ຕອນເຊົ້າ ຂອງວັນທີ 25 ຕຸລາ 2019, ຢູ່ສະຖານທີ່ໂຮງງານຕົ້ມກັ່ນນໍ້າມັນດໍາ ໃຈຍະຫວາດ, ບ້ານບໍ່ເຫຼັກ, ເມືອງໄຊທານີ, ນະຄອນຫຼວງວຽງຈັນ ໄດ້ຈັດພິທີທໍາລາຍສິນຄ້າປອມແປງ, ຮຽນແບບ ເຄື່ອງໝາຍການຄ້າຍີ່ຫໍ້ ຮອນດ້າ ປະເພດນໍ້າມັນເຄື່ອງ ທີ່ນໍາເຂົ້າມາ ແລະ ຈໍາໜ່າຍບໍ່ຖືກຕ້ອງສອດຄ່ອງ ກັບກົດໝາຍ ແລະ ລະບຽບການທີ່ ສປປ ລາວວາງອອກ, ໂດຍໃຫ້ກຽດເຂົ້າຮ່ວມພິທີທໍາລາຍໃນຄັ້ງນີ້ມີ: ທ່ານ ສູນທອນ ຈັນທິລາດ ຮອງຫົວໜ້າກົມການຄ້າພາຍໃນ, ກະຊວງອຸດສາຫະກໍາ ແລະ ການຄ້າ, ບັນດາທ່ານຕາງໜ້າຈາກກົມຊັບສິນທາງປັນຍາ, ກະຊວງວິທະຍາສາດ ແລະ ເທັກໂນໂລຊີ, ກົມພາສີ ກະຊວງການເງິນ, ພະແນກຕໍາຫຼວດເສດຖະກິດ ນະຄອນຫຼວງວຽງຈັນ, ພະແນກອຸດສາຫະກໍາ ແລະ ການຄ້າ ນະຄອນຫຼວງວຽງຈັນ, ນາຍບ້ານ ບ້ານບໍ່ເຫຼັກ, ຕາງບໍລິສັດຮອນດ້າ ແລະ ພາກສ່ວນທີ່ກ່ຽວຂ້ອງ ຈໍານວນ 35 ທ່ານ.
ໂດຍປະຕິບັດຕາມ ກົດໝາຍປົກປ້ອງຜູ້ຊົມໃຊ້ ສະບັບເລກທີ 02/ສພຊ, ລົງວັນທີ 30 ມິຖຸນາ 2010 ແລະ ດໍາລັດ ວ່າດ້ວຍການກວດກາການຄ້າ ສະບັບເລກທີ 508/ລບ, ລົງວັນທີ 4 ທັນວາ 2012. ກະຊວງອຸດສາຫະກໍາ ແລະ ການຄ້າ ໄດ້ມອບໃຫ້ກົມການຄ້າພາຍໃນ ໃນນາມອົງການປະຕິບັດວຽກງານກວດກາການຄ້າ ແຕ່ງຕັ້ງເຈົ້າໜ້າທີ່ກວດກາການຄ້າ ລົງຕິດຕາມກວດກາ ເປົ້າໝາຍຈໍາໜ່າຍສິນຄ້າປອມແປງຮຽນແບບ ເຄື່ອງໝາຍການຄ້າ ຍີ່ຫໍ້ຮອນດ້າ ຢູ່ນະຄອນຫຼວງວຽງຈັນ, ຜ່ານການກວດກາຕົວຈິງສາມາດຍຶດ ສິນຄ້າປະເພດນໍ້າມັນເຄື່ອງທີ່ມີເຄື່ອງໝາຍການຄ້າຍີ່ຫໍ້ຮອນດ້າ ທີ່ປອມແປງຮຽນແບບ ເຄື່ອງໝາຍຂອງບໍລິສັດຮອນດ້າ ແລະ ບໍ່ໄດ້ຮັບອະນຸຍາດ ຫຼື ບໍ່ໄດ້ຮັບລິຂະສິດຈາກພາກສ່ວນທີ່ກ່ຽວຂ້ອງຢ່າງຖືກຕ້ອງ ເຊິ່ງເປັນການລະເມີດກົດໝາຍວ່າດ້ວຍຊັບສິນທາງປັນຍາ(ສະບັບປັບປຸງ) ສະບັບເລກທີ 38/ສພຊ, ລົງວັນທີ 15 ພະຈິກ 2017 ແລະ ຂໍ້ຕົກລົງ ວ່າດ້ວຍການປະຕິບັດວຽກງານກວດກາການຄ້າ ສະບັບເລກທີ 1499/ອຄ.ກຄພນ, ລົງວັນທີ 08 ກັນຍາ 2017. ນໍ້າມັນເຄື່ອງປອມແປງຮຽນແບບ ທີ່ຍຶດມາ ແລະ ຈະທໍາລາຍໃນຄັ້ງນີ້ ມີ : ນໍ້າມັນເຄື່ອງລຸ້ນ 4 T ຝາສີແດງ 1 ລິດ, ນ້ຳມັນເຄື່ອງລຸ້ນ 4 T ຝາສີປອນ 0,7 ລິດ; 4 T ຝາສີຟ້າ 0,8 ລິດ ລວມທັງໝົດ 6.490 ຕຸກ ປະລິມານ 4.699 ລິດ ຄິດເປັນມູນຄ່າ 154.368.000 ກີບ.
ການທໍາລາຍໃນຄັ້ງນີ້ ແມ່ນໄດ້ໃຊ້ວິທີເທປົນໃສ່ກັບນໍ້າມັນດໍາ ຂອງໂຮງງານກັ່ນນໍ້າມັນດໍາໃຈຍະຫວາດ ເພື່ອນໍາໄປກັ່ນຕອງຄືນໃໝ່; ວິທີທໍາລາຍນີ້ ກໍເພື່ອເປັນການຮັກສາສິ່ງແວດລ້ອມ.
ຕໍ່ກັບບັນຫາດັ່ງກ່າວ ເພື່ອເປັນການປົກປ້ອງຜູ້ຊົມໃຊ້ ໃຫ້ໄດ້ໃຊ້ສິນຄ້າທີ່ຖືກກັບເຄື່ອງໝາຍການຄ້າ ໄດ້ຄຸນນະພາບ ພ້ອມດຽວກັນກໍເປັນການປົກປ້ອງຜົນປະໂຫຍດຂອງຫົວໜ່ວຍທຸລະກິດ ທີ່ດໍາເນີນທຸລະກິດຖືກຕ້ອງສອດຄ່ອງກັບກົດໝາຍ ແລະ ລະບຽບການທີ່ ສປປ ລາວ ວາງອອກ ປະກອບສ່ວນພັດທະນາເສດຖະກິດຂອງຊາດ ຮຽກຮ້ອງໃຫ້ທຸກພາກສ່ວນ ຈົ່ງຊ່ວຍເປັນຫູເປັນຕາໃຫ້ແກ່ເຈົ້າໜ້າທີ່ພວກເຮົາ ຖ້າພົບເຫັນສາມາດແຈ້ງມາຍັງສາຍດ່ວນ 1510 ສາຍດ່ວນປົກປ້ອງຜູ້ຊົມໃຊ້. ສໍາລັບເຈົ້າໜ້າທີ່ ທີ່ກ່ຽວຂ້ອງ ໂດຍສະເພາະເຈົ້າໜ້າທີ່ປະຈໍາດ່ານ ກໍໃຫ້ມີຄວາມເຂັ້ມງວດສະກັດກັ້ນແຕ່ຕົ້ນທາງ ບໍ່ໃຫ້ຜູ້ສວຍໂອກາດລັກນໍາເຂົ້າມາຈໍາໜ່າຍພາຍໃນປະເທດລາວ.
ຂ່າວໂດຍ: ນ ສຸກອາລຸນ ອິນທະວອນ ພະແນກກວດກາການຄ້າ ກຄພນ
ພາບ ແລະ ຮຽບຮຽງໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກຜຮ
