ພິທີເຊັນບົດບັນທຶກຄວາມເຂົ້າໃຈ MOU ກ່ຽວກັບານຮ່ວມມື ໃນການສຶກສາ ລະບົບບໍລິຫານຈັດການຄວບຄຸມການຄ້າ ແລະ ສິນຄ້າ ລະຫວ່າງປະເທດ DIGITAL TRADE OPERATING PLATFORM ລະຫວ່າງ ຫ້ອງການກະຊວງອຸດສາຫະກຳ ແລະ ການຄ້າ ກັບ ບໍລິສັດ ເອໄອດີຊີ ເທັກ ຈຳກັດຜູ້ດຽວ ຈັດຂຶ້ນໃນວັນທີ 19 ພະຈິກ 2024 ທີ່ກະຊວງ ອຄ ເຂົ້າຮ່ວມຂອງ ທ່ານ ປອ ມະໂນທອງ ວົງໄຊ ຮອງລັດຖະມົນຕີ ກະຊວງ ອຄ, ເຊັນໂດຍທ່ານ ປອ ບົວວັນ ວິລະວົງ ຫົວໜ້າຫ້ອງການກະຊວງ ອຄ, ຝ່າຍບໍລິສັດລົງນາມໂດຍ ທ່ານ ພຶດສະພາ ພູມມະສັກ ປະທານ ບໍລິສັດ ເອໄອດີຊີ ເຕັກ ຈໍາກັດຜູ້ດຽວ ມີທ່ານຕາງໜ້າຈາກບັນດາກົມ ແລະ ຕາງໜ້າບໍລິສັດ ເອໄອດີຊິເທັກ ຈຳກັດຜູ້ດຽວເຊົ້າຮ່ວມ.
ທ່ານ ປອ ບົວວັນ ວິລະວົງ ກ່າວວ່າ: ຈຸດປະສົງການເຊັນສັນຍາ ແມ່ນການສຶກສາຄວາມເປັນໄປໄດ້ ໃນການພັດທະນາລະບົບ ສຳລັບວຽກງານການຄຸ້ມຄອງ ການນຳເຂົ້າ-ສົ່ງອອກສິນຄ້າ, ສິນຄ້າຜ່ານແດນ (transit) ແລະ ສິນຄ້ານໍາເຂົ້າເພື່ອສົ່ງອອກ ຂອງຂະແໜງ ອຄ. ການຮ່ວມມືດັ່ງກ່າວ ຖືເປັນການພັດທະນາເສດຖະກິດ-ສັງຄົມ ເວົ້າລວມ, ເວົ້າສະເພາະແມ່ນການຫັນເປັນດີຈີຕອນ ຂອງຂະແໜງ ອຄ, ການຄົ້ນຄວ້າ ແລະ ພັດທະນາລະບົບດັ່ງກ່າວ ຈະເປັນການເຊື່ອມຈອດດ້ານຂໍ້ມູນ ຂອງສິນຄ້າ ກັບຫຼາຍຂະແໜງການ ທັງພາຍໃນ ແລະ ຕ່າງປະເທດ. ນອກນັ້ນ, ຍັງຈະເພີ່ມຄວາມສະດວກ ດ້ານການບໍລິການ ແລະ ການເກັບລາຍຂັບເຂົ້າລັດຢ່າງເປັນລະບົບ ຄົບຖ້ວນ.
ເຖິງແມ່ນວ່າ ຄວາມພ້ອມຂອງແຕ່ລະຂະແໜງການ ແລະ ຫົວໜ່ວຍທຸລະກິດ ອາດຍັງບໍ່ທັນສູງ ແຕ່ຂ້າພະເຈົ້າເຊື່ອໝັ້ນວ່າ ການຫັນເຂົ້າສູ່ລະເສດຖະກິດດີຈີຕອນ ຈະເປັນກະແສສໍາຄັນ ຕໍ່ການພັດທະນາເສດຖະກິດ-ສັງຄົມ ແລະ ແຕ່ລະພາກສ່ວນຈະຄ່ອຍກ້າວເຂົ້າສູ່ລະບົບດັ່ງກ່າວຕາມກົນໄກຂອງເສດຖະກິດໂລກ. ອີງຕາມມະຕິກອງປະຊຸມສະພາແຫ່ງຊາດ ແລະ ແຜນວຽກຈຸດຂອງລັດຖະບານໃນປີ2024 ທີ່ກໍານົດໄວ້ ໂດຍສະເພາະການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ຕາມມະຕິ 19/ກມສພ ໄດ້ສຸມໃສ່ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນໂດຍສະ ເພາະບັນຫາເງິນເຟີ້, ອັດຕາແລກປ່ຽນ, ລາຄາສິນຄ້າ ແລະ ການຄຸ້ມຄອງການນຳເຂົ້າ-ສົ່ງອອກ, ການສະກັດກັ້ນການຄ້ານອກລະບົບ ດ້ວຍການຍັງຄັບໃຊ້ບັນດາມາດຕະການ ທີ່ໄດ້ວາງອອກແລ້ວນັ້ນ ໃຫ້ປະກົດຜົນເປັນຈິງ ແລະ ເປັນຮູບປະທຳຫຼາຍຂຶ້ນກ່ວາເກົ່າ, ສາມາດຄຸ້ມຄອງເງິນຕາຕ່າງປະເທດຈາກການສົ່ງອອກ-ນຳເຂົ້າ ສິນຄ້າຜ່ານລະບົບທະນາຄານໃຫ້ຫຼາຍຂຶ້ນ ໂດຍລັດຖະບານໄດ້ສຸມໃສ່ ການເກັບລາຍຮັບ ຕາມກົດໝາຍ ແລະ ລະບຽບການ ທີ່ໄດ້ກຳນົດໄວ້, ເລັ່ງການຫັນເປັນທັນສະໄໝ ແລະ ຂະຫຍາຍຖານລາຍຮັບໃໝ່. ດັດສົມຈຳນວນບໍລິສັດນຳເຂົ້າ-ສົ່ງອອກ ຫຼຸດຜ່ອນການນຳເຂົ້າສິນຄ້າທີ່ສາມາດຜະລິດເອງໄດ້ ຫັນໄປສູ່ການ ຂາຍຍົກ-ຂາຍຍ່ອຍ ເພື່ອຄຸ້ມຄອງການນຳເຂົ້າສິນຄ້າໃຫ້ຫຼຸດໜ້ອຍຖອຍລົງ.
ກະຊວງ ອຄ ມີດໍາລັດ ວ່າດ້ວຍການນຳເຂົ້າ-ສົ່ງອອກ ສະບັບເລກທີ 114 ລົງວັນທີ 06 ເມສາ 2011 ນິຕິກໍາດັ່ງກ່າວໄດ້ກໍາ ນົດຫຼັກການ ແລະ ລະບຽບການກ່ຽວກັບການນຳເຂົ້າ ແລະ ສົ່ງອອກສິນຄ້າ ລວມທັງການນໍາເຂົ້າຊົ່ວຄາວ, ຜ່ານແດນ ນໍາເຂົ້າເພື່ອສົ່ງອອກຕໍ່ ປະຈຸບັນ ວຽກງານການນໍາເຂົ້າ-ສົ່ງອອກ ໄດ້ມີການອອກອະນຸຍາດຜ່ານລະບົບປະຕູດຽວແຫ່ງຊາດ ລະບົບ E-CO, ລະບົບອອກໃບຢັ້ງຢືນ ເປັນຜູ້ນໍາເຂົ້າ ແລະ ສົ່ງອອກ ທີ່ອອກຜ່ານລະບົບເອເລັກໂຕນິກ ທີ່ມີການເຊື່ອມໂຍງກັບຂະແໜງການກ່ຽວຂ້ອງ ໃນອະນາຄົດຂ້າງໜ້າ ຈະມີການເຊື່ອມໂຍງກັນ ໂດຍສະເພາະກັບກະຊວງການເງິນ ທະນາຄານ ແຫ່ງ ສປປ ລາວ ແລະ ຂະແໜງການອື່ນໆ ເຊີ່ງຈະເປັນການຫັນເປັນລະບົບອັດຕະໂນມັດແບບເຕັມຮູບແບບ, ສະນັ້ນ ການສຶກສາຄວາມເປັນໄປໄດ້ໃນຄັ້ງນີ້ ແມ່ນເປັນບາດກ້າວອັນສຳຄັນຂອງການສຶກສາຫັນເປັນທັນສະໄໝ ເພື່ອຫັນວຽກງານຄຸ້ມຄອງເຂົ້າສູ່ລະບົບ, ມີການບັງຄັບໃຊ້ນິຕີທີ່ວາງອອກໃຫ້ມີຜົນສັກສິດ ແລະ ສາມາດເກັບກໍາ,ສັງລວມລາຍຮັບ ການນໍາເຂົ້າ-ສົ່ງອອກໃຫ້ເປັນລະບົບ,
ທ່ານ ພຶດສະພາ ພູມມະສັກ ກ່າວວ່າ: ເຄື່ອງມືທີ່ພວກເຮົາຈະພັດທະນານີ້ ຈະຊ່ວຍເຮັດໃຫ້ລະບົບການຄ້າຂອງລາວເຮົາ ສະດວກຂຶ້ນ ຄວບຄຸມໄດ້ ແລະ ສາມາດເຊື່ອມຕໍ່ເຂົ້າກັບກະຊວງ ຫຼື ຂະແໜງການອື່ນໄດ້ ເຊີ່ງສາມາດເບີ່ງຜ່ານສະມາດໂຟນ ບັນດາຂໍ້ມູນທາງການຄ້າ ເປັນຕົ້ນແມ່ນ ສາມາດເບີ່ງມູນຄ່າການນໍາເຂົ້າ, ມູນຄ່າການສົ່ງອອກໄດ້, ຕີດຕາມສິນຄ້າຜ່ານແດນ ຫຼື ທັອບສິນຄ້ານໍາເຂົ້າ ທັອບສິນຄ້າສົ່ງອອກ ພ້ອມນັ້ນ ເຄື່ອງມືດັ່ງກ່າວກໍຍັງສາມາດກໍານົດ ຈໍານວນທີ່ ລັດຖະບານອະນຸຍາດໃຫ້ນໍາເຂົ້າມາເທົ່າໃດ ເມື່ອຮອດກໍານົດທີ່ອະນຸຍາດລະບົບຈະລັອກ ບໍ່ໃຫ້ອະນຸຍາດອີກ. ນອກຈາກນີ້ ມັນຍັງສາມາດຕິດຕາມໄດ້ວ່າ ເມື່ອນໍາເຂົ້າມາແລ້ວ ຂາຍຢູ່ໃສ ຂາຍແທ້ບໍ່ ເຊິ່ງລະບົບດັ່ງກ່າວຈະລິ້ງເຂົ້າກັບລະບົບ ເທັກລິດ ຂອງກະຊວງການເງິນ ແລະ ຂະແໜງການອື່ນໆໃນຕໍ່ໜ້າ.
ທ່ານກ່າວວ່າ: ການພັດທະນານີ້ຈະປ່ຽນໂສມໜ້າໃໝ່ໃນການດໍາເນີນວຽກງານໃນປະເທດເຮົາ ສອດຄ່ອງກັບແຜນພັດທະນາຂອງລັດຖະບານທີ່ກໍານົດໃຫ້ເປັນດິຈິຕອນ ເຊີ່ງລະບົບດັ່ງກ່າວໄດ້ພັດທະນາໄປໃນລະດັບໜຶ່ງແລ້ວ ຄາດວ່າໃນທ້າຍປີນີ້ ຈະສາມາດເຫັນໜ້າຕາຂອງລະບົບດັ່ງກ່າວ ແລະ ຈະໄດ້ ເປີດນໍາໃຊ້ໄດ້ໃນປີ 2025 ທ່ານ ພືດສະພາ ກ່າວ.
ຂ່າວ-ພາບ: ສູນສະຖິຕິ ແລະ ຂໍ້ມູນຂ່າວສານ
