ໃນລະຫວ່າງວັນທີ 27-31 ພຶດສະພາ 2024 ຜ່ານມາ, ພະເເນກອຸດສາຫະກຳ ແລະ ການຄ້າ ແຂວງອຸດົມໄຊ ໄດ້ລົງເຄື່ອນໄຫວ ຈັດຝຶກອົບຮົມ ກ່ຽວກັບວຽກງານຊັບສິນທາງປັນຍາ, ມາດຕະຖານ ແລະ ວັດແທກ ໃຫ້ພະນັກງານ ຫ້ອງການອຸດສາຫະກໍາ ແລະ ການຄ້າ ເມືືອງ ແລະ ຜູ້ປະກອບການ ຢູ່ 3 ເມືອງ ຄື: ເມືອງແບງ, ເມືອງຮຸນ ແລະ ເມືອງປາກແບງ, ໂດຍການເປັນປະທານຂອງ ທ່ານ ມະນີກອນ ກິດຕິວົງ ຫົວໜ້າຂະເເໜງຊັບສິນທາງປັນຍາ, ມາດຕະຖານ ແລະ ວັດແທກ, ພະແນກ ອຄ ແຂວງອຸດົມໄຊ.
ການຝຶກອົບຮົມຄັ້ງນີ້ ມີບັນດາ ທ່ານຫົວໜ້າຫ້ອງການ ອຸດສາຫະກຳ ແລະ ການຄ້າ ເມືອງ 3 ເມືອງ, ຕາງໜ້າສະພາການຄ້າ ແລະ ອຸດສາຫະກຳ ເມືອງ, ນັກວິທະຍາກອນຈາກ ພະແນກ ອຄ, ແຂວງອຸດົມໄຊ, ພະນັກງານວິຊາການຫ້ອງການ ອຄ ເມືອງ ແລະ ຜູ້ປະກອບການ ເຂົ້າຮ່ວມ.
ຈຸດປະສົງການຝຶກອົບຮົມຄັ້ງນີ້ ເພື່ອເເນ່ໃສ່ສ້າງຄວາມເຂົ້າໃຈໃຫ້ພະນັກງານ ຂັ້ນເມືອງໄດ້ເຂົ້າໃຈຕໍ່ກັບການຄຸ້ມຄອງວຽກງານຊັບສິນທາງປັນຍາ, ມາດຕະຖານ ແລະ ວັດແທກ ຕາມການເເບ່ງຂັ້ນຄຸ້ມຄອງ ເຊັ່ນ: ການຄຸ້ມຄອງວຽກງານຊັບສິນ ແລະ ວັດແທກ ຂັ້ນເມືອງ, ການຊຸກຍູ້ສົ່ງເສີມໃຫ້ຜູ້ປະກອບການ, ການຮັບຄຳຮ້ອງເຄື່ອງໝາຍການຄ້າ, ແຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ, ສຳລັບຜູ້ປະກອບການ ເເມ່ນໄດ້ສ້າງຄວາມເຂົ້າໃຈຕໍ່ ຍຸດທະສາດການສ້າງ ແລະ ການຈົດທະບຽນເຄື່ອງໝາຍການຄ້າ, ການເເຈ້ງຂໍ້ມູນລິຂະສິດ ແລະ ສິດກ່ຽວຂ້ອງກັບລິຂະສິດ, ການປົກປ້ອງສິດທາງດ້ານຊັບສິນທາງປັນຍາຂອງຕົນ ເພື່ອເຮັດໃຫ້ສິນຄ້າມີມູນຄ່າເພີ້ມ, ມີຄວາມຍືນຍົງ ແລະ ສາມາດແຂ່ງຂັນໃນຕະຫຼາດໄດ້ ໃນທາງການຄ້າ.
ພ້ອມດຽວກັນນັ້ນ ກໍໄດ້ລົງຝຶກປະຕິບັດຕົວຈິງ ກ່ຽວກັບການກວດທຽບຫົວຈ່າຍນ້ຳມັນເຊື້ອໄຟ, ການກວດກາສິນຄ້າຫູ້ມຫໍ່ ແລະ ການກວດທຽບຊິງຊັ່ງ ໃຫ້ພະນັກງານຫ້ອງການອຸດສາຫະກຳ ແລະ ການຄ້າເມືອງ ໃຫ້ມີຄວາມສຳນິສຳນານ ໃນການຈັດຕັ້ງປະຕິບັດວຽກງານຢູ່ຂັ້ນເມືອງ, ການຝຶກອົບຮົມຄັ້ງນີ້ ໄດ້ດຳເນີນເປັນເວລາ 4 ວັນຈິງສຳເລັດລົງ.
ຮູບພາບ ແລະ ຂ່າວ: ຂະເເໜງຊັບສິນທາງປັນຍາ, ມາດຕະຖານ ແລະ ວັດແທກ ແຂວງອຸດົມໄຊ
