ກອງປະຊຸມຫາລື ແລະ ແລກປ່ຽນທາງດ້ານວິຊາການກ່ຽວກັບການສຶກສາໃນຫົວຂໍ້ ຄວາມສະເໜີພາບລະຫວ່າງຍິງ-ຊາຍ ແລະ ຜູ້ເສຍອົງຄະ ຕໍ່ວຽກງານການພັດທະນາການຄ້າເອເລັກໂຕນິກ ພາຍຫຼັການແຜ່ລະບາດຂອງພະຍາດໂຄວິດ-19 ກໍລະນີສຶກສາຂອງນະຄອນຫຼວງວຽຈັນ ແລະ ແຂວງຫລວງພະບາງ, ສປປ ລາວ ຈັດຂື້ນວັນທີ 13 ມິຖຸນາ 2024, ທີ່ໂຮງແຮມເມືອງແທັງ ນະຄອນຫຼວງວຽງຈັນ ໂດຍການເປັນປະທານ ຂອງ ທ່ານ ນາງ ຈັນສຸກ ແສງພະຈັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ມີຕາງໜ້າຈາກສະຖານທູດອົດສະຕາລີປະຈໍາລາວ, ຫົວໜ້າສະຖາບັນອຸດສາຫະກໍາ ແລະ ການຄ້າ, ຜູ້ຈັດການໂຄງການສົ່ງເສີມການຄ້າເພື່ອການພັດທະນາລະດັບພາກພື້ນ RT4D ແລະ ຂະ ແໜງການກ່ຽວຂ້ອງເຂົ້າຮ່ວມ.
ທ່ານຍັງໄດ້ກ່າວວ່າ: ການຄ້າເອເລັກໂຕຣນິກ ໂດຍສະເພາະແມ່ນການຄ້າຂາຍອອນລາຍ ຢູ່ ສປປ ລາວ ເລີ່ມມີບົດບາດສໍາຄັນ ແລະ ຂະຫຍາຍຕົວຫລາຍໃນໄລຍະການແຜ່ລະບາດຂອງພະຍາດໂຄວິດ-19 ເນື່ອງຈາກມີການຈຳກັດການເດີນທາງໄປມາ ແລະ ພາຍຫລັງການແຜ່ລະບາດຂອງໂຄວິດ ກໍເຫັນວ່າມີການສືບຕໍ່ຂະຫຍາຍຕົວຫຼາຍກວ່າເກົ່າ ເຊິ່ງສະແດງອອກມີຈຳນວນຫຼາຍບໍລິສັດທີ່ເຂົ້າມາຂໍໃບອະນຸຍາດດຳ ເນີນທຸລະກິດຄ້າຂາຍອອນລາຍ ແລະ ຫຼາຍໆເຟດຟອມກໍເລີ່ມເກີດຂຶ້ນເພື່ອຮອງຮັບການຄ້າຂາຍອອນລາຍ. ເຫັນໄດ້ ຄວາມສໍາຄັນຂອງວຽກງານການຄ້າທາງເອເລັກໂຕຣນິກ ໂດຍສະເພາະແມ່ນການສ້າງເງື່ອນໄຂໃຫ້ເກີດຄວາມສະເໝີພາບບົດບາດຍິງຊາຍ ແລະ ກຸ່ມຄົນທີ່ມີຄວາມພິການທາງຮ່າງກາຍໃຫ້ສາມາດດຳເນີນອາຊີບນີ້ໄດ້, ສະຖາບັນອຸດສາຫະກຳ ແລະ ການຄ້າ ຈຶ່ງໄດ້ສະເໜີໂຄງການສຶກສາຄົ້ນຄວ້າໃນຫົວຂໍ້ດັ່ງກ່າວ ເຊິ່ງໄດ້ຮັບການສະໜັບສະໜູນຈາກໂຄງການສົ່ງເສີມການຄ້າເພື່ອການພັດທະນາລະດັບພາກພື້ນ RT4D.
ຈຸດປະສົງຂອງການສຶກສາຂອງໂຄງການ ແມ່ນເພື່ອສຶກສາຄວາມສະເໝີພາບລະຫວ່າງຍິງ-ຊາຍ ແລະ ຜູ້ພິການທາງດ້ານຮ່າງກາຍ ຕໍ່ກັບວຽກງານການພັດທະນາການຄ້າເອລັກໂຕຣນິກ ພາຍຫຼັງການແຜ່ລະບາດຂອງພະ ຍາດໂຄວິດ-19 ໂດຍເຮັດການສຶກສາຢູ່ນະຄອນຫຼວງວຽງຈັນ ແລະ ແຂວງຫຼວງພະບາງ ແລ້ວສະເໜີແນະທາງດ້ານນະໂຍບາຍໃນຕໍ່ໜ້າໃນການສົ່ງເສີມວຽກງານດັ່ງກ່າວໃຫ້ມີປະສິດທິພາບດີຂຶ້ນກວ່າເກົ່າ.
ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ
