ຕອນເຊົ້າ ເວລາ 9:00 ໂມງ ຂອງ ວັນທີ 21 ຕຸລາ 2020 ຜ່ານມາ, ທ່ານ ນາງ ເຂັມມະນີ ພົນເສນາ ລັດຖະມົນຕີກະຊວງ ອຸດສາຫະກຳ ແລະ ການຄ້າ ພ້ອມດ້ວຍຄະນະ ມີທ່ານຫົວໜ້າ-ຮອງກົມ , ຫົວໜ້າພະແນກ, ວິຊາການ ຈໍານວນໜຶ່ງ ແລະ ຫົວໜ້າພະແນກອຸດສາຫະກໍາ ແລະ ການຄ້ານະຄອນຫລວງ ລົງເຄື່ອນໄຫວຊຸກຍູ້ຢ້ຽມຢາມ ການຜະລິດເປັນສິນຄ້າ ຢູ່ນະຄອນຫຼວງວຽງຈັນ; ການຢ້ຽມຢາມເຄື່ອນໄຫວຄັ້ງນີ້ໄດ້ລົງຊຸກຍູ້ຟາມປູກຝັງຂອງ ບໍລິສັດ ເມືອງລາວສະໜອງສະບຽງອາຫານ ຈຳກັດ ຢູ່ບ້ານ ສົ້ມມໍ ເມືອງໄຊທານີ
ໂດຍການຕ້ອນຮັບ ແລະ ລາຍງານສະພາບການດໍາເນີນທຸລະກິດຈາກ ທ່ານ ບຸນທ່ຽງ ລັດຕະນະວົງ ຜູ້ອຳນວຍການບໍລິສັດ ເມືອງລາວ ສະໜອງສະບຽງອາຫານ ຈຳກັດ, ຊຶ່ງບໍລິສັດດັ່ງກ່າວໄດ້ຮັບການສ້າງຕັ້ງຂຶ້ນ ປີ 2018 ດຳເນີນທຸລະກິດ ດ້ານຜະລິດກະສິກຳພືດຜັກສະອາດ, ລ້ຽງປາ, ລ້ຽງກົບ, ສົ່ງເສີມປະຊາຊົນຜະລິດ ເກັບຊື້ ແລະ ຈຳໜ່າຍສິນຄ້າກະສິກຳສູ່ຕະຫຼາດ, ໂຮງແຮມ ແລະ ຜະລິດປຸງແຕ່ງສິນຄ້າກະສິກຳ; ການເຮັດກະສິກຳເປັນຟາມ ທີ່ມີເນື້ອທີ່ 08 ເຮັກຕາ, ເນື້ອທີ່ປູກຜັກ 03 ເຮັກຕາ, ໜອງປາ 0,5 ເຮັກຕາ; ການລົງທຶນເບື້ອງຕົ້ນ 4 ຕື້ກີບ, ລົງທຶນສຸມໃສ່ການຜະລິດ; ນອກຈາກນີ້ຍັງສົ່ງເສີມປະຊາຊົນໃກ້ຄຽງປູກຜັກເປັນສິນຄ້າ ເພື່ອຈໍາໜ່າຍສູ່ຕະຫຼາດພາຍໃນ ນະຄອນຫຼວງວຽງຈັນ.
ພ້ອມດຽວກັນນີ້ ທ່ານ ລັດຖະມົນຕີ ພ້ອມຄະນະ ຍັງສືບຕໍ່ຢ້ຽມຢາມ ແລະ ຊຸກຍູ້ຂະບວນການຜະລິດກະສິກຳ ແລະ ການຢາ ຢູ່ເມືອງຫາດຊາຍຟອງ ປະກອບມີ: ບໍລິສັດ ລັດວິສາຫະກິດສະບຽງອາຫານ ນວ, ໂຮງຂ້າສັດທັນສະໄໝດອນດູ່, ບໍລິສັດ ອຸໄລພານິດ ປະເທດລາວ ຈຳກັດ ແລະ ບໍລິສັດ ລັດວິສາຫະກິດໂຮງງານຜະລິດຢາ ເລກ 03 ຕື່ມອີກ.
ໃນໂອກາດນີ້ ທ່ານ ລັດຖະມົນຕີ ໄດ້ມີຄຳເຫັນວ່າ: ການລົງ ຢ້ຽມຢາມ ແລະ ຊຸກຍູ້ຄັ້ງນີ້ ເພື່ອເປັນສ້າງຂະບວນການຂໍ່ານັບຮັບຕ້ອນກອງປະຊຸມໃຫຍ່ ຄັ້ງທີ V ຂອງອົງຄະນະພັກກະຊວງ ອຸດສາຫະກຳ ແລະ ການຄ້າ ທັງເປັນການຊຸກຍູ້ສົ່ງເສີມຂະບວນການຜະລິດ ແຕ່ລະ ບໍລິສັດ ເພື່ອຜະລິດສະໜອງຮັບໃຊ້ຕະຫຼາດພາຍໃນ ນະຄອນຫລວງ, ພ້ອມນັ້ນ ກໍສະແດງຄວາມຊົມເຊີຍຕໍ່ ບັນດາບໍລິສັດ ທີ່ໄດ້ຕັດສິນໃຈສູ້ຊົນກັບສະພາບຄວາມຫຍຸ້ງຍາກ ພ້ອມທັງຍົກສູງຄຸນນະພາບການຜະລິດ ໃຫ້ນັບມື້ດີຂຶ້ນຢ່າງຕໍ່ເນື່ອງ.
ຂ່າວໂດຍ: ໄພຄຳອີ ວິໄລຄຳ
ສູນສະຖິຕິ ແລະ ຂໍ້ມູນຂ່າວສານ
