ຕອນບ່າຍໃນ ເວລາ 3: 30 ໂມງ ຂອງວັນທີ 28 ກັນຍາ 2020 ທີ່ຫ້ອງຮັບແຂກໃຫຍ່ຊັ້ນ 04 ກະຊວງອຸດສາຫະກໍາ ແລະ ການຄ້າ, ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ໃຫ້ກຽດຕ້ອນຮັບການ ເຂົ້າຢ້ຽມຂໍ່ານັບອໍາລາ ຂອງ ທ່ານ Jean-Bemard Carrasco, ເອກອັກຄະລັດຖະທູດ ແຫ່ງ ອົດສະຕຣາລີ ປະຈຳ ສປປ ລາວ ໃນໂອກາດສໍາເລັດໜ້າທີ່ທູດ ຢູ່ສປປ ລາວ ໃນເດືອນພະຈິກ 2020 ແລະ ມີຜູ້ຕາງໜ້າເຂົ້າຮ່ວມທັງສອງຝ່າຍ ປະມານ 13 ທ່ານ.
ໂອກາດນີ້ ທ່ານ ນາງ ເຂັມມະນີ ພົນເສນາ ລັດຖະມົນຕີ ກະຊວງອຸດສາຫະກໍາ ແລະ ການຄ້າ ກໍ່ແດງຄວາມຍ້ອງຍໍຊົມເຊີຍຕໍ່ ທ່ານ Jean-Bemard Carrasco, ທີ່ໄດ້ມາດຳລົງຕຳແໜ່ງເປັນເອກອັກຄະລັດຖະທູດໃຫ້ແກ່ສອງປະເທດ ລາວ-ອົດສະຕຣາລີ, ໃນໄລຍະຜ່ານມາ ທ່ານ ກໍ່ມີຜົນງານທີ່ດີໃນການເສີມສ້າງສາຍພົວພັນຮ່ວມມືທີ່ດີ ຊຶ່ງກັນ ແລະ ກັນ; ທັງສອງຝ່າຍໄດ້ຕີລາຄາສູງ ຕໍ່ການພົວພັນຮ່ວມມືທີ່ດີ ລະຫວ່າງ ສປປ ລາວ-ອົດສະຕຣາລີ ພ້ອມທັງການສົ່ງເສີມການເພີ່ມຜະລິດຕະພາບອັນດີງາມ ໃນການປະກອບສ່ວນສ້າງສາພັດທະນາພື້ນຖານໂຄງລ່າງ ໃຫ້ພາກລັດ ແລະ ພາກທຸລະກິດ ໃນການຊ່ວຍເຫຼືອແກ່ ສປປ ລາວ ເປັນຕົ້ນ ການປະກອບສ່ວນຊຸກຍູ້ ກອງປະຊຸມອາຊຽນ, ໂຄງການຊ່ວຍເຫຼືອ TDF 1 ແລະ TDF 2, ນອກນັ້ນໃນຕໍ່ໜ້ານີ້ຈະຊຸກຍູ້ຕື່ມ ເຂົ້າໃນໂຄງການ LCT ມູນຄ່າ 01 ລ້ານ ໂດລາສະຫະລັດ ໃຫ້ແກ່ ສປປ ລາວ, ທັງສອງຝ່າຍໄດ້ໃຫ້ຄໍາໝັ້ນສັນຍາກັນ ຈະສືບຕໍ່ຊຸກຍູ້ວຽກງານອື່ນໆ ໃນຕໍ່ໜ້າໃຫ້ດີຂຶ້ນກວ່າເກົ່າ.
ທ່ານ Jean- Bemard Carrasco, ໄດ້ກ່າວວ່າ: ຂ້າພະເຈົ້າຮູ້ສຶກພູມໃຈ ທີ່ໄດ້ດໍາລົງຕໍາແໜ່ງເປັນ ເອກອັກຄະລັດຖະທູດ ແຫ່ງ ອົດສະຕຣາລີ ປະຈໍາສປປ ລາວ ແລະ ກໍ່ສະແດງຄວາມຂອບໃຈມາຍັງທ່ານລັດຖະມົນຕີ ໃນໄລຍະຜ່ານມາອໍານວຍຄວາມສະດວກໃຫ້ແກ່ຂ້າພະເຈົ້າ.
ຕອນທ້າຍ ທ່ານ ລັດຖະມົນຕີ ອວຍພອນໄຊໃຫ້ທ່ານທູດຈົ່ງເດີນທາງກັບຄືນປະເທດດ້ວຍຄວາມສະຫວັດດີພາບ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
