ໃນວັນທີ 09 ຕຸລາ 2024 ນີ້, ທີ່ກະຊວງອຸດສາຫະກຳ ແລະ ການຄ້າ ໄດ້ຈັດພິທີມອບ-ຮັບ ລະບົບການລົງທະບຽນການຄ້າທາງເອເລັກໂຕຣນິກ ອອນລາຍ(E-Trust Register Online) ລະຫວ່າງ ທ່ານ ສັນຕິສຸກ ພູນສະຫວັດ ຫົວໜ້າກົມການຄ້າພາຍໃນ ກະຊວງອຸດສາຫະກຳ ແລະ ການຄ້າ ກັບ ທ່ານ ຈັນທະວົງ ພະມີສິດ ປະທານບໍລິສັດອີທຣາດ ຈໍາກັດຜູ້ດຽວ ໃຫ້ກຽດເຂົ້າຮ່ວມເປັນສັກຂີພະຍານໂດຍ ທ່ານ ບຸນເຖິງ ດວງສະຫວັນ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ທ່ານ ພູວົງ ພະມີສິດ ປະທານບໍລິສັດ ພູວົງກຼຸບ, ປະທານສະມາຄົມຄໍາ ເຄື່ອງປະດັບ ແລະ ອັນຍະມະນີລາວ ມີບັນດາທ່ານຫົວໜ້າກົມ, ຮອງຫົວໜ້າກົມ, ຄະນະພະແນກ ພາຍໃນກະຊວງ ແລະ ພາກສ່ວນບໍລິສັດທີ່ກ້ຽວຂ້ອງເຂົ້າຮ່ວມ 40 ກວ່າທ່ານ.

ຈຸດປະສົງຂອງພິທີມອບ-ຮັບ  ໃນຄັ້ງນີ້ ເປັນການຈັດຕັ້ງຜັນຂະຫຍາຍດໍາລັດວ່າດ້ວຍການຄ້າທາງເອເລັກໂຕຣນິກ  ເພື່ອແນ່ໃສ່ໜ້າວຽກທີ່ສຳຄັນ, ໃນການຊຸກຍູ້, ສົ່ງເສີມ ແລະ ການຄຸ້ມຄອງການຄ້າທາງເອເລັກໂຕຣນິກ ຫຼື ການຫັນການຄ້າທົ່ວໄປເປັນການຄ້າຜ່ານແພັດຟອມອອນລາຍ ໃຫ້ບັນດາຫົວໜ່ວຍທຸລະກິດການຄ້າທາງເອເລັກໂຕຣນິກ ເຂົ້າສູ່ລະບຽບການ ໂດຍການອຳນວຍຄວາມສະດວກ ບັນດາບຸກຄົນ ແລະ ນິຕິບຸກຄົນມາລົງທະບຽນການຄ້າທາງເອເລັກໂຕຣນິກດັ່ງກ່າວ ຜ່ານລະບົບອອນລາຍ. ນອກນັ້ນຍັງເຮັດໃຫ້ການດຳເນີນທຸລະກິດມີຄວາມໜ້າເຊື່ອມຖື, ມີຕົວຕົນນໍາໃຊ້ຊ່ອງທາງການຄ້າຫຼາຍຂື້ນ ແລະ ຍັງໄດ້ປົກປ້ອງຜູ້ຊົມໃຊ້ພາຍໃນ,  ໂດຍສະເພາະລະບົບດັ່ງກ່າວຍັງສາມາດເຊື່ອມຕໍ່ກັບຖານຂໍ້ມູນຂອງຂະແໜງການກ່ຽວຂ້ອງ ໃນການເກັບອາກອນລາຍໄດ້ ແລະ ອາກອນມູນຄ່າເພີ່ມ ທີ່ລັດຖະບານສາມາດເກັບພັນທະເຂົ້າງົບປະມານ.