ໃນວັນທີ 16 ມີຖຸນາ 2015 ທີ່ຫ້ອງປະຊຸມສະພາແຫ່ງຊາດ ທີ່ນະຄອນຫລວງວຽງຈັນ ໄດ້ມີກອງປະຊຸມສຳມະນາ ເພື່ອຍົກສູງຄຸນນະ ພາບທາງດ້ານເນື້ອໃນໃຫ້ແກ່ ກອງປະຊຸມສະໃໝສາມັນເທື່ອທີ່ 9 ສະພາແຫ່ງຊາດ ຊຸດທີ VII ຊຶ່ງກອງປະຊຸມຄັ້ງນີ້ ຄະນະສ້າງຮ່າງກົດໝາຍວ່າດ້ວຍການແຂ່ງຂັນທາງທຸລະກິດ ນຳໂດຍທ່ານ ບຸນມີ ມະນີວົງ ລັດຖະມົນຕີຊ່ວຍວ່າການ ກະຊວງອຸດສາຫະກຳ ແລະ ການຄ້າ ທັງເປັນຫົວໜ້າຄະນະສ້າງຮ່າງກົດໝາຍດັ່ງກ່າວ, ທ່ານ ບຸນທຽນ ແກ້ວສີພາ ຮັກສາການຫົວໜ້າກົມການຄ້າພາຍໃນ ແລະ ກອງເລຂາຄະນະຮັບຜິດຊອບສ້າງຮ່າງກົດໝາຍດັ່ງກ່າວ ໄດ້ຂຶ້ນສະເໜີຮ່າງກົດໝາຍວ່າດ້ວຍການແຂ່ງຂັນທາງທຸລະກິດ ໃຫ້ບັນດາທ່ານສະມາຊິກສະພາ ເພື່ອປະກອບຄຳເຫັນ ແລະ ຈະນຳໄປປັບປຸງເພື່ອໃຫ້ທັນເອົາຮ່ງກົດໝາຍນີ້ເຂົ້າກອງປະຊຸມ ສະໃໝສາມັນ ເທື່ອທີ່ 9 ສະພາແຫ່ງຊາດ ຊຸດທີ VII.
ໃນທີ່ປະຊຸມຍັງໄດ້ຮັບຟັງການບັນຍາຍບົດຮຽນ ແລະ ປະສົບການ ຈາກບັນດາຜູ້ຊ່ຽວຊານ ຈາກ ປະເທດມາເລເຊຍ ແລະ ເອີຣົບ ເພື່ອໃຫ້ບັນດາຜູ້ແທນທີ່ເຂົ້າຮ່ວມກອງປະຊຸມມີຂໍ້ມູນໃນການປະກອບຄຳເຫັນ.
ບັນດາທ່ານສະມາຊິກສະພາແຫ່ງຊາດ ໄດ້ໃຫ້ຄວາມສົນໃຈກ່ຽວກັບເນື້ອໃນຂອງຮ່າງກົດໝາຍສະບັບນີ້ ແລະ ໄດ້ມີຄຳຖາມເຈາະຈີ້ມຕໍ່ຄະນະສ້າງຮ່າງກົດໝາຍ ແລະ ຄະນະຜູ້ຊ່ຽວຊານ ຕາມການຊີ້ນຳຂອງທ່ານປະທານກອງປະຊຸມ. ພາຍຫລັງທີ່ບັນດາສະມາຊິກສະພາໄດ້ສະແດງຄວາມຄິດເຫັນ ແລະ ມີຄຳຖາມ ຕໍ່ປະທານກອງປະຊຸມໄດ້ສັງລວມຄຳເຫັນ ໃຫ້ຫົວໜ້າຄະນະສ້າງຮ່າງກົດໝາຍ ແລະ ຜູ້ຊ່ຽວຊານຂຶ້ນອະທິບາຍ ແລະ ຊີ້ແຈງຕໍ່ແຕ່ລະບັນຫາ ທ່ານປະທານກອງປະຊຸມຍັງໄດ້ຊີ້ນຳໃຫ້ປັບປຸງບາງຈຸດໃນຮ່າງກົດໝາຍ ເພື່ອໃຫ້ຄະນະຮັບຜິດຊອບໄປປັບປຸງ ແລະ ຮຽບຮຽງຕາມການຊີ້ນຳຂອງກອງປະຊຸມ.
ກົມການຄ້າພາຍໃນ
