ກອງປະຊຸມໃຫຍ່ຄັ້ງທີ IV ຂອງອົງຄະນະພັກກະຊວງອຸດສາຫະກໍາ ແລະ ການຄ້າ (ອຄ) ໄຂຂຶ້ນຢ່າງເປັນທາງການ ລະຫວ່າງວັນທີ 09-10 ກໍລະກົດ 2015 ທີ່ຜ່ານມາ ໂດຍການໃຫ້ກຽດເຂົ້າຮ່ວມຂອງສະຫາຍ ສົມສະຫວາດ ເລັ່ງສະຫວັດ ກຳມະການກົມການເມືອງສູນການພັກ, ຮອງນາຍົກລັດຖະມົນຕີ, ຜູ້ຊີ້ນຳຂົງເຂດວຽກງານເສດຖະກິດ ການຜະລິດ ແລະ ຈໍລະຈອນ.
ຈຸດປະສົງຂອງການຈັດກອງປະຊຸມໃນຄັ້ງນີ້ ແມ່ນເພື່ອພ້ອມກັນຕີລາຄາຄືນຜົນການຊີ້ນໍາໆພາຂອງອົງຄະນະພັກກະຊວງອຸດສາຫະກໍາ ແລະ ການຄ້າ ໃນການປະຕິບັດມະຕິກອງປະຊຸມໃຫຍ່ຄັ້ງທີ III ຂອງຕົນໃນໄລຍະ 2011-2015 ເພື່ອຊອກໃຫ້ເຫັນດ້ານຕັ້ງໜ້າ, ຜົນງານ, ຈຸດອ່ອນ ຂໍ້ຄົງຄ້າງ ແລະ ບົດຮຽນທີ່ຖອດຖອນໄດ້ພ້ອມທັງຄົ້ນຄວ້າກໍານົດທິດທາງແຜນການສູ້ຊົນໄລຍະປີ 2016-2020, ນອກນີ້ ກໍເພື່ອເປັນການສໍາຫລວດກວດກາຄືນຜົນການເຄື່ອນໄຫວຊີ້ນໍາໆພາຂອງຄະນະພັກກະຊວງ ແລະ ຍັງຈະໄດ້ດໍາເນີນການເລືອກຕັ້ງເອົາຄະນະບໍລິຫານງານພັກກະຊວງຊຸດໃໝ່.
ສະຫາຍ ນາງ ເຂັມມະນີ ພົນເສນາ ເລຂາທິການພັກກະຊວງ, ລັດຖະມົນຕີວ່າການກະຊວງ ອຄ ໄດ້ກ່າວລາຍງານຕໍ່ກອງປະຊຸມວ່າ: ຜົນສຳເລັດທີ່ພົ້ນເດັ່ນໃນການພັດທະນາຂອງຂະແໜງການຕົນ ໃນໄລຍະ 5 ປີ ຜ່ານມາ ຂອງຂະແໜງການອຸດສາຫະກໍາ ແລະ ການຄ້າ ຍັງສືບຕໍ່ຂະຫຍາຍຕົວດີ ແລະ ຕໍ່ເນື່ອງຄືຂະແໜງອຸດສາຫະກໍາປຸງແຕ່ງ ແລະ ການຄ້າ, ອຸດສາຫະກໍາປຸງແຕ່ງ 10% ແລະ ການຄ້າຂາຍຍົກ-ຂາຍຍ່ອຍ 19% ໄດ້ປະກອບສ່ວນເຂົ້າໃນຍອດຜະລິດຕະພັນພາຍໃນ ຫລື GDP ໃນສົກປີ 2014-15 ແມ່ນ 29%. ຜົນສໍາເລັດໃນການນໍາພາແຕ່ລະໜ້າວຽກວິຊາສະເພາະສາມາດຕີລາຄາດັ່ງນີ້:
ວຽກງານອຸດສາຫະກໍາ ແລະ ຫັດຖະກໍາ: ອັດຕາເພີ່ມສະເລ່ຍຂອງອຸດສາຫະກໍາປຸງແຕ່ງ ແມ່ນຢູ່ໃນຈັງ ຫວະ 9% ຊຶ່ງສະແດງອອກໃນຈໍານວນໂຮງງານອຸດສາຫະກໍາປຸງແຕ່ງໃນປີ 2013 ມີເຖິງ 39.872 ແຫ່ງ ແລະ ແຮງງານ 160.000 ຄົນ ເມື່ອທຽບໃສ່ ປີ 2010 ແມ່ນເພີ້ມຂຶ້ນ 3.924 ແຫ່ງ ແລະ ແຮງງານເພີ້ມຂຶ້ນ 43.174 ຄົນ, ແລະ ອຸດສາຫະກໍາປຸ່ງແຕ່ງທີ່ເດັ່ນກວ່າໝູ່ແມ່ນໝວດຜະລິດສະບຽງອາຫານ ແລະ ເຄື່ອງດື່ມ ໆລໆ. ນອກນັ້ນ, ການຄຸ້ມຄອງວຽກງານອຸດສາຫະກໍາປຸງແຕ່ງແມ່ນມີຄວາມສອດຄ່ອງຕາມຫລັກສາກົນເປັນຕົ້ນ ດ້ານຄວາມປອດໄພ ສຸຂານາໄມ, ມາດຕະຖານຜະລິດຕະພັນ ແລະ ອື່ນໆ. ສໍາລັບການພັດທະນາດ້ານຫັດຖະ ກໍາແມ່ນໄດ້ມີການປັບປຸງການຈັດຕັ້ງຂອງສະມາຄົມຫັດຖະກໍາ, ການເຄື່ອນໄຫວຜະລິດຕະພັນສິນຄ້າ, ການຈັດ ງານ ແລະ ເຂົ້າຮ່ວມງານວາງສະແດງສິນຄ້າກໍເປັນຂະບວນການກວ້າງຂວາງ ແລະ ຕໍ່ເນື່ອງ. ໂດຍຄາດຄະເນ ລວມຍອດມູນຄ່າການຜະລິດສິນຄ້າຫັດຖະກໍາປະມານ 2.850 ຕື້ກີບ ແລະ ອັດຕາການຂະຫຍາຍຕົວສະເລັ່ຍ ແມ່ນ 15 %ຕໍ່ປີ.
ວຽກງານການຄ້າພາຍໃນ: ໄດ້ຂະຫຍາຍຕົວຢ່າງຕັ້ງໜ້າທາງດ້ານປະລິມານ ແລະ ຄຸນະພາບ ສະແດງ ອອກໃນຈັງຫວະການຂະຫຍາຍຕົວສະເລັ່ຍ 7,2%ຕໍ່ປີ. ພ້ອມນັ້ນ ກໍໄດ້ປະກອບສ່ວນສ້າງວຽກເຮັດງານທໍາ ປະມານ 440 ພັນຄົນໃນປີ 2013, ເພີ່ມຂຶ້ນ 20% ທຽບກັບປີ 2012. ໄດ້ມີຕະຫລາດຂາຍຍົກ-ຂາຍຍ່ອຍສິນ ຄ້າໃນຂອບເຂດທົ່ວປະເທດທັງໝົດ 753 ແຫ່ງ (ປີ 2014) ທຽບໃສ່ປີ 2010 ເພີ້ມຂຶ້ນ 138 ແຫ່ງເທົ່າກັບ 22,4%; ໃນນັ້ນມີຕະຫລາດຂະໜາດໃຫຍ່ 60 ແຫ່ງ, ຂະໜາດກາງ 131 ຂະໜາດນ້ອຍ 350 ແຫ່ງ ແລະ ຕະຫລາດ ນັດ 212 ແຫ່ງ. ດ້ານການຄຸ້ມຄອງລາຄາສິນຄ້າຍຸດທະສາດ ແລະ ສິນຄ້າກະທົບໄວຕໍ່ການຜະລິດ ແລະ ຊີວິດ ການເປັນຢູ່ຂອງປະຊາຊົນແມ່ນໄດ້ມີການຕິດຕາມ ແລະ ດໍາເນີນງານຢ່າງໃກ້ຊິດດ້ວຍວິທີການ ດັດສົມການສະໜອງ ແລະ ຄວາມຕ້ອງການ ແລະ ການຄຸ້ມຄອງດ້ວຍໂຄງປະກອບລາຄາ. ການຄຸ້ມຄອງ ທຸລະກິດນໍ້າມັນເຊື້ອໄຟແມ່ນໄດ້ເອົາໃຈໃສ່ຄຸ້ມຄອງບັນດາຫົວໜ່ວຍທຸລະກິດທີ່ນໍາເຂົ້າ ແລະ ຈໍາໜ່າຍນໍ້າມັນ ເຊື້ອໄຟໃຫ້ມີການເຄື່ອນໄຫວຖືກຕ້ອງຕາມລະບຽບການ ແລະ ກົດໝາຍ, ຊຶ່ງໃນປັດຈຸບັນ ມີ 22 ບໍລິສັດ, ໃນນີ້ ກໍາລັງກໍ່ສ້າງພື້ນຖານໂຄງລ່າງ 07 ບໍລິສັດ. ສໍາລັບລາຄານໍ້າມັນເຊື່ອໄຟນັ້ນແມ່ນມີການດັດປັບຕາມກົນໄກເສດ ຖະກິດຂອງ ລາຄາ ນໍ້າ ມັນໃນຕະຫລາດໂລກ.
ວຽກງານການຄ້າ ແລະ ການເຊື່ອມໂຍງເສດຖະກິດກັບຕ່າງປະເທດ: ມູນຄ່າການຄ້າກັບຕ່າງ ປະເທດຂະຫຍາຍຕົວສະເລ່ຍ 11%ຕໍ່ປີ. ໃນນັ້ນ ການສົ່ງອອກເພີ່ມ 12% ຕໍ່ປີ (ໄຟຟ້າ, ແຮ່ທາດ ແລະ ຜະລິດຕະພັນແຮ່ ທາດ, ເຄື່ອງນຸ່ງຫົ່ມ, ກາເຟ ແລະ ກາເຟສໍາເລັດຮູບ, ນໍ້າຕານ, ມັນຕົ້ນ ແລະ ແປ້ງມັນຕົ້ນ, ສັດລ້ຽງ, ຜະລິດຕະ ພັນໄມ້ ແລະ ອື່ນໆ) ຊຶ່ງຕະຫລາດສົ່ງອອກຕົ້ນຕໍແມ່ນ ໄທ, ອົດສະຕາລີ, ຈີນ, ຫວຽດນາມ ແລະ ອື່ນໆ. ການ ນໍາເຂົ້າເພີ່ມຂຶ້ນສະເລັ່ຍ 19% ຕໍ່ປີ (ນໍ້າມັນເຊື້ອໄຟ ແລະ ອາຍແກ໊ສ, ອຸປະກອນກໍ່ສ້າງ, ພາຫະນະ ແລະ ສິ້ນສ່ວນອາໄຫລ່, ສິນຄ້າຮັບໃຊ້ອຸດສາຫະກໍາ, ສິນຄ້າຮັບໃຊ້ກະສິກໍາ, ສະບຽງອາຫານ ແລະ ອື່ນໆ) ຊຶ່ງຕະຫລາດ ທີ່ນໍາເຂົ້າສິນຄ້າຕົ້ນຕໍແມ່ນ ໄທ, ຈີນ, ຫວຽດນາມ, ຍີ່ປຸ່ນ ແລະ ອື່ນໆ.
ສປປ ລາວ ໄດ້ເຂົ້າເປັນສະມາຊິກອົງການການຄ້າໂລກໃນຕົ້ນປີ 2013 ໃນການເຊື່ອມໂຍງເສດຖະກິດ ກັບຕ່າງປະເທດໄດ້ມີການປັບປຸງ ແລະ ສ້າງນິຕິກໍາທີ່ຕິດພັນກັບການຄ້າຫລາຍກວ່າ 90 ສະບັບ ແລະ ການ ກະກຽມຄວາມພ້ອມໃນການເຂົ້າຮ່ວມ AEC ປະຕິບັດໄດ້ແລ້ວ 92%.
ວຽກງານສົ່ງເສີມ SME ສົ່ງເສີມການຜະລິດ ແລະ ການຄ້າ: ໄດ້ມີການປັບປຸງສະພາບແວດລ້ອມທາງ ລະບຽບການ ແລະ ການຄຸ້ມຄອງລັດຕໍ່ການເຄື່ອນໄຫວທຸລະກິດ, ການເຂົ້າເຖິງແຫລ່ງທຶນ, ການສົ່ງເສີມການເຂົ້າ ຫາຕະຫລາດ ແລະ ການຂະຫຍາຍຕະຫລາດ, ການສົ່ງເສີມການຜະລິດ ແລະ ການຄ້າ (ສິນຄ້າ ODOP ໃນ ປັດຈຸບັນມີທັງໝົດ 60 ຫົວໜ່ວຍ ໃນ 60 ບ້ານ 33 ເມືອງ 14 ແຂວງ)
ນອກນັ້ນໃນທີ່ປະຊຸມຍັງໄດ້ກຳນົດທິດທາງໜ້າທີ່ວຽກງານຈຸດສຸມໃນຕໍ່ໜ້າ ຂອງກະຊວງອຸດສາຫະກຳ ແລະ ການຄ້າ ກໍ່ຄືການສ້າງແຜນຍຸດທະສາດ ແລະ ການພັດທະນາ 5 ປີຂອງຂະແໜງການອຸດສາຫະກໍາ ແລະ ການຄ້າ ໂດຍໃຫ້ຜັນຂະຫຍາຍ 3 ແຜນນະໂຍບາຍຄື: (1) ເຊື່ອມໂຍງກັບເສດຖະກິດພາກພື້ນ ແລະ ສາກົນຢ່າງເປັນເຈົ້າການ, ຊຶ່ງແມ່ນການເປີດຕະຫລາດໃຫ້ແກ່ ກັນ ແລະ ກັນລະຫວ່າງປະເທດ ອາຊຽນ ແລະ ອາຊຽນກັບຄູ່ເຈລະຈາ, ຮັກສາການພົວພັນການຄ້າກັບ ປະເທດຄູ່ຄ້າທີ່ມີຢູ່ພ້ອມທັງຂະຫຍາຍໄປສູ່ຕະຫລາດໃໝ່ໂດຍສະເພາະໃນອາຊຽນ ແລະ ອາຊຽນ ກັບ ຄູ່ ເຈລະຈາ; (2) ສ້າງສະພາບແວດລ້ອມທີ່ເອື້ອອໍານວຍໃຫ້ແກ່ພາກທຸລະກິດ ໂດຍປະສານພາກສ່ວນທີ່ກ່ຽວຂ້ອງເພື່ອປະຕິ ບັດຍຸດທະສາດການອໍານວຍຄວາມສະດວກດ້ານການຄ້າໃຫ້ເປັນຈິງ ແນໃສ່ຫລຸດຜ່ອນຕົ້ນທຶນການຄ້າໃຫ້ ພາກທຸລະກິດ, ຄົ້ນຄວ້າບັນດານິຕິກໍາຕ່າງໆເຊັ່ນ ກົດໝາຍວ່າດ້ວຍເຄມີ ກົດໝາຍວ່າດ້ວຍການຕ້ານ ການທຸ້ມຕະຫລາດ ມາດຕະການປົກປ້ອງຊົ່ວຄາວ ແລະ ມາດຕະການຕອບໂຕ້ການອຸດໜູນ…, ສ້າງ ບັນຊີຮຽກການລົງທຶນພາຍໃນ ແລະ ຕ່າງປະເທດເຂົ້າໃນຂະແໜງອຸດສາຫະກໍາ ແລະ ການຄ້າ, ການ ຄຸ້ມຄອງສະພາບແວດລ້ອມໂຮງງານອຸດສາຫະກໍາບໍ່ໃຫ້ກະທົບຕໍ່ທໍາມະຊາດ ແລະ ການດໍາລົງຊີວິດອັນ ເປັນປົກກະຕິຂອງປະຊາຊົນ; ແລະ (3) ສ້າງຄວາມພ້ອມແກ່ພາກທຸລະກິດເພື່ອຮັບຮອງການແຂ່ງຂັນທີ່ເພີ່ມຂຶ້ນຢ່າງຢືນຍົງ ແນໃສ່ສົ່ງເສີມພາກທຸ ລະກິດປັບປຸງຄຸນນະພາບສິນຄ້າ ແລະ ມາດຕະຖານສິນຄ້າອຸດສາຫະກໍາ, ພັດທະນາສິນຄ້າ, ຍົກລະດັບ ຜະລິດຕະພາບຂອງແຮງງານ, ສົ່ງເສີມການປະກອບທຸລະກິດດ້ານການຜະລິດ, ການຄ້າ ແລະ ການບໍລິ ການ, ຄົ້ນຄວ້າສ້າງຕັ້ງຮູບແບບຫົວໜ່ວຍ ເສດຖະກິດຮ່ວມມືຂອງປະຊາຊົນທີ່ເໝາະສົມ ແລະ ອື່ນໆ.
ໃນຕອນທ້າຍຂອງກອງປະຊຸມ ສະຫາຍ ສົມສະຫວາດ ເລັ່ງສະຫວັດ ໄດ້ກ່າວໃຫ້ຄຳໂອ້ລົມຕໍ່ວຽກງານການພັດທະນາຂະແໜງອຸດສາຫະກຳປຸ່ງແຕ່ງ ແລະ ການຄ້າ ພ້ອມທັງແນວທາງໃນການປະຕິບັດວຽກງານຕົວຈິງ ເພື່ອກໍ່ສ້າງໃຫ້ໄດ້ຮັບໝາກຜົນຕ່າງໆ ພ້ອມນັ້ນຍັງໄດ້ເນັ້ນໜັກໃຫ້ຄະນະບໍລິຫານງານພັກກະຊວງ ອຄ ຊຸດໃໝ່ນີ້ ຕ້ອງໄດ້ກຳແໜ້ນ 3 ຫຼັກການ ຄື: (1) ກຳແໜ້ນແນວທາງນະໂຍບາຍຂອງພັກ, (2) ເປັນເຈົ້າການເຕົ້າໂຮມຄວາມສາມັກຄີ, ແລະ (3) ແບບແຜນເຮັດວຽກຕ້ອງມີແນວທາງວິທະຍາສາດ.
ສູນສະຖິຕິ ແລະ ຂ່າວສານ
ກະຊວງອຸດສາຫະກຳ ແລະ ການຄ້າ
