ໃນວັນທີ 15 ທັນວາ 2017 ຜ່ານມານີ້ ໜ່ວຍງານເຈົ້າໜ້າທີ່ກວດກາການຄ້າ ເມືອງພູວົງ ໄດ້ລາຍງານ ການຈັດຕັ້ງປະຕິບັດວຽກງານຕາມພາລະບົດບາດຂອງຕົນ ໄລຍະ 1 ປີຜ່ານມາ ໂດຍການລົງກວດການຳຫົວໜ່ວຍທຸລະກິດ ຫ້າງຮ້ານຂາຍຍົກ-ຂາຍຍ່ອຍ ຢູ່ຕາມຕະຫລາດ ແລະ ຕາມຫ້າງຮ້ານ ໃນຂອບເຂດເມືອງ ຢ່າງປົກກະຕິ; ໃນການຈັດຕັ້ງ ປະຕິບັດວຽກງານການກວດກາ ການນໍາເຂົ້າ ແລະ ຈໍາໜ່າຍສິນຄ້າທີ່ບໍ່ຖືກຕ້ອງຕາມລະບຽບການ ຢູ່ຕາມຫ້າງຮ້ານ 36 ຄັ້ງ, ມີ 180 ເທື່ອຄົນ ສ້າງບົດບັນທຶກຕັກເຕືອນບັນດາທຸລະກິດ 12 ຄັ້ງ, 55 ສະບັບ, ໄດ້ຍຶດ ແລະ ສັງລວມລາຍການສິນຄ້າ ທີ່ນຳມາທຳລາຍ 24 ລາຍການ ມີມູນຄ່າ 21,655,000 ກີບ ແລະ ສິນຄ້າມາຈາກເມືອງຊານໄຊ ມີ 13 ລາຍການ ມີມູນຄ່າ 1,030,000 ກີບ ລວມທັງໝົດ 37 ລາຍການ ມີມູນຄ່າ 22,685,000 ກີບ ຊຶ່ງສິນຄ້າສ່ວນໃຫຍ່ແມ່ນປະເພດສະບຽງອາຫານ ແລະ ເຄື່ອງດື່ມ;
ພ້ອມດຽວກັນນີ້, ທາງຄະນະກໍາມະການກວດກາສິນຄ້າ ກໍ່ໄດ້ຈັດພິທີທຳລາຍສິນຄ້າທີ່ເຊື່ອມຄຸນນະພາບ, ນອກລະບົບ ແລະ ໝົດອາຍຸການນຳໃຊ້ ນຳເຂົ້າມາຄ້າຂາຍ-ຈໍາໜ່າຍພາຍໃນເມືອງພູວົງ;
ໂດຍປະຕິບັດຕາມວຽກງານປົກປ້ອງຜູ້ຊົມໃຊ້ ໜ່ວຍງານກວດກາການຄ້າ ເມືອງພູວົງ ພະແນກ ອຄ ແຂວງອັດຕະປື ໄດ້ເອົາໃຈໃສ່ປະຕິບັດສິດ ໜ້າທີ່ຕາມພາລະບົດບາດຂອງຕົນຢ່າງຕັ້ງໜ້າ ສາມາດສະກັດກັ້ນການລະເມີດກົດໝາຍ ກ່ຽວກັບການຄຸ້ມຄອງການຄ້າ, ການດຳເນີນທຸລະກິດ ທີ່ບໍ່ມີທະບຽນວິສາຫະກິດການຄ້າ, ສິນຄ້ານອກລະບົບ ໂດຍການສ້າງສະຕິ ແລະ ປູກຈິດສຳນຶກ ໃນການເຄົາລົບລະບຽບກົດໝາຍ ແນໃສ່ສົ່ງເສີມປົກປ້ອງຫົວໜ່ວຍທຸລະກິດການຄ້າ ທີ່ເຄື່ອນໄຫວຖືກຕ້ອງ, ສອດຄ່ອງກັບລະບຽບກົດໝາຍ ແລະ ເປັນໄປຕາມກົນໄກ ເສດຖະກິດຕະຫລາດ ທີ່ມີການດັດສົມຂອງລັດ ສົ່ງເສີມການຜະລິດສິນຄ້າ ທັງເປັນການປະກອບສ່ວນໃນການຄຸ້ມຄອງສິນຄ້າ, ລາຄາ ເພື່ອປົກປ້ອງສິດ ແລະ ຜົນປະໂຫຍດຂອງຜູ້ຊົມໃຊ້.
[ຂ່າວໂດຍ: ນາງ ຖື]
