ຕອນບ່າຍຂອງວັນທີ 13 ມິຖຸນາ  2024 ທີ່ຫ້ອງປະຊຸມໃຫຍ່ຂອງສະພາການຄ້າ ແລະ ອຸດສາຫະກຳ ແຫ່ງຊາດລາວ ໄດ້ຈັດກອງປະຊຸມ ເຜີຍແຜ່ນິຕິກໍາ ກ່ຽວກັບການຈັດຕັ້ງປະຕິບັດວຽກງານທະບຽນວິສາຫະກິດ ສະບັບປັບປຸງປີ 2022 ໃຫ້ພາກທຸລະກິດ, ຫົວໜ່ວຍທຸລະກິດ ຂອງສະພາການຄ້າ ແລະ ອຸດສາຫະກຳ ແຫ່ງຊາດລາວ ໂດຍການເປັນປະທານຮ່ວມຂອງ ທ່ານ ອະພິສິດ ແສງສຸລິວົງ, ຫົວໜ້າກົມທະບຽນວິສາຫະກິດ, ກະຊວງອຸດສາຫະກໍາ ແລະ ການຄ້າ ແລະ ທ່ານ ວັນທອງ ສິດທິກຸນ, ຮອງປະທານສະພາການຄ້າ ແລະ ອຸດສາຫະກຳ ແຫ່ງຊາດລາວ ມີບັນດາທ່ານຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງຫົວໜ້າພະແນກ, ປະທານສະມາຄົມນັກທຸລະ ກິດ, ຮອງປະທານສະມາຄົມນັກທຸລະກິດ, ບັນດາທ່ານຜູ້ປະກອບການ ພ້ອມດ້ວຍພະນັກງານວິ ຊາການຈາກສະພາການຄ້າ ແລະ ອຸດສາຫະກຳແຫ່ງຊາດ ແລະ ພາກສ່ວນກ່ຽວຂ້ອງເຂົ້າຮ່ວມ.    ຈຸດປະສົງຂອງການກອງປະຊຸມຄັ້ງນີ້ ແມ່ນເປັນການເຜີຍແຜ່ ບາງຈຸດພົ້ນເດັ່ນ ຫຼື ຈຸດພິເສດ ຂອງກົດໝາຍວ່າດ້ວຍວິສາຫະກິດ ສະບັບປັບປຸງ ປີ 2022 ໃຫ້ບັນດາທ່ານ ຜູ້ຕາງໜ້າຂອງຂະແໜງການກ່ຽວຂ້ອງ ຫົວໜ້ວຍທຸລະກິດຜູ້ປະກອບການ ແລະ ສະພາການຄ້າ ແລະ ອຸດສາຫະກຳ ແຫ່ງຊາດລາວ ເພື່ອໃຫ້ມີຄວາມເຂົ້າໃຈເປັນເອກະພາບ ໃນການຈັດຕັ້ງປະຕິບັດວຽກງານທະບຽນວິສາຫະກິດ ຕາມກົດໝາຍສະບັບປັບປຸງດັ່ງກ່າວ.

ທ່ານຫົວໜ້າກົມທະບຽນວິສາຫະກິດ ໄດ້ກາວວ່າ: ກອງປະຊຸມຄັ້ງນີ້ ແມ່ນເປັນການເຜີຍແຜ່ ບາງຈຸດພົ້ນເດັ່ນ ຫຼື ຈຸດພິເສດ ຂອງກົດໝາຍວ່າດ້ວຍວິສາຫະກິດ ສະບັບປັບປຸງ ປີ 2022. ຊຶ່ງກອງການເຜີຍແຜ່ໃນຄັ້ງນີ້, ກົມທະບຽນວິສາຫະກິດ ໃນນາມຄະນະທີ່ຮັບຜິດຊອບ ຈະໄດ້ນຳເອົາເນື້ອໃນສຳຄັນ ໃນກົດໝາຍວ່າດ້ວຍວິສາຫະກິດ ສະບັບປັບປຸງປີ 2022 ມາເຜີຍແຜ່ ເປັນຕົ້ນແມ່ນ: ຫຼັກການ ແລະ ພາບລວມຂອງການຂຶ້ນທະບຽນວິສາຫະກິດ ຕາມກົດໝາຍໃໝ່, ການປ່ຽນແປງເນື້ອໃນທະບຽນວິສາຫະກິດ, ການຍຸບເລີກວິສາຫະກິດ ລວມທັງຮູບແບບ ໃບທະບຽນວິສາຫະກິດ ທີ່ປັບປຸງໃໝ່.

ພາຍຫລັງສຳເລັດການເຜີຍແຜ່ນິຕິກໍາໃນຄັ້ງນີ້ແລ້ວ ຮຽກຮ້ອງມາຍັງບັນດາທ່ານຜູ້ເຂົ້າຮ່ວມໃຫ້ມີຄວາມເປັນເອກະພາບ ໃນຈັດຕັ້ງປະຕິບັດ ຫລັກການສ້າງຕັ້ງວິສາຫະກິດ ຕາມກົດ ໝາຍ ວ່າດ້ວຍວິສາຫະກິດ ສະບັບປັບປຸງ ປີ2022.

ຂ່າວ-ພາບ: ໄພວັນ ສູນສະຖິຕິ ແລະ ຂໍ້ມູນຂ່າວສານ ຫອຄ