ຕອນບ່າຍ ເວລາ 15:00 ໂມງ ຂອງວັນທີ 09 ກັນຍາ 2020 ທີ່ຫ້ອງຮັບແຂກໃຫຍ່ຊັ້ນ 04 ກະຊວງ ອຄ, ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການເຂົ້າຢ້ຽມຂໍ່ານັບອໍາລາ ຂອງທ່ານ ດໍາຣົງ ໃຄ່ຄວນ , ເອກອັກຄະຣາຊະທູດ ແຫ່ງ ຣາຊະອານາຈັກໄທ ປະຈຳສປປ ລາວ ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 10 ທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ ດໍາຣົງ ໃຄ່ຄວນ, ທີ່ໄດ້ມາດຳລົງຕຳແໜ່ງເປັນເອກອັກຄະຣາຊະທູດ ໃຫ້ແກ່ສອງປະເທດລະຫວ່າງ ລາວ-ໄທ ໃນໄລຍະຜ່ານມາ ທ່ານກໍ່ມີຜົນງານທີ່ດີໃນການສ້າງສາຍພົວພັນຮ່ວມມືທີ່ດີນັບມື້ນັບແໜ້ນແຟ້ນຍິ່ງຂຶ້ນຫຼາຍດ້ານ ແລະ ຕີລາຄາສູງຕໍ່ການຊ່ວຍເຫຼືອໃຫ້ແກ່ລາວເປັນຕົ້ນ ບັນດາໂຄງການດ້ານການສຶກສາ, ການຮ່ວມມືທາງດ້ານການຄ້າ ແລະ ການລົງທຶນ ທີ່ຈັດຢູ່ອັນດັບ 02 ຂອງການລົງທຶນຕ່າງປະເທດໃນ ສປປ ລາວ ແລະ ຍັງໄດ້ປຶກສາຫາລືໃນດ້ານການຮັບມືກັບການລະບາດຂອງພະຍາດໂຄວິດ-19 ແລະ ດ້ານການຄ້າທີ່ທຸລະກິດຂອງສອງປະເທດ ໄດ້ສະເໜີຂໍການແກ້ໄຂໃນສະເພາະໜ້າ ແລະ ໄລຍະຍາວ.
ນອກນັ້ນຍັງເປັນຄູ່ຄ້າຮ່ວມກັນ ເປັນຕົ້ນສິນຄ້າການນຳເຂົ້າ-ສົ່ງອອກ ແລະ ຂໍສະເໜີໃນຕໍ່ໜ້າໃຫ້ມີການຄ້າຮ່ວມກັນຫຼາຍຂຶ້ນ, ລວມເຖິງການທີ່ໄດ້ຊ່ວຍເຫຼືອໃນໄລຍະຜ່ານມາ ທັງສອງຝ່າຍສືບຕໍ່ຮ່ວມມືພັດທະນາເສດຖະກິດ ແລະ ວຽກງານອື່ນໆໃນຕໍ່ໜ້າໃຫ້ດີຂຶ້ນກວ່າເກົ່າ; ທ່ານ ດໍາຣົງ ໃຄ່ຄວນ, ໄດ້ກ່າວວ່າ: ຂ້າພະເຈົ້າຮູ້ສຶກພູມໃຈທີ່ໄດ້ດໍາລົງຕໍາແໜ່ງເປັນ ເອກອັກຄະຣາຊະທູດ ແລະ ກໍ່ສະແດງຄວາມຂອບໃຈມາຍັງທ່ານລັດຖະມົນຕີ ໃນໄລຍະທີ່ດຳລົງຕຳແໜ່ງເປັນເອກອັກຄະຣາຊະທູດຢູ່ລາວຜ່ານມາ ທີ່ອໍານວຍຄວາມສະດວກໃຫ້ແກ່ຂ້າພະເຈົ້າ.
ໃນຕອນທ້າຍ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ອວຍພອນໃຫ້ທ່ານທູດຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ ແລະ ສົ່ງເສີມສາຍພົວພັນ ແລະ ການຮ່ວມມື ລະຫວ່າງ ສອງປະເທດໃຫ້ດີຂຶ້ນກວ່າເກົ່າ ແລະ ມອບຜະລິດຕະພັນສິນຄ້າຂອງລາວ ທີ່ໄດ້ຮັບລາງວັນຫຼຽນເງິນຈາກປະເທດຍີ່ປຸ່ນ ໃຫ້ແກ່ທ່ານ ດໍາຣົງ ໃຄ່ຄວນ ເປັນທີ່ລະນຶກ ທັງເປັນການໂຄສະນາສິນຄ້າ ໃຫ້ແກ່ຕ່າງປະເທດໄດ້ຮັບຮູ້ຢ່າງກ້ວາງຂວາງ; ພ້ອມດຽວກັນນີ້, ທ່ານ ເອກອັກຄະຣາຊະທູດ ກໍ່ສະແດງຄວາມຂອບໃຈ ມາຍັງ ທ່ານລັດຖະມົນຕີ ກະຊວງອຸດສາຫະກຳ ແລະ ການຄ້າ ທີ່ໃຫ້ການຕ້ອນຮັບຢ່າງອົບອຸ່ນ ແລະ ດ້ວຍໄມຕີຈິດມິດຕະພາບທີ່ດີ.
ພາບ ແລະ ຂ່າວໂດຍ: ນ ຖື ແຫວນວົງສົດ ສູນສະຖິຕິ ແລະ ຂໍ້ມູນຂ່າວສານ
