ໃນຕອນເຊົ້າຂອງວັນທີ 18 ມີຖຸນາ 2015 ທີ່ຜ່ານມາ ກະຊວງອຸດສາຫະກຳ ແລະ ການຄ້າ ໄດ້ຈັດກອງປະຊຸມເຜີຍແຜ່ຊື່ເອີ້ນຊົນເຜົ່າ ແລະ ຈຳນວນຊົນເຜົ່າ ໃນ ສປປ ລາວ ເພື່ອໃຫ້ພະນັກງານທົ່ວກະຊວງເຂົ້າໃຈ ແລະ ຮັບຮູ້ລະອຽດກ່ຽວກັບການເອີ່ນຊື່ຂອງແຕ່ລະຊົນເຜົ່າ. ໂດຍການເປັນປະທານຂອງ ທ່ານ ພັນທອງ ພິດທຸມມາ ລັດຖະມົນຕີຊ່ວຍວ່າການກະຊວງ ອຸດສາຫະກຳ ແລະ ການຄ້າ, ໃຫ້ກຽດຂຶ້ນເຜີຍແຜ່ຂອງ ທ່ານ ສົມຄິດ ຮອງຫົວໜ້າກົມຊົນເຜົ່າ ສູນກາງແນວລາວສ້າງຊາດ.
ທ່ານ ສົມຄິດ ກ່າວວ່າ: ໃນກອງປະຊຸມເຜີຍແຜ່ ຫຼື ອະທິບາຍກ່ຽວກັບການກຳນົດຊື່ເອີ້ນ ແລະ ຈຳນວນຊົນເຜົ່າໃນ ສປປ ລາວ ແມ່ນມີ 3 ຈຸດປະສົງ ຄື: 1. ຈຸດປະສົງດ້ານຄວາມຮູ້, 2. ຈຸດປະສົງດ້ານແນວຄິດ, 3. ຈຸດປະສົງດ້ານທັກສະ ເພື່ອໃຫ້ພະນັກງານຫຼັກແຫຼ່ງທົ່ວກະຊວງອຸດສາຫະກຳ ແລະ ການຄ້າ ມີຄວາມຮູ້ພື້ນຖານກ່ຽວກັບສະພາບການຊ້ຳຊ້ອນຂອງຊື່ຊົນເຜົ່າຕ່າງໆໃນລາວ, ອັນຈະນຳໄປສູ່ການກຳນົດໂຄງປະກອບ ແລະ ສັບຊ້ອນຊື່ຊົນເຜົ່າໃຫ້ຖືກຕ້ອງຕາມຫຼັກວິທະຍາສາດ ແລະ ສະພາບຈຸດພິເສດຂອງບັນດາຊົນເຜົ່າໃນ ສປປ ລາວ ບົນພື້ນຖານທີ່ຊົນເຜົ່າເຂົາເຈົ້າມັກ, ພ້ອມນີ້ ກໍ່ເພື່ອແກ້ໄຂ ແລະ ກ່າວໄປສູ່ການລຶບລ້າງຊື່ຊົນເຜົ່າທີ່ມີຄວາມໝາຍສຽດສີ ແລະ ຖືກໝິ່ນປະໝາດ, ເພື່ອເພີ່ມທະວີຄວາມສາມັກຄີຄວາມສະເໝີພາບລະຫວ່າງເຜົ່າຕ່າງໆ, ສ້າງຈິດສຳນຶກໃຫ້ແຕ່ລະຊົນເຜົ່າມີຄວາມພູມໃຈໃນຊົນເຜົ່າຕົນເອງທີ່ີມີຢູ່ໃນວົງຄະນາຍາດແຫ່ງຊາດລາວ, ປັບປຸງສະຖິຕິຊາດ ແລະ ປະເທດຊາດເປັນເອກະພາບອັນໜຶ່ງອັນດຽວ, ຕ້ານກົນອຸບາຍແບ່ງແຍກຂອງພວກອິດທິກຳລັງປໍລະປັກ, ລຶບລ້າງຮ່ອງຮອຍຂອງຄວາມລະແວງສົງໄສລະຫວ່າງເຜົ່າຕ່າງໆທີ່ປະຫວັດສາດປະໄວ້, ພ້ອມກັນປົກປັກຮັກສາ ແລະ ສ້າງສາປະເທດຊາດໃຫ້ເຂັ້ມແຂງ ແລະ ໜັກແໜ້ນ.
[ບົດຂາວ: ໜັງສືພິມເສດຖະກິດ-ການຄ້າ]
