ກະຊວງອຸດສາຫະກຳ ແລະ ການຄ້າ (ອຄ) ໄດ້ຈັດກອງປະຊຸມເຊື່ອມຊຶມມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ X ຂອງພັກ ໃນວັນທີ 29-30 ມີຖຸນາ 2016 ຜ່ານມາ ທີ່ກະຊວງອຸດສາຫະກຳ ແລະ ການຄ້າ ໂດຍມີ ທ່ານ ບຸນມີ ມະນີວົງ ຮອງລັດຖະມົນຕີ ກະຊວງອຸດສາຫະກຳ ແລະ ການຄ້າ ເປັນຜູ້ເຜີຍແຜ່.
ການເຊື່ອມຊຶມມະຕິດັ່ງກ່າວ ແມ່ນແນໃສ່ຍົກລະດັບຄວາມຮັບຮູ້ຄວາມເຂົ້າໃຈ ແລະ ເປັນເອກະພາບກ່ຽວກັບແນວທາງການປ່ຽນແປງໃໝ່ຂອງພັກເຮົາ ສືບຕໍ່ດຳເນີນໄປຢ່າງເລິກເຊິ່ງ, ຮອບດ້ານ ແລະ ມີຜົນສຳເລັດໃຫຍ່ຫຼວງກວ່າເກົ່າ ເປັນຕົ້ນແມ່ນວິໄສທັດຮອດ 2030, ແຜນຍຸດທະສາດ 2016-2025 ແລະ ແຜນການ 5 ປີ ຄັ້ງທີ VIII, ພ້ອມທັງຕີລາຄາຄືນຜົນສຳເລັດການຈັດຕັ້ງປະຕິບັດມະຕິ IX ຂອງພັກ ແລະ ສ້າງຄວາມເຊື່ອໝັ້ນຄວາມຕັດສິນໃຈຕາມທິດກ້າວຂຶ້ນ, ສ້າງບາດກ້າວບຸກທະລຸໃຫ້ໄດ້ ແລະ ຍົກສູງຄວາມຮັບຜິດຊອບຂອງຄະນະພັກ, ພະນັກງານ ແລະ ບັນດາຊັ້ນຄົນໃນທົ່ວສັງຄົມເຂົ້າສູ່ການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ X ຂອງພັກປະຊາຊົນປະຕິວັດລາວ.
ທ່ານ ບຸນມີ ມະນີວົງ ໄດ້ກ່າວວ່າ: ການເຊື່ອມຊຶມຄັ້ງນີ້ ໄດ້ສຸມໃສ່ເອກະສານ 3 ບົດ ໃຫ້ບັນດາທ່ານຜູ້ເຂົ້າຮ່ວມໄດ້ຮັບຮູ້ເຂົ້າໃຈ ແລະ ເປັນເອກະພາບກ່ຽວກັບນະໂຍບາຍໃໝ່ ເຊິ່ງບັນດາທ່ານທີ່ໄດ້ເຂົ້າຮ່ວມຍັງໄດ້ພ້ອມກັນຄົ້ນຄວ້າ ແລະ ປະກອບຄຳເຫັນທີ່ມີລັກສະນະສຳມະນາເປີດກວ້າງປະຊາທິປະໄຕ ໃນການອອກຄຳຄິດຄຳເຫັນ ເພື່ອພ້ອມກັນຕີລາຄາ, ເອກະພາບຕໍ່ບັນຫາ ແລະ ຕັດສິນໃຈແກ້ໄຂໃຫ້ມີການຫັນປ່ຽນຢ່າງຈະແຈ້ງ ແລະ ຜັນຂະຫຍາຍເນື້ອໃນມະຕິ X ມາເປັນແຜນພັດທະນາໃນຂົງເຂດອຸດສາຫະກຳ ແລະ ການຄ້າ ໃຫ້ມີບາດກ້າວຂະຫຍາຍຕົວຂຶ້ນ.
[ສູນສະຖິຕິ ແລະ ຂ່າວສານ]
