ກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ ໄດ້ຈັດກອງປະຊຸມເປີດກ້ວາງ ຜ່ານເນື້ອໃນຮ່າງຂໍ້ຕົກລົງ ກ່ຽວກັບການຈັດຕັ້ງປະຕິບັດສັນຍາ ວ່າດ້ວຍການຮັບຮອງຜົນການກວດສອບສິດທິບັດເອີຣົບ EPO, ໃນວັນທີ 04 ພະຈິກ 2024, ທີ່ຫ້ອງປະຊຸມ ຊັ້ນ 1 ກະຊວງອຸດສາຫະກໍາ ແລະ ການຄ້າ, ເປັນປະທານຂອງ ທ່ານ ໄຊສົມເພັດ ນໍລະສິງ ຫົວໜ້າກົມຊັບສິນທາງປັນຍາ, ກະຊວງອຸດສາຫະກໍາ ແລະ ການຄ້າ. ໃນກອງປະຊຸມຄັ້ງນີ້ ມີບັນດາທ່ານ ຄະນະກົມຊັບສິນທາງປັນຍາ, ຜູ້ຕາງໜ້າຈາກບັນດາ ຫ້ອງການ, ສໍານັກງານ, ກົມ ແລະ ສະຖາບັນອ້ອມຂ້າງ ກະຊວງອຸດສາຫະກໍາ ແລະ ການຄ້າ ແລະ ຜູ້ຕາງ ໜ້າຈາກບັນດາບໍລິສັດຕົວແທນ ຈົດທະບຽນຊັບສິນທາງປັນຍາ ແລະ ພະນັກງານພາຍໃນກົມຊັບສິນທາງປັນຍາ ເຂົ້າຮ່ວມ.

ໃນໂອກາດນີ້ ທ່ານ ໄຊສົມເພັດ ນໍລະສິງ ຫົວໜ້າກົມຊັບສິນທາງປັນຍາ ໄດ້ກ່າວເປີດກອງປະຊຸມໃນຄັ້ງນີ້ວ່າ: ຈຸດປະສົງຂອງກອງປະຊຸມ ແມ່ນເພື່ອທາບທາມຄໍາເຫັນໃສ່ຮ່າງຂໍ້ຕົກລົງ ກ່ຽວກັບການຈັດຕັ້ງປະຕິບັດສັນຍາ ວ່າດ້ວຍການຮັບຮອງ ສິດທິບັດເອີຣົບ ຢູ່ໃນ ສປປ ລາວ ເພື່ອໃຫ້ສອດຄ່ອງຕາມກົດໝາຍ ວ່າດ້ວຍຊັບສິນທາງປັນຍາ ຂອງ ສປປ ລາວ ແລະ ສັນຍາ ວ່າດ້ວຍການຮັບຮອງສິດທິບັດເອີຣົບ.

ໃນຮ່າງຂໍ້ຕົກລົງດັ່ງກ່າວ ປະກອບມີ 5 ພາກ, ລວມມີ 19 ມາດຕາ, ຊຶ່ງເນື້ອໃນຫຼັກທາງດ້ານເຕັກນິກຂອງຂໍ້ຕົກລົງ ແມ່ນໄດ້ມາຈາກເນື້ອໃນຂອງສັນຍາ ທີ່ໄດ້ລົງນາມກັນ ໃນວັນທີ 13 ພຶດສະພາ 2024 ຜ່ານມານີ້ ທີ່ ມິວນິກ, ປະເທດ ເຢຍລະມັນ, ລະຫວ່າງ ລັດຖະບານ ແຫ່ງ ສປປ ລາວ, ຊຶ່ງຕາງໜ້າລົງນາມໂດຍ ກະຊວງອຸດສາຫະກໍາ ແລະ ການຄ້າ ກັບ ອົງການສິດທິບັດເອີຣົບ ຕາງໜ້າລົງນາມໂດຍສໍານັກງານສິດທິບັດເອີຣົບ, ແລະ ໄດ້ນໍາເອົາເນື້ອໃນຂອງສັນຍາດັ່ງກ່າວ ເຂົ້າມາໃສ່ໃນຮູບແບບຮ່າງນິຕິກໍາ ຂອງ ສປປ ລາວ. ເພື່ອໃຫ້ສອດຄ່ອງກັບລະບຽບການທີ່ກ່ຽວຂ້ອງ ແລະ ສາມາດຈັດຕັ້ງປະຕິບັດຂໍ້ຕົກລົງດັ່ງກ່າວໄດ້.

ໃນກອງປະຊຸມ ບັນດາທ່ານຜູ້ເຂົ້າຮ່ວມໄດ້ແລກປ່ຽນຄໍາຄິດເຫັນ ແລະ ປະກອບຄໍາເຫັນ ໃສ່ໃນຮ່າງຂໍ້ຕົກລົງດັ່ງກ່າວ ໂດຍສະເພາະ ໃນແຕ່ລະພາກ, ໃນແຕ່ລະມາດຕາ ເພື່ອໃຫ້ຮ່າງຂໍ້ຕົກລົງສະບັບດັ່ງກ່າວ ມີເນື້ອໃນຄົບຖ້ວນ ແລະ ສົມບູນຂຶ້ນກວ່າເກົ່າ, ສະນັ້ນ, ເພື່ອໃຫ້ສອດຄ່ອງຕາມລະບຽບການ ແລະ ເປັນໄປຕາມແຜນຮ່າງຂໍ້ຕົກລົງດັ່ງກ່າວ, ພາຍຫຼັງສຳເລັດກອງປະຊຸມເປີດກ້ວາງຜ່ານເນື້ອໃນຮ່າງຂໍ້ຕົກລົງໃນຄັ້ງນີ້ແລ້ວ ຄະນະຮັບຜິດຊອບຮ່າງຂໍ້ຕົກລົງດັ່ງກ່າວ ຈະໄດ້ນໍາເອົາບັນດາຄໍາເຫັນໃນກອງປະຊຸມຄັ້ງນີ້ ເພື່ອນໍາໄປປັບປຸງໃຫ້ເປັນເອກະພາບກັນ.

ຂ່າວ-ພາບ: ສູນສະຖິຕິ ແລະ ຂໍ້ມູນຂ່າວສານ