ໃນວັນທີ 18-20 ພະຈິກ 2019, ຄະນະຜູ້ແທນລາວ ນໍາໂດຍທ່ານນາງ ເຂັມມະນີ ພົນເສນາ, ລັັດຖະມົນຕີກະຊວງອຸດສາຫະກຳ ແລະ ການຄ້າ ໄດ້ເຂົ້າຮ່ວມກອງປະຊຸມການທົບທວນນະໂຍບາຍການຄ້າ ຂອງ ສປປ ລາວ ທີ່ເຈນີວາ, ປະເທດສະວິດເຊີແລນ ຊຶ່ງມີເອກອັກຄະລັດຖະທູດຟີລິບປິນ ປະຈຳອົງການການຄ້າໂລກ (ອຄລ) ເປັນປະທານ, ເອກອັກຄະລັດຖະທູດຝຣັ່ງ ເປັນຜູ້ນຳພາການສົນທະນາ. ກອງປະຊຸມຄັ້ງນີ້ຈັດຂຶ້ນເພື່ອທົບທວນນະໂຍບາຍການຄ້າຂອງ ສປປ ລາວ ໃນນາມສະມາຊິກ ອຄລ ໂດຍອີງຕາມພັນທະສັນຍາ ຊຶ່ງທຸກສະມາຊິກ ຕ້ອງໄດ້ທົບທວນນະໂຍບາຍການຄ້າຂອງຕົນ; ໃນນັ້ນ ສະມາຊິກທີ່ມີສ່ວນແບ່ງທາງການຄ້າໃນ 4 ອັນດັບຕົ້ນຂອງໂລກ ແມ່ນຈະໄດ້ຮັບການທົບທວນນະໂຍບາຍການຄ້າທຸກໆ 3 ປີ; ສະມາຊິກທີ່ມີສ່ວນແບ່ງທາງການຄ້າໃນ 16 ອັນດັບຖັດຈາກນັ້ນ ແມ່ນທຸກໆ 5 ປີ ແລະ ປະເທດດ້ອຍພັດທະນາ ແມ່ນທຸກໆ 7 ປີ. ສໍາລັບ ສປປ ລາວ, ການທົບທວນນະໂຍບາຍການຄ້າຄັ້ງນີ້ ແມ່ນຄັ້ງທໍາອິດ ນັບແຕ່ເຂົ້າເປັນສະມາຊິກ ອຄລ ໃນປີ 2013 ແລະ ກໍເປັນປີດຽວກັນກັບການສະເຫຼີມສະຫຼອງຄົບຮອບ 30 ປີ ຂອງການສ້າງຕັ້ງກົນໄກການທົບທວນນະໂຍບາຍການຄ້າຂອງ ອຄລ.

       ຄະນະຜູ້ແທນລາວ ໄດ້ລາຍງານການຈັດຕັ້ງປະຕິບັດແຜນງານຂອງຕົນ ແລະ ການພັດທະນາເສດຖະກິດ-ສັງຄົມ ພາຍຫຼັງການເຂົ້າເປັນສະມາຊິກ ອຄລ ໂດຍສະເພາະ ການ​ປັບປຸງບັນດາ​ນິຕິ​ກຳ​ຕ່າງໆ​ ໃຫ້​ມີ​ຄວາມ​ໂປ່​ງ​​ໃສ ແລະ ສອດຄ່ອງກັບສັນຍາຕ່າງໆ ຂອງ ອຄລ ເປັນຕົ້ນ ການຫຼຸດຜ່ອນຂອດຂັ້ນ-ຂັ້ນຕອນການນໍາເຂົ້າ-ສົ່ງອອກສິນຄ້າ ​​​ແນ​ໃສ່ ​ເພື່ອສ້າງສະພາບແວດລ້ອມທີ່ເອື້ອອໍານວຍແກ່ການດຳເນີນທຸລະກິດ ແລະ ດຶງດູດການລົງທຶນ  ແລະ ເພື່ອກ້າວໄປສູ່ການ ສ້າງ ສປປ ລາວ ໃຫ້ເປັນລັດແຫ່ງກົດໝາຍ. ຄຽງຄູ່ກັນນີ້, ສປປ ລາວ ກໍໄດ້ປະກອບສ່ວນຢ່າງຕັ້ງໜ້າ​ເຂົ້າໃນ​ການ​ເຈລະຈາ​ຮອບພັດທະນາ​ໂດ​ຮາ ແລະ ສະໜັບສະໜູນການປະຕິຮູບ ອຄລ, ພ້ອມທັງ ປະກອບສ່ວນຕໍ່ການເຈລະຈາບັນດາບັນຫາໃໝ່ທີ່ກໍາລັງປຶກສາຫາລືກັນ ໂດຍຜ່ານ ການອອກຖະແຫຼງການຮ່ວມກັບບັນດາສະມາຊິກ ອຄລ ເຊັ່ນ ການຄ້າທາງເອເລັກໂຕຣນິກ; ການສົ່ງເສີມຈຸລະວິສາຫະກິດ ແລະ ວິສາຫະກິດຂະໜາດນ້ອຍ ແລະ ກາງ; ການສົ່ງເສີມບົດບາດແມ່ຍິງໃນວຽກງານການຄ້າ ແລະ ການອຳນວຍຄວາມສະດວກດ້ານການລົງທຶນ.  

      ຄະນະຜູ້ແທນລາວ ຍັງໄດ້ຊີ້ແຈງຕໍ່ຄໍາຖາມ ແລະ ຄໍາຄິດເຫັນຂອງບັນດາສະມາຊິກທີ່ໄດ້ສົ່ງໃຫ້ກ່ອນ ແລະ ຄໍາຖາມເພີ່ມຕື່ມໃນກອງປະຊຸມຄັ້ງນີ້ ຊຶ່ງສັງລວມແລ້ວມີທັງໝົດ 209 ຄຳຖາມຈາກ 23 ປະເທດ. ຄໍາຖາມສ່ວນໃຫຍ່ທີ່ສະມາຊິກໃຫ້ຄວາມສົນໃຈ ແມ່ນກ່ຽວກັບຂັ້ນຕອນການອະນຸຍາດລົງທຶນ; ການຫ້າມ ການສົ່ງອອກໄມ້ ແລະ ແຮ່ທາດ ທີ່ບໍ່ໄດ້ຮັບການປຸງແຕ່ງ; ການຈັດສັນສຳປະທານບໍ່ແຮ່; ນະໂຍບາຍພະລັງງານ ແລະ ການຜະລິດ; ບາງບັນຫາດ້ານລະບຽບການ ແລະ ການບໍລິການດ້ານການເງິນ-ທະນາຄານ; ໂທລະຄົມ, ແຜນພັດທະນາຂົນສົ່ງທາງບົກ ແລະ ທາງລົດໄຟ; ແຜນວຽກກ່ຽວຂ້ອງກັບ ການຄ້າທາງເອເລັກໂຕຣນິກ ແລະ ການທ່ອງທ່ຽວ ເປັນຕົ້ນ.

       ຜ່ານການລາຍງານ ແລະ ຊີ້ແຈງ, ກອງປະຊຸມໄດ້ຕີລາຄາສູງ ແລະ ຍ້ອງຍໍຊົມເຊີຍ ສປປ ລາວ ຕໍ່ຜົນສໍາເລັດໃນການພັດທະນາເສດຖະກິດ-ສັງຄົມ ໃນ 6 ປີ ຜ່ານມາ; ການຈັດຕັ້ງປະຕິບັດພັນທະໃນຂອບສັນຍາ ອຄລ; ຄວາມຄືບໜ້າ ແລະ ຄວາມພະຍາຍາມໃນການປັບປຸງນະໂຍບາຍ, ກົດໝາຍ ແລະ ລະບຽບການ; ແລະ ການປັບປຸງສະພາບແວດລ້ອມທີ່ເອື້ອອໍານວຍໃຫ້ແກ່ການຄ້າ ແລະ ການລົງທຶນ. ພ້ອມນີ້, ກອງປະຊຸມກໍຮັບຮູ້ເຖິງສິ່ງທ້າທາຍ ແລະ ທິດທາງຕໍ່ໜ້າທີ່ ສປປ ລາວ ຈະໄດ້ສືບຕໍ່ຈັດຕັ້ງປະຕິບັດ ພາຍຫຼັງກອງປະຊຸມ ທົບທວນນະໂຍບາຍການຄ້າຄັ້ງນີ້ ເປັນຕົ້ນແມ່ນ ການແຈ້ງການລະບຽບການທີ່ຕິດພັນກັບສັນຍາ ອຄລ; ການສືບຕໍ່ປັບປຸງນະໂຍບາຍ ແລະ ຂັ້ນຕອນການອະນຸຍາດການລົງທຶນ; ການສ້າງສະພາບແວດລ້ອມທີ່ເອື້ອອໍານວຍໃນການດຳເນີນທຸລະກິດ ແລະ ບັນຫາອື່ນໆ.

       ພາຍຫຼັງກອງປະຊຸມຄັ້ງນີ້, ສປປ ລາວ ຈະໄດ້ສືບຕໍ່ກໍານົດແຜນວຽກລະອຽດ ເພື່ອຂໍການຊ່ວຍເຫຼືອທາງດ້ານວິຊາການໃນຂົງເຂດທີ່ຄ້າງຄາຮ່ວມກັບບັນດາສະມາຊິກ ອຄລ ເພື່ອຮັບປະກັນຜົນປະໂຫຍດທີ່ໄດ້ຮັບຈາກກອງປະຊຸມທົບທວນນະໂຍບາຍການຄ້າດັ່ງກ່າວ.

ພາບ-ຂ່າວໂດຍ: ກົມນະໂຍບາຍການຄ້າຕ່າງປະເທດ

ຮຽບຮຽງໂດຍ: ນ. ຖື ແຫວນວົງສົດ ກຜຮ