ຕອນເຊົ້າ ເວລາ 9: 00 ໂມງ ຂອງວັນທີ 28 ພະຈິກ 2019 ທີ່ຫ້ອງປະຊຸມໃຫຍ່ຊັ້ນ I ກະຊວງອຸດຫະກໍາ ແລະ ການຄ້າ; ໄດ້ຈັດກອງປະຊຸມສຳມະນາ ແລກປ່ຽນຂໍ້ມູນກ່ຽວກັບເງື່ອນໄຂ ແລະ ມາດຕະຖານການຊື້-ຂາຍ ຂອງບັນດາຮ້ານຄ້າຂາຍຍົກ-ຂາຍຍ່ອຍ ແລະ ບັນດາຜູ້ຜະລິດຢູ່ນະຄອນຫລວງວຽງຈັນ ຈັດໂດຍກົມແຜນການ ແລະ ການຮ່ວມມື ກະຊວງອຸດສາຫະກຳ ແລະ ການຄ້າ ແລະ ມີບັນດາກົມທີ່ກ່ຽວຂ້ອງ ແລະ ຕົວແທນຫ້າງຮ້ານປະມານ 45 ກວ່າທ່ານເຂົ້າຮ່ວມ.
ໃຫ້ກຽດເປັນປະທານ ໂດຍ ທ່ານ ພູວຽງ ພົງສາ ວ່າການແທນ ຫົວໜ້າກົມແຜນການ ແລະ ການຮ່ວມມື ກະຊວງອຸດສາຫະກໍາ ແລະ ການຄ້າ ໄດ້ກ່າວເປີດກອງປະຊຸມ ໂດຍ ອີງໃສ່ລະບຽບກົດໝາຍ ແລະ ນິຕິກຳຕ່າງໆຂອງ ສປປ ລາວ ທີ່ກຳນົດໄວ້, ຫຼັງຈາກນັ້ນຜູ້ປະກອບການຫ້າງຮ້ານຕ່າງໆທີ່ເປັນຕົວແທນຢູ່ນະຄອນຫລວງ ໄດ້ພ້ອມກັນປະກອບຄຳເຫັນ ຍົກບັນຫາຂໍ້ສະດວກ
ແລະ ຂໍ້ຫຍຸ້ງຍາກ-ຈຸດອອ່ນຂໍ້ຄົງຄ້າງ ຫຼາຍບັນຫາໃນໄລຍະຜ່ານມາ ແລະ ຕໍ່ໜ້າ ທີ່ຜູ້ປະກອບການເຮັດທຸລະກິດຄ້າຂາຍຢູ່ ສປປ ລາວ ພົບພໍ້. ນອກຈາກນັ້ນຍັງຈະໄດ້ມີສ່ວນຮ່ວມໃນການແກ້ໄຂບັນຫາຮ່ວມກັນ ທັງສອງຝ່າຍ ເບື້ອງລັດ ແລະ ເບື້ອງທຸລະກິດ ຫຼື ເບື້ອງທຸລະກິດກັບເບື້ອງທຸລະກິດດ້ວຍກັນ ເພື່ອຮ່ວມກັນແກ້ໄຂບັນຫາໃນສະເພາະໜ້າໃຫ້ມັນສອດຄ່ອງກັບສະພາບຕົວຈິງ ໂດຍສະເພາະຜູ້ປະກອບການ, ຜູ້ຜະລິດ ແລະ ຜູ້ຂາຍ ເພື່ອເຮັດໃຫ້ການດໍາເນີນກິດຈະການຄົງຕົວຢູ່ ໃນຂອດການບໍລິການພາຍໃນ, ນອກຈາກນັ້ນການບໍລິການສິນຄ້າທີ່ນຳເຂົ້າມາຈາກຕ່າງປະເທດເປັນສ່ວນຫຼາຍ ໂດຍສະເພາະແມ່ນບັນດາປະເທດທີ່ຢູ່ອ້ອມຂ້າງ ທີ່ມີຊາຍແດນຕິດກັບ ສປປ ລາວ ສິນຄ້ານຳເຂົ້າຕ້ອງມີການຕິດສະຫຼາກເປັນພາສາລາວ ເພື່ອຄວາມສະດວກ ໃຫ້ບໍລິສັດ ທີ່ເປັນຕົວແທນຈຳໜ່າຍ.
ຕອນທ້າຍ ທ່ານ ພູວຽງ ພົງສາ ໄດ້ສະເໜີໃຫ້ເບື້ອງລັດ ແລະ ເບື້ອງທຸລະກິດ ຕ້ອງມີນະໂຍບາຍອັນເໝາະສົມດ້ານນິຕິກຳ ແລະ ຊອກທາງອອກໃຫ້ແກ່ຜູ້ບໍລິການທັງພາຍໃນ ແລະ ຕ່າງປະເທດ, ສິນຄ້າພາຍໃນ ແລະ ພາຍນອກຕ້ອງຖືກເງື່ອນໄຂ ແລະ ມາດຕະຖານຕໍ່ລະບຽບການ ຂອງຜູ້ປະກອບການ, ຜູ້ຜະລິດ, ຜູ້ຂາຍ ແລະ ຜູ້ຊົມໃຊ້.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
