ໃນເວລາ 3:30 ໂມງ ຂອງວັນທີ 28 ມີນາ 2018 ທີ່ຫ້ອງຮັບແຂກ ຂອງກະຊວງອຸດສາຫະກໍາ ແລະ ການຄ້າ ໄດ້ຕ້ອນຮັບ ຄະນະຜູ້ຕາງຫນ້າກຸ່ມບໍລິສັດຢຸນໜານ ໜົງເຂີນ ຂອງ ສປ ຈີນ ໂດຍການເປັນປະທານທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກໍາ ແລະ ການຄ້າ, ບັນດາກົມກ່ຽວຂ້ອງທີ່ເຂົ້າຮ່ວມມີ: ກົມແຜນການ ແລະ ການຮ່ວມມື, ກົມສົ່ງເສີນການຄ້າ, ຫ້ອງການກະຊວງ ອຄ ແລະ ທ່ານ ໄຊຊະນະ ສິດທິພອນ ຫົວຫນ້າຫ້ອງການຄະນະກໍາມາທິການຮ່ວມມືລາວ-ຈີນ ກໍ່ໃຫ້ກຽດເຂົ້າຮ່ວມ.
ໂຮງງານປຸງແຕ່ງຢາງພາລາ ທີ່ກຸ່ມບໍລິສັດຢຸນໜານ ໜົງເຂີນ ຂອງ ສປ ຈີນ ເປັນຜູ້ລົງທຶນໃນໂຄງການການປູກພືດທົດແທນການປູກຝິ່ນ ຂອງສອງລັດຖະບານ ລະຫວ່າງ ສປປ ລາວ-ສປ ຈີນ, ໂຮງງານດັ່ງກ່າວ ຕັ້ງຢູ່ແຂວງຫລວງນໍ້າທາ ສປປ ລາວ ເປັນບໍລິສັດຍັກໃຫຍ່ທີ່ຮັບຊື້ ຢາງພາລາດິບທົ່ວປະເທດ ການເຂົ້າພົບປະໃນຄັ້ງນີ້ ແມ່ນເພື່ອລາຍງານສະພາບການຕົວຈິງ, ບັນຫາຕ່າງໆ ກ່ຽວກັບການສົ່ງອອກ ໂດຍສະເພາະການສົ່ງອອກຢາງພາລາ-ເຂົ້າ ສປ ຈີນ ຊຶ່ງທາງເບື້ອງບໍລິສັດ ຢຸນນານ ໜົງເຂີນ ຕ້ອງການໃຫ້ກະຊວງອຸດສາຫະກໍາ ແລະ ການຄ້າ ສປປ ລາວ ຕໍ່ລອງບ ລັດທະບານຈີນ ໃຫ້ຍົກເວັ້ນອັດຕາພາສີ ແລະ ອາກອນ, ນອກນີ້ຕາງຫນ້າກຸ່ມບໍລິສັດ ຢຸນໜານ ໜົງເຂີນ ຂອງ ສປ ຈີນ ຍັງໄດ້ສະເໜີໃຫ້ກະຊວງ ອຄ ຂໍໂຄຕ້າສົ່ງອອກຢາງພາລາໄປຈີນ ນໍາລັດຖະບານ ສປ ຈີນ 50 ພັນໂຕນ ຕໍ່ປີອີກດ້ວຍ.
ພ້ອມດຽວກັນນີ້ທ່ານ ຕາງຫນ້າຈາກບໍລິສັດ ຍັງໄດ້ກ່າວຂອບໃຈ ທີ່ທາງຝ່າຍກະຊວງອຄ ໃຫ້ການຕອນຮັບ ແລະ ຮັບປາກວ່າຈະໃຫ້ຄວາມຊ່ອຍເຫຼືອ ຢ່າງສຸດຄວາມສາມາດ ເພື່ອລົດຕົ້ນທຶນໃນການຜະລິດ ແລະ ເຮັດໃຫ້ສິນຄ້າລາວ ມີຄຸນນະພາບ ແລະ ລາຄາຖືກລົງ.
ປັດຈຸບັນຢາງພາລາຂອງປີນີ້ຍັງບໍ່ທັນໄດ້ຜະລິດເທື່ອເພາະຊ່ວງນີ້ສະພາບອາກາດບໍ່ເອື້ອອໍານວຍໃຫເແກ່ການກິດຢ່ງສະນັ້ນໂຮງງານປຸງແຕ່ງຢາງພາລາຈິ່ງບໍມີຢາງດິບປ້ອນເຂົ້າໂຮງງານ ແລະ ທ່ານຕາງຫນ້າບໍລິສັດ ຍັງໄດ້ເວົ້າອີກວ່າ ກຸ່ມບໍລິສັດຢຸນໜານ ໜົງເຂີນ ຂອງ ສປ ຈີນ ຍັງໄດ້ໄປສ້າງຕັ້ງສາຂາຢູ່ພາກເໜືອມຽນມ້າ ທີ່ດໍາເນີນກິດຈະການກ່ຽວກັບການປຸງແຕ່ງຢາງພາລາເຊັ່ນກັນກັບຢູ່ ສປປ ລາວ.
ຂ່າວໂດຍ: ພູຄໍາ ຫລວງສຸພົນ
