ສຳນັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ (ສຈນກ), ກະຊວງອຸດສາຫະກໍາ ແລະ ການຄ້າ ໄດ້ຈັດງານເທດສະການຜະລິດຕະພາບແຫ່ງຊາດລາວ ປະຈໍາປີ 2024 ໃນວັນທີ 21 ພະຈິກ 2024 ຢູ່ທີ່ສູນການຄ້າວຽງຈັນເຊັນເຕີ, ນະຄອນຫຼວງວຽງຈັນ ເປັນປະທານ ຂອງ ທ່ານ ປອ ມະໂນທອງ ວົງໄຊ, ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ແລະ ມີຜູ້ຕາງໜ້າ ຈາກພາກລັດ, ພາກທຸລິດກິດ, ອົງການ ຈັດຕັ້ງສາກົນ, ສະຖາບັນການສຶກສາ ແລະ ບັນດາສະມາຄົມທຸລະກິດ ເຂົ້າຮ່ວມງານ
ຈຸດປະສົງຂອງການຈັດງານດັ່ງກ່າວ ແມ່ນເພື່ອເຜີຍແຜ່ຜົນສໍາເລັດ ແລະ ໂຄສະນາປະຊາສຳພັນ ກ່ຽວກັບອົງການຜະລິດຕະພາບແຫ່ງອາຊີ (Asian Productivity Organization-APO), ແນ່ໃສ່ຍົກສູງບົດບາດຄວາມສຳຄັນຂອງວຽກງານຜະລິດຕະພາບ ເພື່ອປະກອບສ່ວນແກ່ການຜະລິດເສດຖະກິດ-ສັງຄົມ ໃຫ້ເຕີບໃຫຍ່ເຂັ້ມແຂງ ຊຶ່ງ ສປປ ລາວ ໄດ້ເຂົ້າເປັນສະມາຊິກ APO ໃນວັນທີ 18 ມິຖຸນາ 2002 ແລະ ລັດຖະບານໄດ້ມອບໝາຍໃຫ້ ສໍານັກງານສົ່ງເສີມຈຸນລະວິສາຫະກິດ, ວິສາຫະກິດຂະໜາດນ້ອຍ ແລະ ກາງ, ກະຊວງອຸດສາຫະກຳ ແລະ ການຄ້າ ເປັນອົງການ ຜະລິດຕະພາບແຫ່ງຊາດລາວ. ອົງການ APO ແມ່ນອົງການຈັດຕັ້ງລະຫວ່າງລັດຖະບານໃນພາກພື້ນອາຊີ ແລະ ປາຊີຟິກ, ໄດ້ສ້າງຕັ້ງຂຶ້ນໃນວັນທີ 11 ພຶດສະພາ 1961, ປະຈຸບັນມີມາຊິກທັງໝົດ 21 ປະເທດ ລວມ ສປປ ລາວ, ມີພາລະບົດບາດໃນການສົ່ງເສີມການເພີ່ມຜະລິດຕະພາບ ໃນຂົງເຂດພາກລັດ ແລະ ພາກທຸລະກິດ ດ້ວຍການສົ່ງເສີມການນໍາໃຊ້ວິທີວິທະຍາ ແລະ ເຄື່ອງມືເພີ່ມຜະລິດຕະພາບ ເພື່ອປັບປຸງລະບົບການບໍລິຫານ ແລະ ຂະບວນການຜະລິດ ໃຫ້ມີຄວາມຄ່ອງໂຕແນໃສ່ຫຼຸດຜ່ອນຕົ້ນທຶນ ແລະ ເພີ່ມຄວາມສາມາດໃນການແຂ່ງຂັນ.
ທ່ານ ປອ ມະໂນທອງ ວົງໄຊ ຮອງລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ເນັ້ນໃຫ້ເຫັນເຖິງບົດບາດຄວາມສຳຄັນຂອງ ວຽກງານຜະລິດຕະພາບ ຕໍ່ການພັດທະນາເສດຖະກິດ-ສັງ ຄົມ ໂດຍຍົກໃຫ້ເຫັນ ການຍົງສູງຜະລິດຕະພາບ ແມ່ນຈະເຮັດໃຫ້ຜົນການຜະລິດຄຸ້ນນະພາບສູງຂຶ້ນ ແລະ ສາມາດເພີ່ມປະລິມາການການຜະລິດໃຫ້ຫຼາຍຂຶ້ນ ພ້ອມທັງເຮັດໃຫ້ຕົ້ນທຶນການຜະລິດຕໍ່າລົງ ເຮັດໃຫ້ຜູ້ໃຊ້ໄດ້ຮັບສິນຄ້າ ແລະ ບໍລິການ ທີ່ມີຄຸນນະພາບດີ, ລາຄາຖືກ ແລະ ຜູ້ສະໜອງໄດ້ກໍາໄລສູງຂຶ້ນ ເຮັດໃຫ້ທຸລະກິດເຕີບໃຫຍ່ເຂັ້ມແຂງ ຊຶ່ງໃນທິດທາງນະໂຍບາຍ ຂອງພັກ ແລະ ລັດຖະບານເຮົາ ກໍ່ໄດ້ຖືເອົາວຽກງານເສດຖະກິດເປັນໃຈກາງ ເພື່ອຊຸກຍູ້ໃຫ້ເສດຖະກິດຂະຫຍາຍຕົວຢ່າງຕໍ່ເນື່ອງ, ໝັ້ນທ່ຽງ, ມີຄຸນນະພາບ ຕາມທິດສີຂຽວ ແລະ ຍືນຍົງ, ຄຽງຄູ່ກັບການຫັນປ່ຽນໂຄງປະກອບເສດຖະກິດ ໃຫ້ໄປຕາມທິດ ຫັນເປັນອຸດສາຫະກຳ ແລະ ທັນສະໄໝ ຊຶ່ງຍຸດທະສາດການຫັນເປັນອຸດສາຫະກຳ ແລະ ທັນສະໄໝ ແມ່ນການຍົກສູງປະສິດທິພາບ ແລະ ປະສິດທິຜົນຂອງການຜະລິດ ໃນໂຄງປະກອບເສດຖະກິດແຫ່ງຊາດ.
ການຈັດງານເທດສະການດັ່ງກ່າວ ແມ່ນຈະດຳເນີນເປັນເວລາ 3 ວັນ (ວັນທີ 21 – 23 ພະຈິກ 2024) ຢູ່ທີ່ສູນການຄ້າວຽງຈັນເຊັນເຕີ ຊຶ່ງໃນແຕ່ລະວັນຈະມີກິດຈະກຳຕ່າງໆ ເປັນຕົ້ນ ການຈັດເວທີສົນທະນາ ຫົວຂໍ້ກ່ຽວກັບ ຜະລິດຕະພາບແບບທົ່ວເຖິງ, ການນຳສະເໜີຜະລິດຕະພັນຂອງຜູ້ປະກອບການ ແລະ ບູດວາງສະແດງສິນຄ້າຜະລິດຕະພັນທີ່ມີຄູນນະພາບ ຈາກ ທີ່ຜະລິດໃນ ລາວ.
# ສູນສະຖິຕິ ແລະ ຂໍ້ມູນຂ່າວສານ
