ຕອນບ່າຍ ຂອງວັນທີ 04 ຕຸລາ 2019, ຢູ່ຫ້ອງປະຊຸມຊັ້ນ 4 ຂອງກະຊວງ ອຄ ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ພົບປະກັບ ທ່ານ Yu Yimin ຜູ້ຕາງໜ້າບໍລິສັດ ອາລີບາບາ ແລະ ຊ່ຽວຊານ ພ້ອມດ້ວຍຄະນະ ໃນໂອກາດທີ່ ໄດ້ມາສໍາຫຼວດໂຄງການ E-Commerce ສໍາລັບຜະລິດຕະພັນກະສິກໍາ ຢູ່ສປປ ລາວ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 10 ກວ່າທ່ານ.
ທ່ານ Yu Yimin ໄດ້ສະເໜີຈຸດປະສົງ ໃນການມາສໍາຫຼວດຄັ້ງນີ້ແມ່ນນອນໃນ 8 ໂຄງການໃຫຍ່ຂອງໂຄງການຊ່ວຍເຫຼືອລ້າຂອງຈີນຕໍ່ລາວ ທີ່ທ່ານ ສີ ຈິ້ນຜິງ ປະທານປະເທດຈີນ ໄດ້ປະກາດແຕ່ປີ 2017 ແລະ ໄດ້ຕິດພັນກັບໂຄງການຊ່ວຍເຫຼືອປັບປຸງລະບົບຂໍ້ມູນຂ່າວສານ (ICT) ຂອງກະຊວງອຸດສາຫະກໍາ ແລະ ການຄ້າ ທີ່ຝ່າຍຈີນກໍາລັງຈັດຕັ້ງປະຕິບັດຢູ່ໃນປະຈຸບັນ; ພ້ອມດຽວກັນນີ້, ທ່ານ Li Honggang ຊ່ຽວຊານຈາກຝ່າຍຈີນ ໄດ້ສະເໜີບົດຜົນການສໍາຫຼວດໂດຍຫຍໍ້ ແລະ ກົນໄກການປະສານງານ ພ້ອມທັງແຜນການຮ່ວມມືກັນໃນຕໍ່ໜ້າ ຊຶ່ງເຫັນວ່າຢູ່ ສປປ ລາວ ມີ 3 ຈຸດເດັ່ນຄື: 1/ ມີເນື້ອທີ່ດິນກະສິກໍາເປັນຈໍານວນຫຼາຍ 2/ ຜະລິດຕະພັນກະສິກໍາມີຄຸນນະພາບ ເປັນສິນຄ້າປອດສານພິດ ແລະ ສີຂຽວ 3/ ເຂົ້າໄກ່ນ້ອຍ ຂອງລາວ ເປັນຜະລິດຕະພັນພື້ນເມືອງທີ່ມີຄຸນນະພາບ ແລະ ຕະຫຼາດຈີນກໍ່ມີຄວາມຕ້ອງການ ຖ້າມີການໂຄສະນາເຜີຍແຜ່ຂໍ້ມູນຂ່າວສານໃຫ້ກວ້າງຂວາງ ໂດຍຜ່ານກົນໄກການຮ່ວມມືລະຫວ່າງ ພາກລັດ ແລະ ເອກະຊົນ ຢ່າງເປັນຕ່ອງໂສ້ລະບົບຄົບຊຸດ;
ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ຊົມເຊີຍຕໍ່ຜົນການມາສໍາຫຼວດ ຂອງຄະນະທ່ານ Yu Yimin ແລະ ຫວັງວ່າຈະມີການແລກປ່ຽນບົດຮຽນດ້ານວິຊາການຊຶ່ງກັນ ແລະ ກັນ ໃຫ້ເລິກເຊິ່ງ ແລະ ຫຼາຍຂຶ້ນ.
ຕອນທ້າຍ, ທ່ານ Yu Yimin ພ້ອມຄະນະ ຂໍຂອບໃຈຕໍ່ການຕ້ອນຮັບຢ່າງອົບອຸ່ນ ຂອງທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງອຸດສາຫະກຳ ແລະ ການຄ້າ ພ້ອມດຽວກັນນີ້ ທ່ານ ລມຕ ໄດ້ອວຍພອນໄຊໃຫ້ທ່ານ Yu Yimin ຜູ້ຕາງໜ້າບໍລິສັດ ອາລີບາບາ ແລະ ຊ່ຽວຊານ ພ້ອມດ້ວຍຄະນະ ຈົ່ງປະສົບຜົນສໍາເລັດໃນໜ້າທີ່ການງານ ແລະ ກັບຄືນປະເທດດ້ວຍຄວາມສະຫວັດດີພາບ.
ພາບ-ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
