ຕອນບ່າຍ ຂອງວັນທີ 16 ພະຈິກ 2017, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ພົບປະກັບຄະນະນັກທຸລະກິດ ນຳໂດຍທ່ານ Damien Scroope ອໍານວຍການບໍລິສັດ ຢາສູບລາວ ໃນໂອກາດທີ່ທ່ານໄດ້ຮັບຕຳແໜ່ງໃໝ່ ຊຶ່ງຄະນະດັ່ງກ່າວເປັນຕົວແທນຈາກບໍລິສັດ ຢາສູບລາວ ຈຳກັດ ມີທຸລະກິດຫລັກ: ການຜະລິດ ແລະ ຈໍາໜ່າຍຢາສູບ ໃນ ສປປ ລາວ;
ທ່ານ Damien Scroope ເປັນຜູ້ບໍລິຫານທີ່ມີປະສົບການສູງ ໃນດ້ານການຄ້າ ຢາສູບ ຢູ່ປະເທດ Australia ແລະ ເປັນຄູ່ຮ່ວມທຶນ ນໍາບໍລິສັດຢາສູບລາວ ຈໍາກັດ; ທ່ານໄດ້ລາຍງານກ່ຽວກັບ ການປະຊຸມຢູ່ຮ່ອງກົງ ອາທິດຜ່ານມາ ທີ່ກ່າວເຖິງສະພາບການຜະລິດ ແລະ ຈໍາໜ່າຍຂອງບໍລິສັດຢາສູບ ໃນ Australia ເພີ່ມຂຶ້ນ 17% ທຽບກັບປີຜ່ານມາ ແລະ ແຜນການຈະເພີ້ມຂຶ້ນ 24% ທຽບກັບປີນີ້ ຊຶ່ງມີສາເຫດມາຈາກ ມີການຫຸ້ມຫໍ່ຜະລິດພັນທີ່ໃໝ່, ຍີ່ຫໍ້ເປັນທີ່ນິຍົມ ແລະ ຄູ່ຮ່ວມທຶນທີ່ເຂັ້ມແຂງ; ພ້ອມທັງ ຮຽກຮ້ອງໃຫ້ລັດຖະບານ ກໍຄືກະຊວງອຸດສາຫະກໍາ ແລະ ການຄ້າ ໂດຍສະເພາະກົມການຄ້າພາຍໃນ ທີ່ເພິ່ນໄດ້ພົບປະກັບ ທ່ານບຸນທຽນ ແກ້ວພາສິດ ຫົວໜ້າກົມກ່ອນໜ້ານີ້ ໃຫ້ເບິ່ງຄືນກ່ຽວກັບ ຜູ້ລັກລອບນຳເຂົ້າຢາສູບແບບເຖື່ອນຕາມແນວຊາຍແດນ ມີຄວາມຍາວເຖິງ 5,000 ກິໂລແມັດ ແລະ ມີການຈໍາໜ່າຍໃນຕະຫລາດຂອງ ສປປ ລາວ ຊຶ່ງມັນກະທົບຕໍ່ຜູ້ເຮັດທຸລະກິດທີ່ຖືກຕ້ອງຕາມກົດໝາຍ ນອກຈາກນີ້, ຍັງຮຽກຮ້ອງໃຫ້ລັດຖະບານລາວ ໃຫ້ການສະໜັບສະໜູນຕໍ່ການເຮັດທຸລະກິດ ຂອງບໍລິສັດຢາສູບລາວ ຈຳກັດ;
ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ຊົມເຊີຍຕໍ່ຜົນສໍາເລັດ ການເຮັດທຸລະກິດຢາສູບ ຂອງທ່ານ Damien Scroope, ມີການຕິດສະຫລາກຄໍາເຕືອນ ໃຫ້ແກ່ນັກສູບຜູ້ມາໃໝ່ ຮູ້ຈັກໂທດ ຂອງການສູບຢາທີ່ທໍາລາຍສຸຂະພາບ ແລະ ຍັງໄດ້ເຊີນຊວນໃຫ້ທ່ານ Damien Scroope ຊ່ວຍເປັນຫູເປັນຕາໃຫ້ແກ່ລັດຖະບານໃນການສະກັດກັ້ນພວກຄ້າຂາຍເຖື່ອນ ພ້ອມທັງເປັນຕົວແທນທີ່ດີສຳລັບຜູ້ເຮັດທຸລະກິດ ທີ່ຖືກກົດໝາຍຂອງ ສປປ ລາວ ອີກດ້ວຍ; ນອກນີ້, ຍັງຈະນໍາເອົາບັນຫາການຄ້າຂາຍເຖື່ອນຜະລິດຕະພັນຢາສູບ ໄປປຶກສາຫາລືກັບຂະແໜງການທີ່ກ່ຽວຂ້ອງ ເພື່ອຈະແກ້ໄຂບັນຫານີ້ໃຫ້ໝົດໄປເທື່ອລະກ້າວ;
ຕອນທ້າຍ, ທ່ານ Damien Scroope ພ້ອມຄະນະ ຂໍຂອບໃຈຕໍ່ການຕ້ອນຮັບຢ່າງອົບອຸ່ນ ຂອງທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດຽວກັນນີ້ ທ່ານ ລມຕ ໄດ້ອວຍພອນໄຊໃຫ້ທ່ານ Damien Scroope ມີຄວາມມ່ວນຊື່ນໃນການດໍາລົງຊີວິດ ຢູ່ສປປ ລາວ ແລະ ຂໍໃຫ້ທຸກຢ່າງຈົ່ງຣາບລື່ນ!
ຂ່າວໂດຍ: ທ.ນາງຖື
