ຕອນເຊົ້າເວລາ 8:30 ໂມງ ຂອງວັນທີ 16 ທັນວາ 2020 ທີ່ຫ້ອງປະຊຸມໃຫຍ່ຊັ້ນ I ກະຊວງ ອຄ ໄດ້ຈັດກອງປະຊຸມໂຄສະນາ-ປາຖະກະຖາວັນສະຖາປະນາ ສປປ ລາວ ຄົບຮອບ 45 ປີ, ວັນເກີດປະທານໄກສອນ ພົມວິຫານ ຄົບຮອບ 100ປີແລະ ເຜີຍແຜ່-ເຊື່ອມຊຶມມະຕິ 11 ສະໄໝທີ X ມີບັນດາສະຫາຍຄະນະບໍລິຫານງານພັກກະຊວງ, ບັນດາສະຫາຍຄະນະພັກຮາກຖານ, ເລຂາ, ຮອງເລຂາໜ່ວຍພັກ, ຄະນະໜ່ວຍພັກ, ບັນດາຫົວໜ້າ-ຮອງພະແນກ ສັງກັດບັນດາກົມ, ຫ້ອງການ, ສະຖາບັນຄົ້ນຄວ້າເສດຖະກິດອຸດສາຫະກໍາ ແລະ ການຄ້າ, ບັນດາບໍລິສັດ – ລັດວິສາຫະກິດ ທີ່ຂຶ້ນກັບຄວາມຮັບຜິດຊອບຂອງກະຊວງ ອຄ, ສະພາການຄ້າ ແລະ ອຸດສາຫະກໍາແຫ່ງຊາດລາວ ແລະ ຄະນະຮັບຜິດຊອບກອງປະຊຸມ ເຂົ້າຮ່ວມທັງໝົດປະມານ 200 ສະຫາຍ.
ກອງປະຊຸມຄັ້ງນີ້ ພາຍໃຕ້ການເປັນປະທານ ຂອງສະຫາຍ ປອ ຄໍາພັນ ພົມມະທັດ ກໍາມະການກົມການເມືອງສູນກາງພັກ, ຫົວໜ້າຄະນະໂຄສະນາອົບຮົມ ສູນກາງພັກ ໂດຍໃຫ້ກຽດເຜີຍແຜ່ເອກະສານວັນສະຖາປະນາ ສປປ ລາວ ຄົບຮອບ 45 ປີ, ຫວນຄືນມູນເຊື້ອພາລະກິດປະຕິວັດຂອງປະທານ ໄກສອນ ພົມວິຫານ, ມະຕິກອງປະຊຸມຄົບຄະນະ ຄັ້ງທີ 11 ຂອງຄະນະບໍລິຫານງານສູນກາງພັກ ສະໄໝ X ແລະ ໃຫ້ການໂອ້ລົມຕໍ່ພະນັກງານຫຼັກແຫຼ່ງກະຊວງ ອຄ; ພ້ອມດຽວກັນນີ້ ສະຫາຍນາງ ເຂັມມະນີ ພົນເສນາ ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ຂຶ້ນຮັບຄໍາໂອ້ລົມ ແລະ ຈະນໍາເອົາເນື້ອໃນຈິດໃຈຂອງກອງປະຊຸມຄັ້ງນີ້ ໄປຜັນຂະຫຍາຍ ແລະ ຈັດຕັ້ງປະຕິບັດວຽກງານຂອງຂະແໜງ ອຄ ໃຫ້ປະກົດຜົນເປັນຈິງໃນຕໍ່ໜ້າ.
ຕອນທ້າຍ ສະຫາຍນາງ ເຂັມມະນີ ພົນເສນາ ເລຂາຄະນະບໍລິຫານງານພັກກະຊວງ, ລັດຖະມົນຕີ ກະຊວງອຸດສາຫະກໍາ ແລະ ການຄ້າ ໄດ້ມອບກະຕ່າຂອງຂັວນ ຊຶ່ງເປັນຜະລິດຕະພັນໂອດ໋ອບ ODOP ຂອງລາວໃຫ້ແກ່ສະຫາຍ ປອ ຄໍາພັນ ພົມມະທັດ ເປັນທີ່ລະນຶກ ແລະ ສະແດງຄວາມຂອບໃຈຕໍ່ການໃຫ້ກຽດເປັນປະທານກອງປະຊຸມຄັ້ງນີ້.
ແຫຼ່ງຂ່າວ: ພະແນກພັກ ແລະ ອົງການຈັດຕັ້ງມະຫາຊົນ, ກົມຈັດຕັ້ງ ແລະ ພະນັກງານ
ພາບໂດຍ: ນັກຂ່າວ ໜັງສືພິມເສດຖະກິດ-ການຄ້າ ແລະ ສູນສະຖິຕິ ແລະ ຂໍ້ມູນຂ່າວສານ
ຮຽບຮຽງໂດຍ: ນ ຖື ແຫວນວົງສົດ, ສູນສະຖິຕິ ແລະ ຂໍ້ມູນຂ່າວສານ ກົມ ຜຮ
