ວັນທີ 27 ພຶດສະພາ 2024 ທີ່ກະຊວງອຸດສາຫະກໍາ ແລະ ການຄ້າ ທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກຳ ແລະ ການຄ້າ (ອຄ) ໄດ້ຕ້ອນຮັບການເຂົ້າພົບປະຂອງທ່ານ ຢາງ ໂຢຊິງ, ຮອງປະທານ ສະຫະພັນອຸດສາຫະກຳ ແລະ ການຄ້າແຫ່ງ ສປ ຈີນ ພ້ອມດ້ວຍຄະນະໃນໂອກາດທີ່ເດີນທາງມາຢ້ຽມຢາມ ແລະ ເຮັດວຽກຢູ່ ລາວ.

ໂອກາດນີ້ທ່ານ ມະໄລທອງ ກົມມະສິດ ໄດ້ສະແດງຄວາມຕ້ອນຮັບ ແລະ ຕີລາຄາສູງຕໍ່ການມາຢ້ຽມຢາມເຮັດວຽກຢູ່ ລາວ ຂອງຄະນະຜູ້ແທນ ຈາກສະຫະພັນອຸດສາຫະກໍາ ແລະ ການຄ້າ ແຫ່ງ ສປ ຈີນ ຄັ້ງນີ້ເປັນການປະກອບສ່ວນ​ເສີມ​ຂະ​ຫຍາຍ​ການ​ຮ່ວມ​ມື​ດ້ານ​ການ​ຄ້າ ແລະ ການ​ລົງ​ທຶນ ລະຫວ່າງພາກລັດ ແລະ ພາກທຸລະກິດ ຂອງ ສປປ ລາວ ແລະ ສປ ຈີນ ໃຫ້ນັບມື້ຂະຫຍາຍຕົວເພີ້ມຂຶ້ນເລື້ອຍໆ.

ການພົບປະສອງຝ່າຍຄັ້ງນີ້ ທ່ານລັດຖະມົນຕີ ກະຊວງ ອຄ ໄດ້ຍົກບັນຫາຂຶ້ນມາປຶກສາຫາລືແມ່ນສະ​ພາບ​ການ​ຮ່ວມ​ມື​ດ້ານ​ເສດ​ຖະ​ກິດ-ສັງ​ຄົມ ຂອງ​ສອງ​ປະ​ເທດ ໂດຍ​ສະ​ເພາະການ​ສົ່ງ​ເສີມດ້ານການ​ຄ້າ ແລະ ການ​ລົງ​ທຶນ ນໍາໃຊ້ທ່າແຮງພື້ນຖານໂຄງລ່າງທາງລົດໄຟລາວ-ຈີນ. ທີ່ສາມາດເຊື່ອມໂຍງເຊື່ອມຈອດກັັບພາກພື້ນ ແລະ ສາກົນ

ການພົບປະສອງຝ່າຍໄດ້ມີເປົ້າໝາຍຕົ້ນຕໍ ໃຫ້ການຊ່ວຍເຫຼືອທຸລະກິດເອກະຊົນ ໃນການປະຕິບັດນະໂຍບາຍຂອງລັດຖະບານ ແລະ ເປົ້າໝາຍ ຂໍ້ລິເລີ່ມໜຶ່ງແລວໜຶ່ງເສັ້ນທາງ, ເປັນຕົວກາງທີ່ສຳຄັນລະຫວ່າງ ພັກລັດ ແລະ ເອກະຊົນ, ຊຸກຍູ້ພາກເອກະຊົນປະກອບສ່ວນເຂົ້າໃນການພັດທະນາເສດຖະກິດ. ສະເໜີສະມະພັນ ຊ່ວຍໂຄສະນາ, ຊຸກຍູ້ໃຫ້ທຸລະກິດເອກະຊົນ ທີ່ມີສັກກະຍະພາບ ໂດຍສະເພາະ ການພັດທະນາດ້ານອຸດສາຫະກຳ, ການປຸງແຕ່ງກະສິກຳ ເຂົ້າມາຮ່ວມມືລົງທຶນຢູ່ລາວ ແລະ ຊ່ວຍໃຫ້ສິນຄ້າຈາກລາວສາມາດເຂົ້າສູຕະຫຼາດຈີນ ຜ່ານການຊ່ວຍຈັດງານພົບປະທຸລະກິດ ແລະ ເຂົ້າຮ່ວມງານວາງສະແດງອຸດສາຫະກຳ ແລະ ການຄ້າ ຢູ່ ສປ ຈີນ.

ຕອນທ້າຍທ່ານລັດຖະມົນຕີ ໄດ້ສະແດງຄວາມຂອບໃຈມາຍັງທ່ານ ຢາງ ໂຢຊິງ, ຮອງປະທານ ສະຫະພັນອຸດສາຫະກຳ ແລະ ການຄ້າແຫ່ງ ສປ ຈີນ ທີ່ໄດ້ມາພົບປະຢ້ຽມຢາມ ເພື່ອປືກສາຫາລືກ່ຽວກັບການຮ່ວມມືທາງດ້ານເສດຖະກິດ, ການຄ້າ ແລະ ອຸດສາຫະກຳ ແລະ ອວຍພອນໃຫ້ທ່ານຈົ່ງປະສົບຜົນສຳເລັດໃນການປະຕິບັດວຽກງານຢູ່ລາວຄັ້ງນີ້

ພາບ-ຂ່າວ: ສູນສະຖິຕິ ແລະ ຂໍ້ມູນຂ່າວສານ ຫອຄ