ໃນວັນທີ 31 ພຶດສະພາ 2024, ທີ່ກົມຊັບສິນທາງປັນຍາ (ກຊປ), ກະຊວງອຸດສາຫະກຳ ແລະ ການຄ້າ, ມີກອງປະຊຸມໃຫຍ່ ຄັ້ງທີ III, ຂອງໜ່ວຍສະຫະພັນແມ່ຍິງ, ກົມຊັບສິນທາງປັນຍາ, ໃຫ້ກຽດເປັນປະທານຮ່ວມໂດຍ ສະຫາຍ ໄຊສົມເພັດ ນໍລະສິງ, ກຳມະການຄະນະບໍລິຫານງານພັກ ກະຊວງ ອຄ, ເລຂາໜ່ວຍພັກ ກົມຊັບສິນທາງປັນຍາ, ມີສະຫາຍ ນາງ ສົມໝາຍ ພົມມຸນີວົງ, ປະທານສະຫະພັນແມ່ຍິງ ກະຊວງອຸດສາຫະກໍາ ແລະ ການຄ້າ, ສະຫາຍ ນາງ ທິບພະຈັນ ທິບພະວອນ ຫົວໜ້າໜ່ວຍສະຫະພັນແມ່ຍິງ, ກົມຊັບສິນທາງປັນຍາ.
ກອງປະຊຸມໃນຄັງນີ້ ມີສະຫາຍ ໄຊບັນດິດ ໄຊຍະວົງຄໍາດີ, ກໍາມະການໜ່ວຍພັກ ຜູ້ຊີ້ນໍາວຽກງານ 3 ອົງການຈັດຕັ້ງມະຫາຊົນ, ກຊປ, ມີຜູ້ຕາງໜ້າໜ່ວຍກໍາມະບານ, ຕາງໜ້າໜ່ວຍຊາວໜຸ່ມ, ບັນດາ ສະມາຊິກ ໜ່ວຍສະຫະພັນແມ່ຍິງ ພາຍໃນກົມ ແລະ ມີຜູ້ຕາງໜ້າໜ່ວຍສະຫະພັນແມ່ຍິງອ້ອມຂ້າງ ກະຊວງອູດສາຫະກຳ ແລະ ການຄ້າ ເຂົ້າຮ່ວມທັງໝົດ 36 ສະຫາຍ.
ສະຫາຍ ນາງ ທິບພະຈັນ ທິບພະວອນ, ຫົວໜ້າຫົວໜ່ວຍສະຫະພັນແມ່ຍິງ ກຊປ, ກໍໄດ້ກ່າວເປີດກອງປະຊຸມ ແລະ ຜ່ານບົດລາຍງານການເມືອງ ຕໍ່ກອງປະຊຸມໃຫຍ່ ຄັ້ງທີ III, ຂອງຫນ່ວຍສະຫະພັນແມ່ຍິງກົມ ໂດຍສະເພາະ ການສະຫຼຸບຕີລາຄາການຊີ້ນຳ-ນຳພາ ແລະ ການເຄື່ອນໄຫວວຽກງານຂອງ ໜ່ວຍສະຫະພັນແມ່ຍິງ ກຊປ, ຕະຫຼອດໄລຍະເວລາ 5 ປີຜ່ານມາ ແລະ ທິດທາງແຜນການໃນຕໍ່ໜ້າ ຂອງໜ່ວຍສະຫະພັນແມ່ຍິງ ກຊປ.
ສະຫາຍ ນາງ ແກ້ວວິໄລ ພິມມະແສງ, ຮອງຫົວໜ້າໜ່ວຍສະຫະພັນແມ່ຍິງ ກຊປ, ໄດ້ຜ່ານບົດສໍາຫຼວດນຳພາ ຂອງໜ່ວຍສະຫະພັນແມ່ຍິງ, ພ້ອມນັ້ນ ໃນກອງປະຊຸມ ກໍໄດ້ມີການປະກອບຄຳຄິດເຫັນ ຕໍ່ບົດລາຍງານການເມືອງ ແລະ ບົດສໍາຫລວດນຳພາ ຂອງໜ່ວຍສະຫະພັນແມ່ຍິງ ກຊປ, ເພື່ອໃຫ້ບົດດັ່ງກ່າວ ມີເນື້ອໃນຄົບຖ້ວນ ແລະ ສົມບູນຍິ່ງຂຶ້ນ. ແລະໃນກອງປະຊຸມ ມີຄວາມເປັນເອກະພາບສູງ ຕໍ່ບົດລາຍງານ ພ້ອມທັງ ໄດ້ຮັບຮອງເອົາບົດລາຍງານ ດັ່ງກ່າວ.
ໃນກອງປະຊຸມຄັ້ງນີ້ ຄະນະໜ່ວຍສະຫະພັນແມ່ຍິງ ຊຸດເກົ່າທັງ 3 ສະຫາຍ ກໍໄດ້ຂຶ້ນກ່າວອຳລາຫນ້າທີ່, ພ້ອມນັ້ນ ໃນກອງປະຊຸມ ກໍໄດ້ຈັດການເລືອກຕັ້ງເພື່ອເລືອກເອົາ ຄະນະສະຫະພັນແມ່ຍິງ ຊຸດໃໝ່, ຊຶ່ງມີຜູ້ລົງຮັບສະໝັກເລືອກຕັ້ງ ຈຳນວນ 5 ສະຫາຍ ແລະ ເລືອກໄດ້ ຈຳນວນ 3 ສະຫາຍ ຄື: 1, ສະຫາຍ ນ. ທິບພະຈັນ ທິບພະວອນ ເປັນຫົວໜ້າໜ່ວຍສະຫະພັນແມ່ຍິງ, 2, ສະຫາຍ ນ. ມະນີລາ ພົມມະລາດ ຮອງຫົວໜ້າໜ່ວຍສະຫະພັນແມ່ຍິງ ແລະ ສະຫາຍ ນ. ດາລາວັນ ຂັດຕິຍະວົງ, ເປັນຄະນະໜ່ວຍສະຫະພັນແມ່ຍິງ, ກົມຊັບສິນທາງປັນຍາ.
ສະຫາຍ ໄຊສົມເພັດ ນໍລະສິງ, ໄດ້ມີຄໍາຄິດເຫັນຕໍ່ກອງປະຊຸມ ຊຶ່ງສະຫາຍ ໄດ້ຍ້ອງຍໍຊົມເຊີຍມາຍັງຄະນະໜ່ວຍສະຫະພັນແມ່ຍິງ ຊຸດເກົ່າ ທີ່ໄດ້ສຸມໃສ່ທຸກເຮື່ອແຮງ ແລະ ສະຕິປັນຍາ ໃນການຊີ້ນໍາ-ນໍາພາ ໜ່ວຍສະຫະພັນແມ່ຍິງ ກຊປໃນໄລຍະຜ່ານມາ, ພ້ອມນັ້ນ ສະຫາຍ ກໍໄດ້ສະແດງຄວາມຍິນດີ ແລະ ຊົມເຊີຍ ຕໍ່ຄະນະໜ່ວຍສະຫະພັນແມ່ຍິງຊຸດໃໝ່.
ໃນກອງປະຊຸມໃນຄັ້ງນີ້ ເປັນບາດກ້າວທີ່ສໍາຄັນ ໃຫ້ກັບຄະນະໜ່ວຍສະຫະພັນແມ່ຍິງ ກຊປ ຊຸດໃໝ່ ໃນການປະຕິບັດໜ້າທີ່ການເມືອງຂອງຕົນ ດ້ວຍຄວາມຮັບຜິດຊອບສູງ ກໍຄື ເຮັດສຳເລັດຕາມແຜນການ ຂອງສະຫະພັນແມ່ຍິງ, ກະຊວງອຸດສາຫະກໍາ ແລະ ການຄ້າ ວາງອອກ ແລະ ເປັນກໍາລັງແຮງປະກອບສ່ວນເຂົ້າໃນການກໍ່ສ້າງ, ຊີ້ນໍາ-ນໍາພາ ສະມາຊິກແມ່ຍິງ ກໍຄື ສະມາຊີກພັກ ຂອງກົມຊັບສິນທາງທາງປັນຍາ ໃຫ້ນັບມື້ນັບມີຄວາມເຂັ້ມແຂງຂື້ນທາງດ້ານວຽກງານວິຊາສະເພາະ ແລະ ວຽກງານການເມືອງແນວຄິດ.
ສະຫາຍ ໄຊສົມເພັດ ນໍລະສິງ, ມີຄວາມເຊື້ອໜັ້ນ ແລະ ຕີລາຄາສູງ ຕໍ່ຄວາມຮັບຜິດຊອບ ຂອງຄະນະໜ່ວຍສະຫະພັນແມ່ຍິງຊຸດໃໝ່ ພ້ອມດ້ວຍສະມາຊີກແມ່ຍິງກົມທຸກສະຫາຍ ຈະສືບຕໍ່ຮັກສາມູນເຊື້ອຄວາມສາໝັກຄີເປັນປືກແຜນ ໃນການສ້າງສາ ແລະ ພັດທະນາວຽກງານຂອງກົມ ໃຫ້ນັບມື້ນັບພັດທະນາຂື້ນ ເພື່ອຮອງຮັບໜ້າທີ່ການເມືອງຕາມແນວທາງຂອງ ພັກ-ລັດ ວາງອອກ ໄວ້ເປັນຢ່າງດີ.
ໃນໂອາດນີ້ ສະຫາຍ ນາງ ສົມໝາຍ ພົມມຸນີວົງ, ໄດ້ມີຄຳເຫັນໂອ້ລົມຕໍ່ກອງປະຊຸມ ຊຶ່ງ ສະຫາຍ ໄດ້ຍ້ອງຍໍຊົມເຊີຍມາຍັງຄະນະໜ່ວຍແມ່ຍິງ ຊຸດເກົ່າ ທີ່ໄດ້ສຸມໃສ່ທຸກເຮື່ອແຮງ ແລະ ສະຕິປັນຍາ ໃນການຊີ້ນໍາ-ນໍາພາ ໜ່ວຍສະຫະພັນແມ່ຍິງກົມ ໃນໄລຍະ 2 ສະໃໝ່ ຜ່ານມາ, ຊຶ່ງສະແດງອອກຢູ່ໃນບົດລາຍງານການເມືອງ, ບົດສໍາຫຼວດການຊີ້ນໍາ-ນໍາພາ ຂອງໜ່ວຍ ເຫັນໄດ້ຜົນສໍາເລັດອັນໃຫ່ຍຫຼວງ ແລະ ຫຼາຍດ້ານທີ່ສາມາດເປັນຜົນງານອັນໂດດເດັ່ນ ໃຫ້ແກ່ການເຄື່ອນໄຫວວຽກງານຂອງກົມ, ກໍຄື ຂອງກະຊວງອຸດສາຫະກໍາ ແລະ ການຄ້າ ຂອງພວກເຮົາ.
ພ້ອມດຽວກັນນັ້ນ ສະຫາຍ ກໍໄດ້ສະແດງຄວາມຍິນດີ ແລະ ຊົມເຊີຍ ຕໍ່ຄະນະໜ່ວຍແມ່ຍິງຊຸດໃໝ່ ທີ່ໄດ້ຮັບຄວາມໄວ້ວາງໃຈຈາກເອື້ອຍນ້ອງແມ່ຍິງຂອງກົມ ໃນການຮັບຜິດຊອບໜ້າວຽກງານທີ່ມີກຽດນີ້, ພ້ອມນັ້ນ ສະຫາຍ ກໍໄດ້ຮຽກຮ້ອງມາຍັງ ຄະນະຊຸດໃໝ່ ແລະ ສະມາຊິກ ພາຍໃນໜ່ວຍສະຫະພັນແມ່ຍິງ ກົມດັ່ງກ່າວ ຈົ່ງເພີ່ມທະວີຄວາມເອົາໃຈໃສ່ໃນບາງດ້ານເຊັ່ນ: ສືບຕໍ່ຮັກສາມູນເຊື້ອ ເປັນກ້ອນກໍາລັງແຮງ ໃນການຈັດຕັ້ງວຽກງານ ຂອງຂະແໜງອຸດສາຫະກໍາແລະ ການຄ້າຂອງພວກເຮົາຕໍ່ໄປ; ໃຫ້ເປັນແບບຢ່າງທີ່ດີໃຫ້ແກ່ເອື້ອຍນ້ອງມະຫາຊົນ ພາຍໃນກົມກອງ, ກໍຄືກະຊວງ; ມີການແບ່ງປັນໜ້າວຽກລະອຽດໃນການຈັດຕັ້ງປະຕິບັດໜ້າທີ່ອົງການຈັດຕັ້ງແມ່ຍິງ; ກໍານົດແຜນການເຄື່ອນວຽກງານສະເພາະທີ່ເປັນຂອງອົງການຈັດຕັ້ງແມ່ຍິງ; ສືບຕໍ່ຈັດຕັ້ງປະຕິບັດຂໍ້ແຂ່ງຂັນ 3 ດີ ຮ່ວມກັບບັນດາໜ່ວຍແມ່ຍິງທີ່ຂຶ້ນກັບກະຊວງອຸດສາຫະກິດ ແລະ ການຄ້າ; ສືບຕໍ່ສ້າງແຜນຝຶກອົບຮົມສ້າງຄວາມເຂັ້ມແຂງໃຫ້ເອື້ອຍນ້ອງແມ່ຍິງພາຍໃນກົມໃຫ້ສາມາດຈັດຕັ້ງປະຕິບັດວຽກງານຄຽງບ່າຄຽງໄຫລ່ ກັບອ້າຍນ້ອງຊາຍໄດ້; ສືບຕໍ່ເຄື່ອນໄຫວຮ່ວມກັບອົງການຈັດຕັ້ງຕ່າງໆໃຫ້ມີຂະບວນການອັນພົດຟຶ້ນ ແລະ ສືບຕໍ່ຈັດຕັ້ງປະຕິບັດວຍກງານອື່ນໆຕາມການມອບໝາຍຂອງຂັ້ນເທິງໃຫ້ສໍາເລັດຕາມການມອບໝາຍ.
ຂ່າວ ແລະ ຮູບພາບ: ກົມຊັບສິນທາງປັນຍາ
