລາວ ແລະ ແຂວງກຸ້ຍໂຈວ ເປັນຕົ້ນແມ່ນການຮ່ວມມືທາງດ້ານການຄ້າ ແລະ ການລົງທຶນ ທີ່ມີມາແລ້ວນັ້ນໃຫ້ນັບມື້ຂະຫຍາຍຕົວເພີ້ມຂຶ້ນເລື້ອຍໆ.

ການພົບປະສອງຝ່າຍຄັ້ງນີ້ ທ່ານລັດຖະມົນຕີ ກະຊວງ ອຄ ໄດ້ຍົກບັນຫາຂຶ້ນມາປຶກສາຫາລືແມ່ນບັນຫາການຊຸກຍູ້ ແລະ ສົ່ງເສີມການຄ້າ, ການລົງທຶນ, ການຄ້າຊາຍແດນລາວ-ຈີນ, ການພັດທະນາອຸດສາຫະກໍາ ແລະ ການອໍານວຍຄວາມສະດວກໃນການຂົນສົ່ງສິນຄ້າຜ່ານທາງລົດໄຟລາວ-ຈີນ ໄປຕໍ່ເອິຣົບ ແລະ ທ່ານເຈົ້າແຂວງກຸ້ຍໂຈວ ໄດ້ຍົກຂື້ນມາວ່າ: ການມາຢ້ຽມຢາມ ແລະ ເຮັດວຽກຢູ່ລາວ ຄັ້ງນີ້ເພື່ອເພີ່ມທະວີການຮ່ວມມືດ້ານອຸດສາຫະກໍາຄື: ການພັດທະນາ ແລະ ການນໍາໃຊ້ຊັບພະຍາກອນແຮ່ທາດ ການຮ່ວມມືດ້ານການຄ້າ ການນຳເຂົ້າ-ສົ່ງອອກ ຜະລິດຕະພັນກະສິກຳລາວ, ເຫຼົ້າກຸ້ຍໂຈວ, ຢາງລົດ, ຜະລິດຕະພັນເຫລັກກ້າ ແລະ ກົນຈັກໄຟຟ້າ ສ້າງຄວາມເຂັ້ມແຂງດ້ານວິສະວະກຳແຂວງກຸ້ຍໂຈວ ມີທ່າແຮງ ແລະ ປະສົບການດ້ານຂົວທາງ, ອຸໂມງ, ທາງລົດໄຟ, ພະລັງງານໄຟຟ້າ, ອຸດສາຫະກຳເຄມີ ແລະ ການປຸງແຕ່ງຊັບພະຍາກອນແຮ່ທາດ.

ການພົບປະຄັ້ງນີ້ສອງຝ່າຍ ໄດ້ເຫັນ​ຄວນ​ສະ​ເໜີ​​ແລກປ່ຽນ ​ແລະ ຂໍ​ການ​ສະໜັບສະໜູນ ​ວຽກ​ງານສົ່ງ​ເສີມ​​ການ​ຄ້າ ​ເປັນ​ຕົ້ນ​ວຽກ​ງານ​ວາງສະ​ແດງ​ສິນຄ້າ ​ແລະ ວຽກ​ງານ​ອຳນວຍ​ຄວາມ​ສະດວກທາງ​ດ້ານ​ການ​ຄ້າ ​ເປັນ​ຕົ້ນ​ການ​ຂົນ​ສົ່ງ​ສິນຄ້າ​ຜ່ານ​ທາງ​ລົດ​ໄຟ; ເພື່ອດືງດູດການລົງທືນຈາກ ສປ ຈີນ ແລະ ບັນດາປະເທດຕ່າງໆ ໃຫ້ຫລາຍຂື້ນໃນອະນາຄົດ, ສະເຫນີໃຫ້ມີການຈັດກິດຈະກຳສຳມະນາ ຫລື ເວທີພົບປະໃດຫນື່ງລະຫວ່າງພາກທຸລະກິດຂອງສອງຝ່າຍ, ເພື່ອເປັນເວທີ ແລະ ຊ່ອງທາງໃນການສົ່ງເສີມການຄ້າ ແລະ ການລົງທືນ, ການອຳນວຍຄວາມສະດວກທາງດ້ານການຄ້າ ແລະ ການລົງທືນ, ການສ້າງຕ່ອງໂສ້ມູນຄ່າເພີ່ມໃນລະດັບພາກພື້ນ ແລະ ສາກົນ, ການສົ່ງເສີມການຄ້າເອເລັກໂຕຣນິກ ແລະ ອື່ນໆ. ຮ່ວມກັນສ້າງກົນໄກປະສານງານລະຫວ່າງ ສປປ ລາວ ແລະ ແຂວງ ກຸ້ຍໂຈວ.

ຕອນທ້າຍທ່ານລັດຖະມົນຕີ ໄດ້ສະແດງຄວາມຂອບໃຈມາຍັງທ່ານເຈົ້າແຂວງກຸ້ຍໂຈວ ທີ່ໄດ້ມາພົບປະຢ້ຽມຢາມ ເພື່ອປືກສາຫາລືກ່ຽວກັບການຮ່ວມມືທາງດ້ານເສດຖະກິດ, ການຄ້າ ແລະ ອຸດສາຫະກຳ ແລະ ອວຍ ພອນໃຫ້ທ່ານຈົ່ງປະສົບຜົນສຳເລັດໃນການປະຕິບັດວຽກງານຢູ່ລາວຄັ້ງນີ້.

ພາບ-ຂ່າວ: ໄພວັນ ຫອຄ