ສະຫະພັນກໍາມະບານກະຊວງອຸດສາຫະກໍາ ແລະ ການຄ້າ (ອຄ) ໄດ້ຈັດກອງປະຊຸມ ສະຫຼຸບຂະບວນການແຂ່ງຂັນ, ຢັ້ງຢືນ ແລະ ຮັບຮອງກໍາມະບານ 5 ເປັນເຈົ້າ ປະຈໍາປີ 2023 ຂອງສະຫະພັນກໍາມະບານກະຊວງ ອຄ ໃນວັນທີ 5 ມິຖຸນາ 2024 ທີ່ກະຊວງ ອຄ ໂດຍການເປັນປະທານຂອງສະຫາຍ ນາງ ຈັນສຸກ ແສງພະຈັນ ຮອງເລຂາຄະນະບໍລິຫານງານພັກ ກະຊວງ ອຄ, ຜູ້ຊີ້ນໍາສາມອົງການຈັດຕັ້ງມະຫາຊົນ, ຮອງລັດຖະມົນຕີກະຊວງ ອຄ ໂດຍມີຜູ້ເຂົ້າຮ່ວມຈາກຄະນະບໍລິຫານງານສະຫະພັນກໍາມະບານກະຊວງ ອຄ, ຕາງໜ້າສະຫະພັນ ແລະ ກໍາມະບານຮາກຖານ ທີ່ຂຶ້ນກັບສະຫະພັນກໍາມະບານກະຊວງ ອຄ ເຂົ້າຮ່ວມ.
ຈຸດປະສົງຂອງກອງປະຊຸມ ເພື່ອຮັບຟັງບົດສະຫຼຸບການຈັດຕັ້ງປະຕິບັດວຽກງານຂໍ້ແຂ່ງຂັນ 5 ເປັນເຈົ້າ ປະຈໍາປີ 2023 ແລະ ທິດທາງແຜນການປະຈໍາປີ 2024 ຂອງສະຫະພັນກໍາມະບານກະຊວງ ອຄ; ຈັດພິທີມອບ-ຮັບໃບຢັ້ງຢືນໃຫ້ສະຫະພັນກໍາມະບານກະຊວງ ອຄ ເປັນສະຫະພັນກໍາມະບານ 5 ເປັນເຈົ້າປະຈໍາປີ 2023 ໂດຍໄດ້ຮັບການຢັ້ງຢືນ ແລະ ຮັບຮອງກໍາມະບານ 5 ເປັນເຈົ້າ ໄດ້ 3 ປີ ລຽນຕິດນັບແຕ່ປີ 2021, 2022 ແລະ 2023 ເຊິ່ງໄດ້ຮັບການຢັ້ງຢືນຈາກສູນກາງສະຫະພັນກໍາມະບານລາວ; ຈັດພິທີຢັ້ງຢືນໃຫ້ສະຫະພັນກໍາມະບານ ແລະ ກໍາມະບານຮາກຖານທີ່ຂຶ້ນກັບສະຫະພັນກໍາມະບານກະຊວງ ອຄ ເປັນກໍາມະບານ 5 ເປັນເຈົ້າປະຈໍາປີ 2023 ຊຶ່ງໄດ້ຮັບການຢັ້ງຢືນຈາກສະຫະພັນກໍາມະບານກະຊວງ ອຄ; ຈັດພິທີຢັ້ງຢືນໃຫ້ບຸກຄົນສະມາຊິກກໍາມະບານ ເປັນສະມາຊິກກໍາມະບານ 5 ເປັນເຈົ້າ ທີ່ສັງກັດຢູ່ 03 ສະຫະພັນກໍາມະບານ ແລະ 20 ກໍາມະບານຮາກຖານທີ່ຂຶ້ນກັບສະຫະພັນກໍາມະບານກະຊວງ ອຄ ເປັນກໍາມະບານ 5 ເປັນເຈົ້າປະຈໍາປີ 2023 ເຊິ່ງໄດ້ຮັບການຢັ້ງຢືນຈາກສະຫະພັນກໍາມະບານກະຊວງ ອຄ ; ໄດ້ຮັບຟັງການເຜີຍແຜ່ແຈ້ງການ ສະບັບເລກທີ 733/ສກລ, ລົງວັນທີ 4 ມິຖຸນາ 2024 ກ່ຽວກັບການລົງຕິດຕາມ, ຊຸກຍູ້ການເຄື່ອນໄຫວວຽກງານການກະກຽມດໍາເນີນກອງປະຊຸມໃຫຍ່ 3 ຂັ້ນຂອງກໍາມະບານ, ບົດແນະນໍາເພີ່ມເຕີມ ສະບັບເລກທີ 036/ສກລ.ອຄ ລົງວັນທີ 30 ເມສາ 2024 ກ່ຽວກັບ ການກະກຽມຈັດຕັ້ງດໍາເນີນກອງປະຊຸມໃຫຍ່ຂັ້ນຂອງຕົນ.
ຄຽງຄູ່ກັບຜົນງານທີ່ຍາດມາໄດ້ຍັງມີບາງດ້ານໃນການຈັດຕັ້ງປະຕິບັດວຽກງານຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານກະຊວງ ອຄ ຈະຕ້ອງໄດ້ສືບຕໍ່ເຮັດໃຫ້ດີຂຶ້ນມີ 4 ດ້ານຄື 1. ຂະບວນການຂໍ້ແຂ່ງຂັນ 5 ເປັນເຈົ້າ ຂອງສະຫະພັນກໍາມະບານກະຊວງ ຕ້ອງຕິດພັນກັບຂະບວນການແຂ່ງຂັນຮັກຊາດ ແລະ ພັດທະນາ, 2. ເປັນເຈົ້າການ ຝຶກຝົນຫຼໍ່ຫຼອມ ທາງດ້ານການເມືອງ-ແນວຄິດ, 3. ເປັນເຈົ້າການປະຕິບັດກົດໝາຍ ແລະ ລະບຽບການຂອງລັດ, ແລະ 4. ເອົາໃຈໃສ່ຕິດຕາມ, ກວດກາ ແລະ ຊຸກຍູ້ວຽກງານຮອບດ້ານຂອງສະຫະພັນກໍາມະບານກະຊວງອຸດສາຫະກໍາ ແລະ ການຄ້າ. “ມີການນໍາພາ ຕ້ອງມີການຕິດຕາມ ກວດກາ” ມີການຜັນຂະຫຍາຍມະຕິກອງປະຊຸມໃຫຍ່ຂອງພັກ, ມະຕິກອງປະຊຸມຄົບຄະນະບໍລິຫານງານສູນກາງພັກ, ແຜນພັດທະນາເສດຖະກິດ-ສັງຄົມ, ມະຕິກອງປະຊຸມໃຫຍ່ຂອງສະຫະພັນກໍາມະບານກະຊວງ ອຄ.
ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ
