ໃນວັນທີ 06 ພະຈິກ 2024 ບໍລິສັດ ອີລີແກ້ນ ອີເວັ້ນສ໌ ຈໍາກັດຜູ້ດຽວ ໄດ້ຈັດພິທີໂຄສະນາຂ່າວ ການຈັດງານ ວາງສະແດງ ວຽງຈັນ ມໍເຕີເຊວ ເອັກສໂປ 2024, ຊຶ່ງໄດ້ຮັບການມອບໝາຍຈາກກົມສົ່ງເສີມການຄ້າ ແລະ ຫັດຖະກໍາ, ກະຊວງອຸດສາຫະກໍາ ແລະ ການຄ້າ ແລະ ໄດ້ຮັບການສະໜັບສະໜູນຈາກ ບໍລິສັດລາວເວີນ ມະຫາຊົນ ຈັດພິທີຖະແຫຼງຂ່າວງານວາງສະແດງວຽງຈັນມໍເຕີ້ເຊວ ເອັກສໂປ 2024 ຄັ້ງທີ 2 (Vientiane Motorsale Expo 2024) ທີ່ສູນການຄ້າລາວ-ໄອເຕັກ ມີທ່ານ ຈັນສະໝອນ ສີສະອາດ ຮອງຫົວໜ້າກົມສົ່ງເສີມການຄ້າ ແລະ ຫັດຖະກຳ, ກະຊວງອຸດສາຫະກໍາ ແລະ ການຄ້າ, ທ່ານ ພານະລິນ ສຸວັນນະວົງ ຜູ້ອໍານວຍການບໍລິສັດ ອີລີເເກ້ນ ອີເວັ້ນສ ຈໍາກັດຜູ້ດຽວ ແລະ ທ່ານນາງ ຄໍາພາ ຄໍາບຸນເຮືອງ ຮອງຜູ້ອໍານວຍການໃຫຍ່ຝ່າຍການຄ້າ ບໍລິສັດ ລາວເວີນ ມະຫາຊົນ ພ້ອມດ້ວຍຂະແໜງການກ່ຽວຂ້ອງເຂົ້າຮ່ວມ.
ຈຸດປະສົງ: ຂອງການຈັດງານຄັ້ງນີ້ ເພື່ອເປັນການໂຄສະນາປະຊາສໍາພັນ ໃຫ້ທຸກພາກສ່ວນໄດ້ຮັບຮູ້ ແລະ ເຜີຍແຜ່ຜະລິດຕະພັນຂອງຕົນສູ່ສັງຄົມ ກ່ຽວກັບລົດຫຼາຍປະເພດ, ທີ່ຕິດພັນກັບລົດລວມທັງເຕັກໂນໂລຊີໃໝ່ໆ ທີ່ເປັນມິດຕໍ່ສິ່ງແວດລ້ອມ ແລະ ການໂຊລົດຕົວແບບລົດຍີ່ຫໍ້ຕ່າງໆທີ່ມາຈາກຫລາກຫລາຍຄ້າຍລົດ ເຊັ່ນ: ລົດໄຟຟ້າ, ລົດປະຢັດນໍ້າມັນ ເຊິ່ງເປັນການດີ ທີ່ພວກເຮົາພວມຫັນມາຊົມໃຊ້ລົດພະລັງງານໄຟຟ້າ ພ້ອມດຽວກັນນີ້ ການຈັດງານດັ່ງກ່າວກໍ່ເປັນກົນໄກໜຶ່ງທີ່ທາງພາກລັດໃຫ້ຄວາມສຳຄັນໃນການສົ່ງເສີມການຄ້າ ເພື່ອກະຕຸ້ນເສດຖະກິດ, ດຶງດູດການຄ້າ ແລະ ການລົງທຶນໃນ ສປປ ລາວ ແລະ ສາກົນ ໃຫ້ນັບມື້ນັບຫຼາຍຂື້ນຕາມຍຸກເຊື່ອມໂຍງກັບສາກົນ.
ທ່ານ ພານະລິນ ສຸວັນນະວົງ ກ່າວໃນງານຄັ້ງນີ້ວ່າ: ງານວາງສະແດງລົດວຽງຈັນມໍເຕີ້ເຊວ ເອັກສໂປ 2024 ຈະດໍາເນີນການສະແດງເປັນເວລາ 8 ວັນ ເລີ່ມແຕ່ວັນທີ 30 ພະຈິກ ຫາ 8 ທັນວາ ທີ່ສູນການຄ້າລາວ-ໄອເຕັກ ປັດຈຸບັນໄດ້ກະກຽມຄວາມພ້ອມດ້ານຕ່າງໆເປັນຕົ້ນການກະກຽມພື້ນທີ່ການວາງສະແດງສິນຄ້າ ເຊິ່ງໄດ້ຈັດສັນບູດຫຼາຍກວ່າ 55 ບູດ 18 ຍີ່ຫໍ້ ໃນນັ້ນມີ ລົດໄຟຟ້າ EV ລົດທີ່ປະຢັດພະລັງງານນໍ້າມັນ, ອຸປະກອນປະດັບລົດຍົນ ບັນດາເຄື່ອງຮັບໃຊ້ທີ່ຕິດພັນກັບພາຫະນະ, ສະຖາບັນການເງິນ ແລະ ທະນາຄານທຸລະກິດ ມາຮອດປະຈຸບັນໄດ້ລະດົມຫົວໜ່ວຍທຸລະກິດຄ້າຍລົດເຂົ້າຮ່ວມມີຫລາຍກວ່າ 45 ບູດ ກວມ 80% ແລ້ວ ນອກຈາກນີ້ພື້ນທີ່ດ້ານນອກຍັງມີການວາງສະແດງຜະລິດຕະພັນໂອດ໊ອບ ແລະ ສິນຄ້າທ່າແຮງຂອງລາວຫຼາຍກວ່າ 20 ບູດ ທັງນີ້ກໍເພື່ອເປັນການໂຄສະນາ ແລະ ສົ່ງເສີມການຊົມໃຊ້ສິນຄ້າຂອງລາວ.
ພາຍໃນງານມີກິດຈະກຳຫຼາຍຢ່າງເຊັ່ນ Cosplay ແຂ່ງຂັນເຕັ້ນ Concept ລົດຍົນ ເດີນແບບ, ຄອນເສີດຈາກສິນລະປິນທັງພາຍໃນ ແລະ ປະເທດ ເພື່ອນບ້ານມາສ້າງສີສັນ, ຫຼິ້ນເກມແຈກຂອງລາງວັນໃຫ້ແຂກທີ່ເຂົ້າມາຮ່ວມຊົມງານ ສໍາລັບລູກຄ້າ ທີ່ຈອງລົດພາຍໃນງານຈະມີສິດລົງທະບຽບເພື່ອຮັບຄູປອງລຸ້ນໂຊກແຈກຂອງລາງວັນ ຈາກມາສຄອດປະຈໍາງານບໍ່ວ່າຈະເປັນເຄືອບແກ້ວບໍ່ເສຍຄ່າ 30 ຄັນ ແຈກລົດໄຟຟ້າ 3 ຄັນ ແຈກ Smart TV 5 ໜ່ວຍ ແຈກຕູ້ເຢັນ 9 ໜ່ວຍ ແລະ ອື່ນໆອີກຫຼາຍຢ່າງ ຄາດວ່າຈະມີຜູ້ເຂົ້າຊົມງານປະມານ 40.000 ຄົນຕໍ່ວັນ ມີການສັງຈອງລົດພາຍໃນງານ 50 ຄັນຕໍ່ວັນມີການຊື້ຂາຍສິນຄ້າ ແລະ ບໍລິການເພີ່ມຂຶ້ນກວ່າປີທີ່ຜ່ານມາ ນອກຈາກນີ້ຍັງລະດົມທຶນຊ່ວຍເຫຼືອຕ້ານໄພໜາວຢູ່ຊົນນະບົດອີກດ້ວຍ.
ສູນສະຖິຕິ ແລະ ຂໍ້ມູນຂ່າວສານ
