ກອງປະຊຸມ ສະພາປະຊາຄົມເສດຖະກິດອາຊຽນ ຄັ້ງທີ 24  ຈັດຂຶ້ນໃນວັນທີ 7 ຕຸລາ 2024 ທີ່ໂຮງແຮມ ລາດຊະວົງ ວັນດ້າ ວິສຕ້າ ນະຄອນຫຼວງວຽງຈັນ ໂດຍການ ເປັນປະທານຂອງທ່ານ ມະໄລທອງ ກົມມະສິດ ລັດຖະມົນຕີກະຊວງອຸດສາຫະກໍາ ແລະ ການຄ້າ ທັງເປັນ ລັດຖະມົນຕີ ສະພາປະຊາຄົມເສດຖະກິດອາຊຽນຂອງ ສປປ ລາວ, ມີບັນດາທ່ານ ລັດຖະມົນຕີສະພາປະຊາຄົມເສດຖະກິດອາຊຽນ, ທ່ານ ເລຂາທິການໃຫຍ່ອາຊຽນ, ທ່ານ ລັດຖະມົນຕີກະຊວງເສດຖະກິດ ຕີມໍເລສເຕ, ບັນດາທ່ານຫົວໜ້າຄະນະຜູ້ແທນຂອງປະເທດສະມາຊິກອາຊຽນ ພ້ອມດ້ວຍຄະນະເຂົ້າຮ່ວມ ລວມ ທັງໝົດ 200​ ທ່ານ.

ກອງປະຊຸມຄັ້ງນີ້ ຖືວ່າເປັນຄັ້ງທີສາມ ພາຍຫຼັງທີ່ໄດ້ມີການພົບປະກັນ ໃນກອງປະຊຸມລັດຖະມົນຕີເສດຖະກິດອາຊຽນ ຄັ້ງທີ 56 ໃນເດືອນ ກັນຍາ ທີ່ຜ່ານມາ. ການພົບປະໃນກອງປະຊຸມຄັ້ງນີ້ ສະແດງເຖິງຄວາມໝາຍໝັ້ນຂອງສະມາຊິກອາຊຽນ ທີ່ຈະສືບຕໍ່ຮ່ວມກັນຈັດຕັ້ງປະຕິບັດວິໄສທັດການສ້າງປະຊາຄົມເສດຖະກິດອາຊຽນ 2025 ແລະ ວິໄສທັດການສ້າງປະຊາຄົມເສດຖະກິດອາຊຽນຮອດປີ 2045.

ກອງປະຊຸມໃນຄັ້ງນີ້ ແມ່ນມີຄວາມໝາຍສໍາຄັນຢ່າງຍິ່ງ ເພືື່ອເປັນການກະກຽມໃຫ້ແກ່ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ທີ່ຈະຈັດຂື້ນ ໃນລະຫວ່າງ ວັນທີ 8-11 ຕຸລາ 2024 ທີ່ ນະຄອນຫຼວງວຽງຈັນ. ກອງປະຊຸມ ໄດ້ພ້ອມກັນປຶກສາຫາລື ກ່ຽວກັບ ສະພາບການພັດທະນາເສດຖະກິດໃນພາກພື້ນ ແລະ ສາກົນ, ການຈັດຕັ້ງປະຕິບັດບັນ ດາແຜນວຽກບູລິມະສິດເສດຖະກິດອາຊຽນ ປີ 2024, ການພັດທະນາເສດຖະກິດແບບຍືນຍົງ ແລະ ການຫັນເປັນດິຈິຕອນໃນອາຊຽນ. ນອກຈາກນັ້ນ, ກອງປະຊຸມ ຈະໄດ້ຮັບຊາບ ແລະ ແລກປ່ຽນທັດສະນະ ກ່ຽວກັບ ການສ້າງແຜນຍຸດທະສາດປະຊາຄົມເສດຖະກິດອາຊຽນ ໄລຍະປີ 2026-2030.

ກອງປະຊຸມ ໄດ້ພິຈາະລະນາ ແລະ ຮັບຮອງເອົາ (1) ບົດລາຍງານສະພາປະຊາຄົມເສດຖະກິດອາຊຽນ ຄັ້ງທີ 24; (2) ແຜນວຽກບູລິມະສິດດ້ານເສດຖະກິດ ສໍາລັບປີ 2024  ແລະ (3) ບັນດາເອກະສານສໍາຄັນຂອງເສົາຄໍ້າເສດຖະກິດອາຊຽນ ທີ່ຈະລາຍງານຕໍ່ກອງປະຊຸມສຸດຍອດອາຊຽນ ຄັ້ງທີ 44 ແລະ 45 ທີ່ຈະມາເຖິງນີ້.

ຂ່າວ-ພາບ: ສູນສະຖິຕິ ແລະ ຂໍ້ມູນຂ່າວສານ