ສະຖາບັນອຸດສາຫະກໍາ ແລະ ການຄ້າ, ກະຊວງອຸດສາຫະກໍາ ແລະ ການຄ້າ (ອຄ) ຈັດກອງປະຊຸມເຜີຍແຜ່ຜົນຂອງການຄົ້ນຄວ້າພາຍໃຕ້ຫົວຂໍ້ ‘‘ການປະເມີນຄວາມພ້ອມຂອງທຸລະກິດລາວກ່ອນ ສປປ ລາວ ອອກຈາກສະຖານະພາບປະເທດດ້ອຍພັດທະນາ ປີ 2026 (LDCs)’’ ໃນວັນທີ 25 ຕຸລາ 2024, ທີ່ຫ້ອງປະຊຸມ ຊັ້ນ 01, ກະຊວງອຸດສາຫະກໍາ ແລະ ການຄ້າ ເປັນປະທານຂອງທ່ານ ນາງ ຈັນສຸກ ແສງພະຈັນ ຮອງລັດຖະມົນຕີ ກະຊວງອຸດສາຫະກໍາ ແລະ ການຄ້າ ມີບັນດາທ່ານຫົວໜ້າກົມ, ຮອງຫົວໜ້າກົມ ອ້ອມຂ້າງກະຊວງ ອຄ, ຕາງໜ້າຈາກກະຊວງກ່ຽວຂ້ອງ, ສະຖາບັນການສຶກສາ ແລະ ຈາກສະພາການຄ້າ ແລະ ອຸດສາຫະກໍາ ແຫ່ງຊາດ ເຂົ້າຮ່ວມ.

ຈຸດປະສົງ ເພື່ອຮ່ວມຮັບຟັງຜົນການຄົ້ນຄວ້າ ຈາກນັກຄົ້ນຄວ້າສະຖາບັນອຸດສາຫະກຳ ແລະ ການຄ້າ ໂດຍໄດ້ສຶກສາຄົ້ນຄວ້າຫົວຂໍ້ ‘‘ການປະເມີນຄວາມພ້ອມຂອງທຸລະກິດລາວກ່ອນ ສປປ ລາວ ອອກຈາກສະຖານະພາບປະເທດດ້ອຍພັດທະນາ ປີ 2026 (LDC)’’ ແລະ ຮັບຟັງການລາຍງານການຈັດຕັ້ງປະຕິບັດວຽກງານທີ່ຜ່ານມາຂອງກົມກ່ຽວຂ້ອງ ແລະ ພາກສ່ວນທຸລະກິດ ຕໍ່ກັບການກະກຽມຄວາມພ້ອມເພື່ອອອກຈາກສະຖານະພາບປະເທດດ້ອຍພັດທະນາຂອງ ສປປ ລາວ.

ຖືເປັນວາລະອັນທີດີ; ມີການນໍາສະເໜີແຜນລ່ວງໜ້າ ດ້ວຍຄວາມຮັບຜິດຊອບ ແລະ ຕັດສິນໃຈສູງ ເຖິງວ່າພາຍໃນຍັງມີຂໍ້ຈໍາກັດດ້ານບຸກຄະລະກອນ, ງົບປະມານ, ແຕ່ກໍ່ຍັງສາມາດຊອກຫາແຫລ່ງທຶນສະຫນັບສະຫນູນ ພ້ອມທັງລັດຖະບານກໍ່ໄດ້ໃຫ້ຄວາມສຳຄັນ ຕໍ່ວຽກງານການກຽມຄວາມພ້ອມຂອງ ສປປ ລາວ ກ່ອນອອກຈາກສະຖານະພາບ ປະເທດດອ້ຍພັດທະນາ ໃນປີ 2026 ທີ່ຈະມາເຖິງ.

ສະຖາບັນ ໃນນາມເປັນຫນ່ວຍງານຄົ້ນຄວ້າ ຂອງ ກະຊວງ ອຄ ກໍ່ເລັງເຫັນຄວາມຈໍາເປັນໃນການສຶກສາຄົ້ນຄວ້າວິໄຈ ການກະກຽມຄວາມພ້ອມ ເພື່ອຮັບມືຜົນກະທົບທາງດ້ານລົບ ທີ່ອາດຈະເກີດຂຶ້ນ ບໍ່ວ່າທັງພາກລັດ ແລະ ພາກທຸລະກິດເອງ ໃນການປັບຕົວ ແລະ ຍົກລະດັບມາດຕະຖານຕ່າງໆທີ່ກ່ຽວຂ້ອງ ເພື່ອໃຫ້ພາກທຸລະກິດສາມາດ ສົ່ງອອກ, ສາມາດແຂ່ງຂັນ ແລະ ສືບຕໍ່ຂະຫຍາຍຕົວໄດ້ກ່ອນຄູ່ຄ້າ ຈະຍົກເລີກການໃຫ້ສິດທິພິເສດທາງດ້ານການຄ້າ ແລະ ການພັດທະນາຈາກປະເທດພັດທະນາແລ້ວ ໂດຍສະເພາະສະຫະພາບເອີຮົບ ແລະ ບັນດາປະເທດອື່ນໆ.

ກອງປະຊຸມເຜີຍແຜ່ຫົວຂໍ້ຄົ້ນຄວ້າ  “ການປະເມີນຄວາມພ້ອມຂອງທຸລະກິດລາວ ກ່ອນ ສປປ ລາວ ອອກຈາກສະຖານະພາບປະເທດດ້ອຍພັດທະນາ ປີ 2026 (Least Developed Countries – LDCs)”, ແມ່ນນຳສະເຫນີຄວາມເປັນມາ, ຂໍ້ສະເຫນີແນະ, ການກຳນົດນະໂຍບາຍ ແລະ ມາດຕະການຊ່ວຍເຫລືອພາກທຸລະກິດ ກ່ອນ ແລະ ຫລັງອອກຈາກສະຖານະພາບປະເທດດ້ອຍພັດທະນາຂອງ ສປປ ລາວ. ນອກຈາກນັ້ນ ຈະໄດ້ຮັບຟັງການລາຍງານ ຈາກຫນ່ວຍງານທີ່ຮັບຜິດຊອບໂດຍກົງທີ່ຕິດພັນກັບວຽກງານການຄ້າ ແລະ ການລາຍງານຈາກພາກສ່ວນທຸລະກິດເຊັ່ນ: ສະມາຄົມຕັດຫຍິບ ແລະ ສະມາຄົມກະສິກຳສົ່ງອອກ (ສະພາການຄ້າ ແລະ ອຸດສາຫະກຳ ແຫ່ງຊາດລາວ). ພ້ອມດຽວກັນນັ້ນ, ທີ່ປະຊຸມຍັງໄດ້ຮັບຟັງຄວາມຄິດເຫັນ ແລະ ການໂອ້ລົມຈາກປະທານກອງປະຊຸມ.

ຂ່າວ-ພາບ: ສູນສະຖະຕິ ແລະ ຂໍ້ມູນຂ່າວສານ