ຕອນເຊົ້າເວລາ 11 ໂມງ ຂອງວັນທີ 19 ພຶດສະພາ 2020, ທີ່ຫ້ອງຮັບແຂກ ຊັ້ນ 4 ກະຊວງອຸດສາຫະກໍາ ແລະ ການຄ້າ, 04 ບໍລິສັດທີ່ດໍາເນີນທຸລະກິດ ຢູ່ ສປປ ລາວ ຊຶ່ງປະກອບດ້ວຍ ບໍລິສັດ ບຸນສົງ ການຄ້າ ຂາອອກ-ຂາເຂົ້າ ຈຳກັດຜູ້ດຽວ, ບໍລິສັດ ຈີຟີ້ງ ບໍລິການເຊົ່າກົງຈັກ ຈໍາກັດຜູ້ດຽວ, ບໍລິສັດ ພົງພີພັດ ຂາອອກ-ຂາເຂົ້າ ຈໍາກັດ, ບໍລິສັດ ຫຼຽວຊ່ຽງເກີ້ ລົງທຶນພັດທະນາ ຈໍາກັດຜູ້ດຽວ ນໍາພາໂດຍ ທ່ານ ບຸນສົງ ສະຫວັນວາລີ ພ້ອມດ້ວຍບັນດາຜູ້ຕາງໜ້າບໍລິສັດ ໄດ້ມອບເຄື່ອງຊ່ວຍເຫຼືອ ໃຫ້ແກ່ ທ່ານ ນ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ເພື່ອໃຊ້ເຂົ້າໃນວຽກງານປ້ອງກັນພະຍາດອັກເສບປອດຈາກເຊື້ອຈຸລະໂຣກສາຍພັນໃໝ່ COVID-19, ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 06 ທ່ານ, ເຄື່ອງຊ່ວຍເຫຼືອດັ່ງກ່າວປະກອບມີ: 1./ ຄອມພິວເຕີ້ ໂນດບຸກ 01 ເຄື່ອງ ມູນຄ່າ 7.500.000 ກີບ 2./ ຄອມພິວເຕີ້ ຕັ້ງໂຕະ 04 ເຄື່ອງ ມູນຄ່າ 20.000.000 ກີບ 3./ ປີ່ນເຕີ້ 04 ເຄື່ຶອງ ມູນຄ່າ 8.000.000 ກີບ 4./ ຜ້າອັດປາກ ຈໍານວນ 12.500 ອັນ ມູນຄ່າ 32.500.000 ກີບ 5./ ເຈ່ວລ້າງມື ຈໍານວນ 240 ກ່ອງ ມູນຄ່າ 12.000.000 ກີບ ລວມມູນຄ່າທັງໝົດ 80.000.000 ກີບ.
ໃນໂອກາດນີ້ທ່ານ ລັດຖະມົນຕີ ກໍ່ໄດ້ມອບໃບຍ້ອງຍໍ ໃຫ້ແກ່ບໍລິສັດ ແລະ ສະແດງຄວາມຂອບອົກຂອບໃຈຕໍ່ການຊ່ວຍເຫຼືອໃນຄັ້ງນີ້ ແລະ ຈະໄດ້ນໍາເອົາເຄື່ອງຊ່ວຍເຫຼືອດັ່ງກ່າວແຈກຢາຍ ໃຫ້ແກ່ບັນດາກົມ, ຫ້ອງການ ແລະ ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າເພື່ອໃຫ້ພະນັກງານໄດ້ນໍາໃຊ້ ໃນໄລຍະເວລາມາປະຕິບັດໜ້າທີ່ວຽກງານຂອງຕົນ ແລະ ອວຍພອນໄຊ ໃຫ້ບັນດາບໍລິສັດ ຈົ່ງສືບຕໍ່ດໍາເນີນທຸລະກິດດ້ວຍຄວາມສະດວກ ແລະ ໄດ້ຮັບການພັດທະນາຂຶ້ນໄປເລື້ອຍໆ.
ຂ່າວ ແລະ ພາບໂດຍ: ທ ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ ກົມຜຮ
